Ermənistanda siyasi xaos hökm sürür

Bakı:

12 °C

94 %

3 m/s

Əlaqə

AZ RU EN

Ana səhifə / Dünya / Ermənistanda siyasi xaos hökm sürür

Ermənistanda siyasi xaos hökm sürür

21.05.2021 [08:55]

Xaos və anarxiyanın hökm sürdüyü Ermənistanda qeyri-sabitlik davam edir. Eyni zamanda, məğlub ölkədə mövcud olan sosial-iqtisadi, mənəvi-psixoloji böhran əhalidə növbədənkənar seçkilərə və siyasi qüvvələrə inamsızlıq yaradır. Ermənistan mətbuatı yazır ki, ölkə vətəndaşları siyasi qüvvələrin bundan sonra hansısa uğura nail olacaqlarına inanmırlar. 17 partiyanın birləşdiyi “Vətənin xilası naminə hərəkat”ın üzvlərinin əksəriyyətinin seçki məsələsi ortaya çıxan kimi, mandat dalınca qaçaraq Paşinyanın hakimiyyətdən getməsi tələblərini unutmaları da cəmiyyətdə birmənalı qarşılanmır.
Ermənistan mediasının yazdığına görə, müxalifət partiyalarının bir çoxunda daxili narazılıqlar da baş qaldırır. Məsələn, “Aysor.am” yazır ki, “Çiçəklənən Ermənistan” partiyasının deputatı, partiyanın baş katibi Naira Zöhrabyan vəzifəsindən istefa verdiyini və partiyanın proporsional siyahısı üzrə seçkilərdə iştirak etməyəcəyini bildirib. “Çiçəklənən Ermənistan” fraksiyasının üzvü istefanın səbəblərini açıqlamasa da, mətbuatın yazdığına görə, son günlər partiya sədri Qagik Çarukyanın seçki siyahısını özbaşına tərtib etməsi barədə söhbətlər deputatların etirazına gətirib çıxarıb.
Yeri gəlmişkən, bir neçə ay öncə “Çiçəklənən Ermənistan”ı tərk edən parlamentin bitərəf üzvü Gevork Petrosyan da parlamentin səlahiyyətlərinə xitam verildikdən sonra siyasi fəaliyyətini dayandıracağını bəyan edib. Ölkədə sağlam siyasi atmosferin olmadığını, müxalifətin qeyri-adekvat davranışlarını nəzərə alaraq bu addımı atdığını deyən G.Petrosyanın sözlərinə görə, indiki dövrdə aktiv siyasi fəaliyyəti məqsədəuyğun hesab etmir.
Bu arada, “News.am” yazır ki, Paşinyan hakimiyyəti rəqiblərinə qarşı təzyiqləri gücləndirib. Belə ki, “Daşnaksutyun” və “Yüksələn Ermənistan” partiyalarının birləşdiyi “Ermənistan” seçki blokunun seçkiqabağı qərargahının rəhbəri, baş nazirin keçmiş müavini Armen Gevorkyan xüsusi istintaq xidmətinə çağırılıb. A.Gevorkyan hakimiyyətin bu addımını onun seçki qərargahındakı fəaliyyətinin qarşısını almağa hesablandığını istisna etməyib.
Qeyd edək ki, müxalifətin parçalanmış şəkildə seçkilərə getməsi ekspertlər tərəfindən müxtəlif cür qiymətləndirilir. “Sputnik-Ermənistan” yazır ki, politoloq Yervand Bozoyan indiki mürəkkəb vəziyyətdə növbədənkənar seçkilərə getməyin məqbul variant olmadığı qənaətindədir. Onun sözlərinə görə, Paşinyan hakimiyyətini devirməyə nail ola bilməyən müxalifətin seçkilərlə razılaşmaqdan başqa şansı da qalmadı. Ekspertin qənaətinə əsasən, parlament seçkilərindən sonra ölkədə mövcud olan böhran daha da dərinləşəcək: “Əgər Nikol Paşinyan seçkilərdə qalib gəlsə, bu bizim üçün fəlakət, ölkəyə böyük zərbə olacaq. Paşinyanın qələbəsi xalqın ağır itki ilə barışdığının sübut olacaq”.
Göründüyü kimi, növbədənkənar seçkilərə hazırlaşan Ermənistanda xaos dərinləşir və siyasi qüvvələr arasında ziddiyyətlər artır. Bu isə məğlub ölkənin yeni kataklizmlərə sürükləndiyini göstərir.
Qaşqay ZİYƏDDİNOĞLU

Paylaş:

Baxılıb: 807 dəfə