Azərbaycan öz torpaqlarını işğaldan azad etməyə qadirdir

Bakı:

11 °C

87 %

7 m/s

Əlaqə

AZ RU EN

Ana səhifə / Gündəm / Azərbaycan öz torpaqlarını işğaldan azad etməyə qadirdir

Azərbaycan öz torpaqlarını işğaldan azad etməyə qadirdir

16.04.2010 [09:43]

Prezident İlham Əliyev: Biz imitasiya naminə danışıqlar aparmayacağıq
Ermənistanın Azərbaycana qarşı apardığı təcavüzkar siyasət nəticəsində, ölkə əhalisinin bir milyona yaxını qaçqın və məcburi köçkün düşüb, ərazilərimizin 20 faizi işğal altındadır. Artıq 20 ilə yaxındır davam edən təcavüzkar siyasətin nəticəsində, beynəlxalq hüquq normaları pozulub, BMT Təhlükəsizlik Şurasının Ermənistan-Azərbaycan, Dağlıq Qarabağ münaqişəsi ilə bağlı qəbul etdiyi qətnamələrə əməl edilməyib.
Hazırda Ermənistan-Azərbaycan, Dağlıq Qarabağ münaqişəsinin həlli istiqamətində həlledici mərhələyə qədəm qoyulub. İki il ərzində aparılan intensiv danışıqlar münaqişənin həllinə ümid yaradıb. Nazirlər Kabinetinin 2010-cu ilin birinci rübünün sosial-iqtisadi inkişafının yekunlarına həsr olunan iclasında Prezident İlham Əliyevin bildirdiyi kimi, münaqişə öz həllini ancaq beynəlxalq hüquq normaları əsasında tapa bilər. Bunun üçünsə, BMT Təhlükəsizlik Şurasının 4 qətnaməsi icra edilməli, işğalçı qüvvələr Azərbaycan torpaqlarından çıxarılmalıdır. Digər tərəfdən, Azərbaycan vətəndaşları - qaçqınlar, köçkünlər işğal edilmiş bütün ərazilərə, o cümlədən, Dağlıq Qarabağa qayıtmalıdırlar. Prezident İlham Əliyev bildirib ki, Dağlıq Qarabağın əldə edəcəyi hər hansı bir status ancaq və ancaq Azərbaycanın ərazi bütövlüyü çərçivəsində mümkündür.
Təəssüf ki, uzun illərdir davam edən bu prosesin konstruktiv yolla həllinə ən böyük maneə elə Ermənistan dövlətinin özü olub. Danışıqlar prosesində tutduğu qeyri-konstruktiv mövqedən əl çəkməyən rəsmi İrəvan bununla da problemin həllinin vaxtını uzadır. Azərbaycanın isə mövqeyi birmənalı və dəyişilməzdir. Prezident İlham Əliyev bildirib ki, artıq Ermənistan da öz mövqeyini bildirməlidir. Dövlət başçısı qarşı tərəfin səmimi olmadığını da vurğulayıb. Amma bu qeyri-səmimi durum uzana bilməz. Ermənistan məkrli, riyakar və yalançı siyasətinə son verməlidir: “Həm keçən ilin noyabr ayında Münxen şəhərində Ermənistan prezidenti ilə apardığım danışıqlarda və son dəfə Soçidə Rusiya Prezidenti Medvedevin təşəbbüsü ilə növbəti üçtərəfli görüş əsnasında Azərbaycan rəsmi şəkildə öz mövqeyini bildirib ki, prinsip etibarilə yenilənmiş Madrid prinsipləri üzərində verilən təklif bizim üçün məqbuldur, o təklifdə bizim üçün narahatedici məqamlar çox azlıq təşkil edir. Orada kiçik istisnalar etməklə o təklif əsas kimi götürülməlidir və bu təklifin əsasında sülh sazişi hazırlanmalıdır. Ancaq əfsuslar olsun ki, Ermənistan tərəfi bu günə qədər öz mövqeyini bildirməyib”.
Həqiqətən də, bu gün Dağlıq Qarabağ münaqişəsinin həli istiqamətində mühüm bir dövrə qədəm qoyulub. Artıq münaqişənin həlli ilə bağlı prosesin hansı istiqamətdə davam edəcəyinə Ermənistan qərar verməlidir. Prezident İlham Əliyevin də vurğuladığı kimi, ya təkliflər qəbul ediləcək və konkret saziş üzərində işlənəcək, ya da təklif qəbul edilməyəcək. Belə olan təqdirdə isə yaranan mənzərə imitativ xarakter daşıyacaq ki, bu da Azərbaycanın mənafeyinə uyğun deyil. Azərbaycan münaqişənin həllinə çalışır: “Mən müxtəlif dövrlərdə, müxtəlif mərhələlərdə demişəm ki, biz imitasiya naminə danışıqlar aparmayacağıq. O vaxta qədər aparacağıq ki, bizdə ümid var ki, onlardan bir nəticə çıxacaqdır. Əgər gördük ki, burada heç bir ümid yoxdur, onda danışıqlar dayanmalıdır və əlbəttə ki, bu prosesdə yeni mərhələ başlanacaqdır. O mərhələ nədən ibarət olacaq, bunu hələ ki, demək tezdir”.
Bəli, Cənubi Qafqaz regionunun lider dövləti olan Azərbaycanın istənilən ssenariyə hazır olduğu hər kəsə bəllidir. Bu gün həm Ermənistana, həm də ATƏT-in Minsk qrupunun həmsədr ölkələrinə bəllidir ki, Azərbaycan hərbi yolla öz torpaqlarını işğaldan azad etməyə qadirdir. Buna isə həm Azərbaycanın gücü, iqtisadiyyatı, həm siyasi durumu, həm də beynəlxalq hüquq imkan verir. Prezident İlham Əliyev də vurğulayıb ki, Ermənistan tərəfinin danışıqları pozması həmsədr ölkələrə bəllidir və bu ölkə ilə ciddi iş aparılmalıdır.
Dağlıq Qarabağ münaqişəsinin həlli bu gün regionun inkişafı baxımından da mühüm əhəmiyyətə malikdir. Prezident İlham Əliyevin də qeyd etdiyi kimi, Azərbaycan bütün hadisələrə öz milli maraqları çərçivəsində yanaşır və bəzi xarici güclərin Ermənistana yardım etmək üçün beynəlxalq hüquq normalarını pozduğu açıq-aydın ortadadır: “Əgər bizim maraqlarımız kənara qoyulursa, əgər torpaqlarımızın işğalına göz yumulursa və işğalçı dövləti çətin, ağır iqtisadi vəziyyətdən çıxarmaq üçün min bir səy göstərilirsə, Azərbaycan ictimaiyyəti bunu necə qəbul edə bilər?! Nə üçün işğalçı ölkəyə təzyiqlər göstərilmir?! Nə üçün Azərbaycan bugünkü danışıqlarda demək olar ki, ən böyük konstruktivlik nümayiş etdirir, Ermənistan danışıqları pozur?! Ermənistanı bu ağır vəziyyətdən çıxarmaq cəhdlərini biz görürük”.
Pərviz SADAYOÄžLU

Paylaş:

Baxılıb: 1154 dəfə