Ermənistanda növbədənkənar seçki düyünü...

Bakı:

20 °C

82 %

15 m/s

Əlaqə

AZ RU EN

Ana səhifə / Dünya / Ermənistanda növbədənkənar seçki düyünü...

Ermənistanda növbədənkənar seçki düyünü...

10.02.2021 [08:59]

Ermənistanda gərginlik davam edir. Paşınyan hökumətinin növbədənkənar seçkilərin keçirilməsi məsələsini gündəmdən çıxarmaq cəhdi isə gərginliyi daha da artırıb. Daha dəqiq desək, hakim “Mənim addımım” fraksiyasının bu günlərdə yaydığı bəyanatda yer alan guya cəmiyyətin növbədənkənar parlament seçkilərinə müsbət yanaşmadığı barədə iddia müxalifət cəbhəsindən kəskin etirazla qarşılanıb. Ermənistan KİV-i yazır ki, sözügedən bəyanatdan sonra siyasi qarşıdurma daha da dərinləşib, küçə aksiyalarının təşkilatçıları olan müxalif qüvvələr və parlamentdəki fraksiyaların təmsilçiləri kəskin bəyanatlarla çıxış ediblər.
Belə ki, hakim “Mənim addımım” blokundan olan deputatların baş nazirlə görüşünü şərh edən “Çiçəklənən Ermənistan” partiyasının deputatı Naira Zöhrabyan bəyan edib ki, Paşinyanın heç vaxt vəzifədən əl çəkmək fikri olmayıb: “Halbuki o vaxt hakimiyyət həm ictimaiyyəti, həm də müxalifəti inandırmağa çalışırdı ki, guya istefa mümkündür. Sonra mövcud hökumət parlamentin buraxılması barədə tamamilə absurd tezis irəli sürdü. Bu halda da baş nazir N.Paşinyan hakimiyyətdə qalacaq və ölkəyə rəhbərlik etməyə davam edəcəkdi”.
N.Zöhrabyanın sözlərinə görə, bütün hallarda hakimiyyət nə regionlarda, nə də Yerevanda istədiyi dəstəyi əldə edə biləcək: “Buna əmindirlər və buna görə də növbədənkənar parlament seçkilərinin keçirilməsindən imtina etmək barədə qərar qəbul edildi”.
N.Zöhrabyan onu da deyib ki, yeni ildən sonra müxalifətin Paşinyanın istefası tələbi yönündə fəaliyyəti bir qədər zəifləyib: “Amma, eyni zamanda, hava şəraitinin yaxşılaşmasından və insanların dərin şokdan çıxmasından sonra müxalifətin mövcud hökumətlə mübarizənin yeni qüvvə ilə davam edəcəyinə əminəm. Müxalifət üçün soyuq qışda insanları küçələrə çıxmağa və mübarizəyə qoşulmağa vadar etmək çətindir. Bundan əlavə, Ermənistan vətəndaşları müharibə zamanı aldıqları ağır mənəvi-psixoloji zərbədən hələ də özlərinə gəlməyiblər”.
“Maariflənən Ermənistan” partiyasının və parlament fraksiyasının lideri Edmon Marukyan isə parlamentdə keçirdiyi ənənəvi brifinqdə deyib ki, hakimiyyətdəki şəxslərin növbədənkənar seçkilər keçirmək fikrindən imtina etməsi barədə açıqlamalarını ciddi qəbul etmək olmaz. “Armenia today” yazır ki, E.Marukyan açıqlama zamanı növbədənkənar seçkilərin qaçılmaz olduğunu bildirib: “Parlamentdəki növbəti “hökumət saatı”ndakı çıxışında Paşinyanın seçkilərin keçirilməsinə qarşı olmadığını bəyan edə biləcəyi istisna olunmur. Hakimiyyət orqanlarının bu mövzuda verdiyi bütün açıqlamalar ictimai rəyin manipulyasiyasından başqa bir şey deyildir”.
Marukyanın sözlərinə görə, bu hökumət ölkəni siyasi böhrandan çıxara bilməyəcək və növbədənkənar seçkilər qaçılmaz olacaq.
Hakimiyyətin növbədənkənar seçki keçirmək fikri olmadığı iddialarına cavab olaraq parlamentdə jurnalistlərə açıqlama verən vitse-spiker Alen Simonyan isə deyib ki, Ermənistan hakimiyyəti hər müxalifətçinin qapısını döyərək növbədənkənar seçkilərə getmələrini xahiş etməli deyil.
Göründüyü kimi, Ermənistanda növbədənkənar seçki məsələsi bir növ düyünü düşüb. Müxalifət qüvvələrinin əksəriyyəti növbədənkənar seçkilərə yalnız Paşinyanın baş nazir postundan istefası şərti ilə razılıq verir. Hakimiyyətin fürsətdən istifadə edərək seçki məsələsini gündəmdən çıxarmağa çalışması isə iqtidarla müxalifət arasında gərginliyi yeni mərhələyə keçirib.
Qaşqay ZİYƏDDİNOĞLU

Paylaş:

Baxılıb: 885 dəfə