Prezident İlham Əliyev paytaxtın Səbail rayonu ərazisində yeni piyada keçidlərinin açılışlarında iştirak edib

Bakı:

22 °C

78 %

3 m/s

AZ RU EN

Ana səhifə / Gündəm / Prezident İlham Əliyev paytaxtın Səbail rayonu ərazisində yeni piyada keçidlərinin açılışlarında iştirak edib

Prezident İlham Əliyev paytaxtın Səbail rayonu ərazisində yeni piyada keçidlərinin açılışlarında iştirak edib

29.12.2011 [18:56]

Azərbaycan Respublikasının Prezidenti İlham Əliyev və xanımı Mehriban Əliyeva dünən paytaxtın Səbail rayonu ərazisində yeni piyada keçidlərinin açılışlarında iştirak ediblər.
“Bakı şəhərində nəqliyyat sisteminin təkmilləşdirilməsi üzrə 2006-2007-ci illər üçün Tədbirlər Planı”, eləcə də “Bakı şəhərində nəqliyyat sisteminin təkmilləşdirilməsi üzrə 2008-2013-cü illər üçün əlavə Tədbirlər Planı”na uyğun olaraq paytaxtda yüksək tələblərə cavab verən yolötürücü, körpü, tunel, yeraltı və yerüstü piyada keçidlərinin inşası davam etdirilir, yüksək keyfiyyətli avtomobil yolları salınır.
Dövlətimizin başçısının tapşırığına uyğun olaraq yol-nəqliyyat sisteminin yenidən qurulması zamanı beynəlxalq standartlar və milli memarlıq ənənələri əsas götürülür. Bütün yeni qurğular yüksək keyfiyyəti və müasirliyi ilə seçilir. Bakı şəhərində yol-nəqliyyat sisteminin təkmilləşdirilməsi istiqamətində görülən işlər sakinlərin sosial həyat şəraitinin yaxşılaşdırılması ilə yanaşı, həm də paytaxtın gözəlliyini artırır.
Prezident İlham Əliyev və xanımı Mehriban Əliyeva əvvəlcə Neftçilər prospektində, Dəniz vağzalının önündə inşa edilən piyada keçidinin açılışında iştirak ediblər.
Piyada keçidinin göstəriciləri barədə dövlətimizin başçısına məlumat verilib.
Bildirilib ki, keçidin tunelinin uzunluğu 107, eni 8, hündürlüyü isə 3 metrdir, iki çıxışı var. çıxışlardan biri Milli park tərəfdə, digəri isə “Abşeron” mehmanxanasının önündədir. Keçiddə dörd eskalator və ilk dəfə olaraq bir əlil lifti quraşdırılıb. Qranit plitələrlə üzlənmiş keçidin pilləkənlərində sürüşkənliyi aradan qaldırmaq üçün xüsusi tədbirlər görülüb. Keçiddə müasir drenaj sistemi yaradılıb.
Dəniz vağzalının qarşısındakı piyada keçidi ilə tanışlıqdan sonra dövlətimizin başçısı və xanımı metronun “Sahil” stansiyasının yanındakı yeraltı piyada keçidinin açılışında iştirak ediblər.
Burada görülən işlərlə bağlı Prezidentə məlumat verilib. Bildirilib ki, tunelin uzunluğu 220, eni 8 metrdir. Yağış sularının dənizə axıdılması üçün xüsusi boru xətti çəkilib. Piyada keçidində ilk dəfə olaraq üfüqi eskalator quraşdırılıb. Səkkiz çıxışdan ibarət piyada keçidinin istifadəyə verilməsi ilə əhalinin təhlükəsiz hərəkəti üçün əlverişli şərait yaradılıb. Metronun “Sahil” stansiyasının yanındakı piyada keçidi ilə tanışlıqdan sonra Prezident İlham Əliyev və xanımı Mehriban Əliyeva paytaxtın Azneft meydanında inşa edilmiş üç yeraltı keçidin açılışında iştirak ediblər.
Burada görülən işlər barədə dövlətimizin başçısına məlumat verilib.
Bildirilib ki, buradakı tunellərdən birincisinin uzunluğu 104, eni 8, ikincisinin uzunluğu 58, eni 5, üçüncüsünün uzunluğu 76, eni isə 5 metrdir. Bu keçidlərdə də qranit plitələrlə üzlənib. Keçidlərdə müasir işıqlandırma sistemi quraşdırılıb.
Görülən işlərlə yaxından tanış olan dövlətimizin başçısı müvafiq tapşırıqlarını verib.
Prezident İlham Əliyev Azneft meydanında, Dövlət Neft Şirkətinin yaxınlığında daha bir yeraltı piyada keçidinin açılışında iştirak edib.
Burada görülən inşaat işləri barədə də dövlətimizin başçısına məlumat verilib. Bildirilib ki, tunelin uzunluğu 76, eni 6, hündürlüyü 3 metrdir. Keçidin iki çıxışı var. Onlardan biri Milli Parka, digəri isə Dövlət Neft Şirkətinin önünə çıxır. Dörd eskalatorun quraşdırıldığı keçid müasir işıqlandırma sistemi ilə təchiz edilib. Bu piyada keçidi də qranit plitələrlə üzlənib. Görülən işlərlə yaxından tanış olan dövlətimizin başçısı müvafiq tapşırıqlarını verib.

Paylaş:

Baxılıb: 1108 dəfə