Ermənistanda siyasi qarşıdurma yeni mərhələyə qədəm qoyur

Bakı:

11 °C

87 %

10 m/s

Əlaqə

AZ RU EN

Ana səhifə / Dünya / Ermənistanda siyasi qarşıdurma yeni mərhələyə qədəm qoyur

Ermənistanda siyasi qarşıdurma yeni mərhələyə qədəm qoyur

29.01.2021 [09:14]

Üsyan variantını istisna etməyən müxalifət ümumrespublika mitinqinə hazırlaşır
Azərbaycan qarşısında sarsıdıcı məğlubiyyətə uğrayan təcavüzkar Ermənistanda 10 noyabr 2020-ci ildən başlayan siyasi qarşıdurma davam etməkdədir. Belə ki, baş nazir Nikol Paşinyanın istefası tələbi ilə etiraz aksiyaları keçirən “Vətənin xilası naminə hərəkat” taktikanı dəyişərək son günlər regionlarda sakinlərlə görüşlər təşkil edir. Ermənistan mediasının məlumatına görə, müxalif qüvvələrin birləşdiyi hərəkat bu tədbirlər və digər aksiyalarla yanaşı, 18 fevral tarixində Yerevanda ümumrespublika mitinqi keçirməyi planlaşdırır.
Qeyd edək ki, yanvarın 27-də “Vətənin xilası naminə hərəkat”ın liderinin rəhbərliyi ilə iclas keçirilib, ölkədə yaşanan xaos vəziyyətindən çıxmaq üçün “yol xəritəsi” elan edilib. “Sputnik Ermənistan”ın yaydığı məlumata görə, toplantıda 18 fevralda ümumxalq mitinqi keçirmək barədə qərar qəbul edilib. Toplantı zamanı çıxış edənlər hərəkatın ümumerməni xarakteri daşımasının, bölgələrdə görüşlərin intensivləşdirilməsinin vacibliyini qeyd ediblər. Hərəkatın sosial şəbəkədə yaydığı bəyanata görə, hazırkı baş nazirin və ya mövcud hakimiyyətin rəhbərliyi altında növbədənkənar seçkilərin keçirilməsinə yönələn hər hansı bir cəhd əvvəlcə sabitliyin pozulması və daxili siyasi qarşıdurma təhlükəsi ilə müşayiət olunacaq, seçkilər baş tutsa belə, legitimliyi şübhə altına alacaq. Bəyanatda bütün ermənilərin ciddi problemlərlə üzləşdikləri və Ermənistanın dövlətçiliyinin təhlükə altında olduğu bildirilir: “Bütün cəhətləri ilə iflasa uğrayan, ölkəni sosial-iqtisadi tənəzzül həddinə çatdıran bu hökumətə ümid etmək olmaz. “Vətənin xilası naminə hərəkat” məğlubiyyətin simvolu olan Paşinyanın istefa verəcəyi təqdirdə, keçid hökumətinin qurulacağına, ölkədəki vəziyyət sabitləşdikdən, lazımi şərait yaradıldıqdan sonra növbədənkənar parlament seçkilərinin keçiriləcəyinə əminlik ifadə edir”.
Yeri gəlmişkən, qeyd edək ki, məğlubiyyətin simvolu hesab edilən Paşinyanı devirmək istəyən müxalifətin “ya istefa, ya üsyan” şüarı hakimiyyətin diqqətindən yayınmayıb. Belə ki, Ararat (Vedi) vilayətinə səfər zamanı V.Manukyanın Paşinyanın hakimiyyətdən uzaqlaşdırılmasının vacibliyini bəyan edərək qiyam variantını istisna etməməsi Ermənistan baş prokurorluğunu hərəkətə keçirib. “Faktİnfo” yazır ki, prokurorluğun ictimaiyyətlə əlaqələr şöbəsinin müdiri A.Xaçatryan bildirib ki, baş prokurorluq V.Manukyanın üsyan və müharibə dövründə erməni generallara zəng etməsi məsələləri ilə bağlı KİV-də yayımlanan açıqlamalarını araşdırır. Xatırladaq ki, V.Manukyan son çıxışlarından birində qeyd edib ki, hökumət öz vəzifələrini yerinə yetirə bilmirsə, xalqın qiyam etmək hüququ var.
Bu arada Paşinyanın yaxın adamlarının siyasi dəstəyindən də məhrum olması prosesi davam edir. Erməni mediasının yazdığına görə, onun yaxın dostu, Yerevan şəhərinin meri Hayk Marutyan “Vətəndaş müqaviləsi” partiyasının sıralarını tərk edib. Qeyd edək ki, bundan bir qədər əvvəl “Faktİnfo” Yerevan merinin hakim komanda ilə problemi olduğunu və məzuniyyətdən qayıtdıqdan sonra istefa verəcəyini yazmışdı.
Onu da qeyd edək ki, N.Paşinyanın rəhbərlik etdiyi “Vətəndaş müqaviləsi” partiyasının da daxil olduğu “Mənim addımım” fraksiyasında təlatümlər davam edir. Son günlər tez-tez qapalı iclas keçirən fraksiyanın müzakirə etdiyi məsələlər barədə rəsmi açıqlama verilmir. Mətbuata sızan məlumatlara görə, baş nazirin istefası, növbədənkənar seçkilər və parlamentin buraxılması məsələləri əsas müzakirə mövzusu ola bilər.
Göründüyü kimi, məğlub Ermənistanda mövcud olan böhran yeni mərhələyə qədəm qoyur. 18 fevral ümumrespublika mitinqinə hazırlaşan müxalifətin üsyan yolunu istisna etməməsi yaxın vaxtlarda ölkədə daha ciddi siyasi qarşıdurma olacağı ehtimalını artırır.
Qaşqay ZİYƏDDİNOĞLU

Paylaş:

Baxılıb: 732 dəfə