Bolqarıstan Azərbaycanın yaxın tərəfdaşına çevrilib

Bakı:

26 °C

54 %

3 m/s

Əlaqə

AZ RU EN

Ana səhifə / Gündəm / Bolqarıstan Azərbaycanın yaxın tərəfdaşına çevrilib

Bolqarıstan Azərbaycanın yaxın tərəfdaşına çevrilib

02.07.2010 [11:03]

Hər iki ölkənin dövlət başçılarının davamlı xarakter alan qarşılıqlı səfərləri əlaqələrin daha da dərinləşməsinə və dinamizminə əlverişli zəmin yaradıb
Son illər qarşılıqlı əlaqələri yüksək inkişaf mərhələsinə çatdıran Bolqarıstan və Azərbaycan hökumətləri əməkdaşlığın bütün spektrlərinin möhkəmlənməsinə dərin əsaslar yaradan siyasi iradə nümayiş etdirməkdədir. Hər iki ölkənin dövlət başçılarının davamlı xarakter alan qarşılıqlı səfərləri əlaqələrin daha da dərinləşməsinə və dinamizminə əlverişli zəmin yaradıb. Avropa İttifaqı (Aİ) çərçivəsində və ikitərəfli münasibətlər zəminində inkişaf etdirilən əlaqələr Bolqarıstanı Azərbaycanın yaxın tərəfdaşına çevirib.
Bolqarıstan respublikamızla yaxın dostluq və səmimi qardaşlıq münasibətlərinə malik olan ölkə kimi ikitərəfli əlaqələrin ən yüksək səviyyədə inkişaf etməsinə çalışır. Prezident Georgi Pırvanovun intensiv xarakter alan səfərləri isə yeni əməkdaşlıq sahələri üçün böyük imkanlar açır. Azərbaycan Prezidenti İlham Əliyevin bəyan etdiyi kimi, ölkələrimiz arasında siyasi əlaqələrin möhkəm olması müxtəlif sahələrdə əlaqələrin inkişafına güclü təkan verir. Bütün məsələlərdə bu dövlətlərin mövqeyi üst-üstə düşür. Birgə siyasi dialoq quran hər iki ölkə iqtisadi sahədə böyük potensiala malikdir və bu resurslardan faydalanmaq niyyətindədir. İqtisadiyyatın bir çox sahələri üzrə anlaşmanın əldə olunması qarşılıqlı investisiya layihələrinin həyata keçirilməsi, müştərək müəssisələrin yaradılması və birgə iqtisadi fəaliyyət bu əlaqələrin güclənməsi üçün perspektivlər açır.
Rəsmi Sofiya Azərbaycanın regionda strateji mövqeyinin möhkəmlənməsi və Avropanın enerji təhlükəsizliyinin təmin olunmasında aparıcı dövlətə çevrilməsini nəzərə alaraq təmasları intensivləşdirmək niyyətindədir. Bolqarıstan prezidenti Georgi Pırvanovun Azərbaycana səfəri zamanı Prezident İlham Əliyevlə müzakirə etdiyi əsas elementlər sırasında ölkələr arasında siyasi-iqtisadi əlaqələrin dərinləşməsi və Avropa İttifaqına sıx inteqrasiyanın daha da möhkəmlənməsi ilə bağlı məsələlər geniş müzakirə mövzusu olub. Dövlət başçılarının vurğuladıqları kimi, Bolqarıstan Azərbaycan ilə Avropa qurumları arasında əməkdaşlığın dərinləşməsi işində müsbət rol oynayır. Rəsmi Sofiya Avratlantika strukturlarına inteqrasiya prosesində ölkəmizə həmişə dəstək verib. Bolqarıstan, eyni zamanda, ölkəmizin ümumdünya Ticarət Təşkilatına qoşulmasını dəstəkləyir.
Bolqarıstan Azərbaycanın enerji resurslarının, xüsusilə, qaz ehtiyatlarının əldə olunması üçün hökumətlərarası sazişin imzalanmasını təklif edir. Respublikamız bu ölkəyə qaz ixracına başlamaq niyyətindədir, yaxın vaxtlarda yanacaq nəqli ilə bağlı sazişin detallarının hazırlanması nəzərdə tutulur. Onu da qeyd edək ki, ötən il Sofiyada Bolqarıstan ilə Azərbaycan arasında qaz sahəsində memorandum imzalanıb. ümumiyyətlə, hər iki ölkə enerji sahəsində sıx təmaslar qurmaq niyyətindədir.
Bölgədə yeni enerji dəhlizlərinin yaradılması və Azərbaycanın zəngin karbohidrogen ehtiyatlarının nəqlini nəzərdə tutan tranzit marşrutlarının istifadəyə verilməsi Bolqarıstanın enerji təhlükəsizliyi üçün xüsusi rol oynaya bilər. Belə ki, rəsmi Sofiya ən böyük regional enerji layihələrindən olan Xəzər dənizi-Qara dəniz-Baltik marşrutuna qoşulmaqla öz yanacaq ehtiyaclarını uzunmüddətli təmin etmək istəyir. Artıq “Bulqarqaz” şirkəti bu istiqamətdə öz səylərini intensivləşdirib. Eyni zamanda, bu ölkə Bakı-Tbilisi-Ərzurum kəmərinin davamı olan Türkiyə-Yunanıstan qaz kəməri ilə nəql olunan qazın alıcısı olmaq istəyir.
Dövlət başçısı İlham Əliyevin qeyd etdiyi kimi, Bolqarıstan ilə Azərbaycan arasında energetika sektorunda da çox uğurlu və uzunmüddətli əməkdaşlıq təmin ediləcək. Azərbaycanın müəllifi olduğu strateji enerji marşrutlarının rentabelli işi sayəsində region ölkələri arasında iqtisadi bağlantı daha da möhkəmlənəcək, bölgədə çoxşəbəkəli əməkdaşlıq, sülh, təhlükəsizlik dəhlizi yaradılacaq.
Hər iki ölkə iqtisadiyyatın müxtəlif sahələrində güclü əməkdaşlıq münasibətləri yaratmaq və birgə iqtisadi layihələrin reallaşmasına nail olmaq üçün də təşəbbüsləri artırıb. İqtisadi əməkdaşlıq üzrə hökumətlərarası komissiyanın iclaslarının və biznes-forumların keçirilməsi qarşılıqlı işgüzar münasibətlərin möhkəmlənməsinə zəmin yaradıb. Hər iki ölkənin sahibkarlarının birgə layihələrdə təmsil olunmaq niyyətləri, qarşılıqlı investisiyaların qoyuluşlarının artırılmasına dair təşəbbüsləri iqtisadi əməkdaşlıq üçün geniş imkanlar yaradır.
Elbrus CƏFƏRLİ

Paylaş:

Baxılıb: 1191 dəfə