Növbədənkənar parlament seçkiləri Ermənistanda heç bir problemi həll etməyib

Bakı:

14 °C

77 %

9 m/s

Əlaqə

AZ RU EN

Ana səhifə / Dünya / Növbədənkənar parlament seçkiləri Ermənistanda heç bir problemi həll etməyib

Növbədənkənar parlament seçkiləri Ermənistanda heç bir problemi həll etməyib

06.07.2021 [09:09]

Məlum olduğu kimi, müxalifətin 20 iyun parlament seçkilərinin yekun nəticələrindən konstitusiya məhkəməsinə (KM) şikayət etməsi Ermənistanda vəziyyəti daha da gərginləşdirib. Belə ki, qazandıqları mandatdan imtina etməsələr də, parlamentdə təmsil olunmaq hüququ qazanan müxalifət bloklarının KM-ə müraciəti yeni hökumətin formalaşmasına maneə törədir. Ermənistan mediası yazır ki, seçkilərin keçirilməsi məğlub ölkədə siyasi sabitliyin təmin olunmasına gətirib çıxarmayıb, vəziyyətin müsbət istiqamətdə dəyişməsinə təsir etməyib.
Məğlub ölkədə hazırda mövcud olan vəziyyəti dəyərləndirən “Respublikaçı” partiyasının sədr müavini Armen Aşotyan deyib ki, bundan sonra Ermənistan üçün daha çətin olacaq. “Panorama.am” yazır ki, A.Aşotyanın sözlərinə görə, parlament seçkiləri ölkə üçün vəziyyətdən çıxış yolu deyil, əksinə Ermənistanda daha bir ağır dövrün başlanğıcıdır: “Məqsədlər fərqli idi, bunlardan biri yenilənmiş legitim mandata malik hakimiyyətin formalaşmasına sahib olmaq idi. Bu seçkilər Ermənistan Respublikasının siyasi gələcəyi ilə əlaqəli olan heç bir məsələni həll etmədi”.
Xatırladaq ki, “Respublikaçı” partiyasının da təmsil olunduğu “Şərəfim var” bloku da seçkilərin nəticələrinin ləğv edilməsi üçün KM-ə müraciət edib.
Buna baxmayaraq, hakimiyyət hələ də seçkilərdə əldə etdiyi qələbəni qeyd edir. “Past” qəzet yazır ki, hakim komandanın nümayəndələri və hakim fraksiyanın deputatları bu günlərdə bölgələrdə ziyafət məclisləri təşkil edirlər.
Bu arada, “Joğovurd” qəzeti öz mənbələrinə istinadən yazır ki, hakim komandada, o cümlədən keçmiş “Mənim addımım” fraksiyasında ciddi ajiotaj hökm sürür. Əsas səbəb odur ki, növbədənkənar parlament seçkilərindən sonra rəhbərlikdən heç kim onlarla görüşməyib və gələcək fəaliyyətləri barədə müzakirə aparılmayıb: “Əldə etdiyimiz məlumata görə, deputatların çoxu kadr dəyişikliyi barədə mətbuatdan məlumat aldıqlarına görə bu vəziyyətdən narahatdırlar”.
Qəzet onu da yazır ki, hakim fraksiyanı ətrafında birləşdirə biləcək namizəd hələ tapılmayıb.
Göründüyü kimi, növbədənkənar parlament seçkiləri Ermənistanda heç bir problemin həllinə kömək etməyib. Ekspertlərin fikrincə, seçkilərin nəticələri Paşinyanın hakimiyyətinin möhkəmlənməsinə xidmət etsə də, xaos və gərginliyin aradan qalxmasını təmin etməyib.
Qaşqay ZİYƏDDİNOĞLU

Paylaş:

Baxılıb: 803 dəfə