Azərbaycan Prezidenti Administrasiyasının nümayəndə heyəti Ankarada görüşlər keçirib

Bakı:

24 °C

64 %

5 m/s

Əlaqə

AZ RU EN

Ana səhifə / Gündəm / Azərbaycan Prezidenti Administrasiyasının nümayəndə heyəti Ankarada görüşlər keçirib

Azərbaycan Prezidenti Administrasiyasının nümayəndə heyəti Ankarada görüşlər keçirib

02.04.2010 [09:30]

Ramiz Mehdiyev dünyanın güclü və aparıcı ölkələrindən biri olan qardaş Türkiyənin məruz qaldığı ikili standartlara qarşı mübarizədə Azərbaycanın hər zaman onun yanında olacağını söyləyib
Xəbər verdiyimiz kimi, Azərbaycan Prezidenti Administrasiyasının rəhbəri Ramiz Mehdiyevin başçılıq etdiyi nümayəndə heyəti Türkiyə paytaxtına rəsmi səfərə gedib. Aprelin 1-də - səfərin ikinci günü Türkiyənin xarici işlər naziri Əhməd Davudoğlu Ramiz Mehdiyevin və nümayəndə heyətinin şərəfinə ziyafət təşkil edib. Türkiyə xarici siyasət idarəsinin başçısı Ankaranın xarici siyasət kursundan ətraflı bəhs edib, Türkiyənin hər zaman qardaş Azərbaycanın haqlı mövqeyini dəstəkləyəcəyini vurğulayıb. Səmimi qəbula görə təşəkkürünü bildirən Ramiz Mehdiyev dünyanın güclü və aparıcı ölkələrindən biri olan qardaş Türkiyənin məruz qaldığı ikili standartlara qarşı mübarizədə Azərbaycanın hər zaman onun yanında olacağını söyləyib.
Ramiz Mehdiyevin başçılıq etdiyi nümayəndə heyəti daha sonra Ankaradakı Heydər Əliyev Parkına gəlib. Xalqımızın ümummili lideri Heydər Əliyevin burada ucaldılmış abidəsinin önünə tər çiçəklər qoyulub. Nümayəndə heyəti parkı gəzib, buradakı abadlıq işlərindən məmnun qalıb.
Azərbaycan Prezidenti Administrasiyasının rəhbəri Ramiz Mehdiyev Türkiyənin Baş naziri Rəcəb Tayyib Ərdoğanla görüşüb, Azərbaycan Prezidenti İlham Əliyevin səmimi salamlarını Türkiyə hökumətinin başçısına çatdırıb. Rəcəb Tayyib Ərdoğan da onun səmimi salamlarını Azərbaycan dövlətinin başçısı İlham Əliyevə çatdırmağı xahiş edib.
Görüşdə qardaş ölkələrimiz arasında əlaqələrin yüksək səviyyədə olduğu, Azərbaycanın və Türkiyənin dövlət və hökumət nümayəndələrinin qarşılıqlı səfərlərinin bu münasibətlərin möhkəmlənməsinə töhfə verdiyi vurğulanıb. Tərəflər beynəlxalq və regional məsələlər ətrafında fikir mübadiləsi aparıblar. Sonra Ramiz Mehdiyevin başçılıq etdiyi nümayəndə heyəti Türkiyə Böyük Millət Məclisinin sədri Məhmət Əli Şahinlə görüşüb.
Məhmət Əli Şahin bildirib ki, qardaş ölkələrimizin parlamentləri arasında təkcə sədrlər səviyyəsində deyil, müxtəlif səviyyələrdə faydalı əməkdaşlıq mövcuddur. Deputatlarımız beynəlxalq konfranslarda və tədbirlərdə ölkələrimizin maraqlarını birgə müdafiə edirlər. Türkiyə parlamentinin sədri Azərbaycanın sürətli inkişafına və beynəlxalq aləmdə getdikcə güclənməsinə diqqət çəkib.
Ramiz Mehdiyev bildirib ki, Türkiyə dünya və bölgə siyasətində mühüm rolu olan böyük dövlətdir. Son illər qardaş dövlətimizin beynəlxalq nüfuzu getdikcə artır. Bu fikirlər Rəcəb Tayyib Ərdoğanla görüşdə də səslənib. Bizim dövlət və hökumət nümayəndələrimiz daha tez-tez görüşməlidirlər.
Azərbaycan Prezidenti Administrasiyasının rəhbəri ölkəmizin işğal olunmuş torpaqları azad edilməyənə qədər Ermənistanla imzalanmış protokolların ratifikasiya olunmayacağına dair Türkiyənin parlament rəhbərliyinin bəyanatlarından məmnunluğunu ifadə edib. Bu qəti mövqe üçün Azərbaycan Prezidenti İlham Əliyevin Türkiyə rəhbərliyinə təşəkkürünü çatdırıb.
Görüşlərdə Azərbaycanın Türkiyədəki səfiri Zakir Həşimov da iştirak edib.
ötən gün Azərbaycan Prezidenti Administrasiyasının rəhbəri Ramiz Mehdiyevin başçılıq etdiyi nümayəndə heyəti Ankaradan İstanbula yola düşüb.

Paylaş:

Baxılıb: 1384 dəfə