Azərbaycanın müstəqil siyasətinə heç bir kənar qüvvə mane ola bilməz

Bakı:

13 °C

71 %

7 m/s

Əlaqə

AZ RU EN

Ana səhifə / Gündəm / Azərbaycanın müstəqil siyasətinə heç bir kənar qüvvə mane ola bilməz

Azərbaycanın müstəqil siyasətinə heç bir kənar qüvvə mane ola bilməz

20.11.2012 [00:46]

Prezident İlham Əliyev: Biz öz yolumuzla gedəcəyik, öz bildiyimizi edəcəyik
Azərbaycan dünya xəritəsində nadir ölkələrdəndir ki, cəmi 21 il ərzində, yəni, bir dövlətin formalaşması və inkişafı üçün çox qısa zaman çərçivəsində böyük inkişafa nail olub, üstəlik, həqiqi müstəqil siyasət yeridən suveren ölkə statusunu qoruyub saxlaya bilib. Bildiyimiz kimi, müasir qloballaşma dövründə transmilli korporasiyaların, dövlətüstü qurumların gücləndiyi, dövlətlərarası siyasi, iqtisadi asılılığın artdığı bir zamanda milli dövlətlərin müstəqil siyasət yürütməsi daha da çətinləşir. Lakin ölkəmizin təcrübəsində dövlətin siyasi, iqtisadi, hərbi müstəqilliyini təmin etməsinin və sərbəst inkişafının şahidi oluruq. Azərbaycan daxili və xarici siyasətində balansı qoruyan, beynəlxalq əməkdaşlığın tələbləri ilə milli maraqları uzlaşdıra bilən az sayda ölkələrdəndir. Ölkəmizin uğurlarına həm daxili, həm də xarici mühit və faktorlar prizmasından yanaşmaq mümkündür.
Müstəqilliyinin ilk illərində çox ağır sınaqlarla üz-üzə qalan Azərbaycan Ümummilli lider Heydər Əliyevin həyata keçirdiyi siyasi, iqtisadi, sosial islahatlarla inkişaf yoluna qədəm qoydu. Azərbaycanda hüquqi, demokratik dövlət quruculuğu prosesinin sürətlə irəliləməsi, buna paralel olaraq sosial-siyasi sabitliyin təmin olunması davamlı inkişafa zəmin yaratdı. Ulu öndərin əsasını qoyduğu siyasi xəttin uğurla davam etdirilməsi sayəsində respublikamız yüksək makroiqtisadi göstəricilərə nail olub, sosial rifah artıb, həyata keçirilən abadlıq və yenidənqurma işləri ölkənin simasını tamamilə dəyişdirib.
Azərbaycan həm də beynəlxalq iqtisadi əlaqələrini durmadan genişləndirir. Xarici əlaqələrin genişləndirilməsi, ilk növbədə, ölkənin beynəlxalq siyasi, iqtisadi əməkdaşlıq əlaqələrinin inkişafına töhfədir. Bununla, Azərbaycan beynəlxalq birliyin müstəqil və tamhüquqlu subyekti kimi öz milli maraq və mənafelərini qarşılqlı hörmət və ortaq faydalanma prinsipləri çərçivəsində həyata keçirir. Bu isə Azərbaycanın müstəqil inkişafını təmin etməklə yanaşı, öz gücünə inamını, eləcə də, ölkəmizə olan etimadı artırır. Qlobal maliyyə böhranı Azərbaycan iqtisadiyyatının möhkəm dayaqlar üzərində inkişaf etdiyini təsdiqlədi.
Eyni zamanda, Azərbaycan ərazisinin 20 faizi işğal altında olan bir ölkə kimi hərbi müdafiə gücünü də durmadan artırmaqdadır. Şübhə yoxdur ki, ölkəmiz istər iqtisadi, istərsə də hərbi cəhətdən regional gücə çevrilib.
Eyni fikirləri Azərbaycanın siyasi nüfuzu ilə də bağlı söyləmək olar. Respublikamız BMT, Aİ, Avropa Şurası, AŞPA, İƏT, UNESCO başda olmaqla ən müxtəlif beynəlxalq təşkilatlarla fəal əməkdaşlıq edir, bu qurumlar çərçivəsində bir çox dövlətlərlə əlaqələrini daha da genişləndirir.
Beynəlxalq əməkdaşlığın genişlənməsinin, ölkənin siyasi nüfuzunun artmasının ən önəmli cəhətlərindən biri Azərbaycan həqiqətlərinin daha sürətlə yayılmasıdır. Məlumdur ki, sürətli inkişaf sayəsində sosial-iqtisadi problemlərin öhdəsindən gələn Azərbaycan bütün səylərini ərazi bütövlüyünün təmin olunmasına yönəldib. Ermənistanın işğalı altında olan Dağlıq Qarabağ və ətraf rayonların azad edilməsi Azərbaycan ictimaiyyətinin ən böyük arzusu, ölkə rəhbərliyinin isə qarşıya qoyduğu birinci dərəcəli məsələdir.
O da məlumdur ki, erməni təbliğat maşının fəaliyyəti, işğalçı Ermənistanın havadarlarının səyləri nəticəsində bu münaqişə ilə bağlı həqiqətlər bir müddət dünya ictimaiyyətinə qaranlıq qalıb. Lakin artıq hər il dünyada daha çox insan Azərbaycanın məruz qaldığı hərbi təcavüz faktı, Ermənisatının işğal siyasəti ilə bağlı həqiqətləri öyrənir. Bu prosesdə Azərbaycan dövlətinin diaspor siyasəti, QHT-lərin aktiv fəaliyyəti ilə yanaşı, ölkəmizin xarici siyasi, iqtisadi əlaqələrinin, müxtəlif dövlətlərlə dostluq münasibətlərinin də böyük rolu var. Bu baxımdan təsadüfi deyil ki, son bir il ərzində Pakistan, Meksika və Kolumbiya Xocalı qətliamını soyqırımı kimi tanıyıb, Meksikanın paytaxtı Mexiko şəhərindəki meydanların birinə “Xocalı” adı verilib, orada Xocalı soyqırımı qurbanlarının xatirəsinə abidə ucaldılıb.
Azərbaycanın beynəlxalq müstəvidə ən böyük diplomatik qələbələrindən biri şübhəsiz, 2011-ci ildə ölkənin 155 dövlətin dəstəyi ilə BMT TŞ-yə üzv seçilməsi oldu. Əlbəttə ki, Azərbaycanın siyasi, iqtisadi gücünün artması, regional güc mərkəzinə çevrilməsi ölkəmizin qlobal miqyasda mövqelərini möhkəmləndirir. Lakin sirr deyil ki, mövcud vəziyyət Azərbaycanın düşmənlərini, anti-Azərbaycan dairələri ciddi narahat etməkdədir. Ölkəmizin müstəqil şəkildə, heç bir xarici yardıma ehtiyacı olmadan inkişafını qəbul edə bilməyən belə qüvvələr təxribatlar törətməklə Azərbaycanı öz yolundan uzaqlaşdırmağa çalışırlar. Yeni Azərbaycan Partiyasının yaradılmasının 20 illiyinə həsr olunmuş mərasimdəki nitqində Prezident İlham Əliyev erməni lobbisi, islamafob siyasi dairələr və imperialist mərkəzlərin Azərbaycana qarşı düşmən mövqedə dayanan əsas qüvvələr olduğunu bildirib.
Lakin ölkəmizin inkişaf səviyəsi, hakimiyyətin siyasi iradəsi və xalqın iqtidara olan dəstəyi Azərbaycana qarşı yönələn bütün təzyiq mexanizmlərinin və təxribatların iflasa uğrayacağını deməyə əsas verir. Dövlət başçısının qeyd edilən mərasimdə səsləndirdiyi fikirlər Azərbaycanın bundan sonra da heç bir təzyiq mərkəzinin göstərişlərinə tabe olmayacağını, eləcə də, ölkə rəhbərliyinin bu məsələdə qətiyyətli mövqeyini bir daha ortaya qoydu: “Çünki üç mərkəz olmasın, beş mərkəz olsun, biz öz yolumuzla gedəcəyik, öz bildiyimizi edəcəyik. Çünki bizim, yenə də deyirəm, güclü dayaqlarımız vardır. Bu da Azərbaycan xalqıdır”.
Hülya MƏMMƏDLİ

Paylaş:

Baxılıb: 1084 dəfə