“Tour d’Azerbaidjan-2014” veloyürüşü başa çatmaqda olan ilin ən uğurlu layihələrindən biri kimi dəyərləndirilir

Bakı:

23 °C

60 %

5 m/s

AZ RU EN

Ana səhifə / İdman / “Tour d’Azerbaidjan-2014” veloyürüşü başa çatmaqda olan ilin ən uğurlu layihələrindən biri kimi dəyərləndirilir

“Tour d’Azerbaidjan-2014” veloyürüşü başa çatmaqda olan ilin ən uğurlu layihələrindən biri kimi dəyərləndirilir

25.11.2014 [09:32]

Avropanın nüfuzlu idman kanalı “Eurosport” Beynəlxalq Velosipedçilər İttifaqının 2.1 kateqoriyalı “Tour d’Azerbaidjan-2014” beşgünlük veloyürüşü ilə bağlı statistik məlumatları açıqlayıb
Avropanın nüfuzlu idman kanalı “Eurosport” Beynəlxalq Velosipedçilər İttifaqının 2.1 kateqoriyalı “Tour d’Azerbaidjan-2014” beşgünlük veloyürüşü ilə bağlı statistik məlumatları açıqlayıb. Xatırladaq ki, Bakı və Sumqayıt şəhərlərinin, həmçinin Abşeron, Qobustan, Şamaxı, Ağsu, İsmayıllı, Qəbələ, Oğuz və Şəki rayonlarının ərazilərindən keçməklə təşkil olunmuş bu yarışın ilk 4 mərhələsi “Eurosport” kanalı vasitəsilə 30 dəqiqəlik icmal şəklində, sonuncu, Bakı mərhələsi isə canlı olaraq yayımlanıb və 28,6 milyondan çox tamaşaçı yarışa təkcə bu kanal vasitəsilə tamaşa edib. 830 mindən çox tamaşaçı isə canlı olaraq yayımlanan sonuncu mərhələni izləyib. Ümumilikdə isə Avropa Yayım İttifaqına üzv olan 56 ölkənin 72 telekanalında “Tour d’Azerbaidjan-2014”lə bağlı müxtəlif tipli süjetlər efirə verilib.
Müqayisə üçün deyək ki, 2013-cü ildə “Eurosport” kanalının nümayiş etdirdiyi nüfuzlu velosiped turları içərisində 100 ildən çox keçirilən “Tour de France” yarışına 51 milyon, “Girod’İtalia”ya 32 milyon, “Vuelta”ya isə 30 milyon tamaşaçı baxıb. Maraqlıdır ki, “Tour d’Azerbaidjan-2014” toplaya bildiyi tamaşaçı sayına görə uzun illərdir keçirilən “GriteriumduDauphine” (14 milyon), “Paris-Nice” (12 milyon), “Paris- Roubaix” (7 milyon), “Milan-San Remo” (4 milyon) kimi tanınmış veloturları da qabaqlaya bilib.
Ümumilikdə, “Eurosport” kanalına baxan 106,5 milyon tamaşaçı “Tour d’Azerbaidjan-2014” veloyürüşü ilə bağlı bu kanalda gedən anonslar, yayımlar və süjetlər vasitəsilə yarışla bağlı məlumatlar alıb. Onu da qeyd edək ki, 14 aprel-11 may tarixlərində “Eurosport” və “Eurosport-2” kanallarında yarışla bağlı 30 saniyəlik videorolik 500 dəfə nümayiş etdirilib.
Asiya və Okeaniya ölkələrində də “Tour d’Azerbaidjan-2014” kifayət qədər maraqla qarşılanıb. 16 ölkənin yer aldığı bu siyahıda ilk yerdə Avstraliya durur. Honqkonq, İndoneziya, Cənubi Koreya, Malayziya, Tayland, Filippin və Monqolustanın da daxil olduğu bu ölkələrdə yarış 9,6 milyon tamaşaçı toplayıb.
“Eurosport” kanalının rəsmi internet səhifəsində isə yarışla bağlı məlumatları izləyənlərin sayı 15 milyonu keçib. Bu siyahıda ilk dördlük belədir:1. Böyük Britaniya-3 688 403; 2. Rusiya-2 818 894; 3. Almaniya-2 231 828; 4. İtaliya - 2 194 301.
“Tour d’Azerbaidjan-2014”lə bağlı videomateriallar dünyada çox məşhur olan www.cycling.tv saytına da yerləşdirilib və istənilən şəxs bu yarışa yenidən baxa bilər. Onu da qeyd etmək yerinə düşər ki, adıçəkilən saytın arxiv bölümünə yalnız baxılma reytinqi yüksək olan yarışlar yerləşdirilir.
“Tour d’Azerbaidjan-2014” başa çatdıqdan sonra “Eurosport” kanalında yarışla bağlı 2 süjet də efirə verilib. 5 dəqiqəlik bu süjetlər 903 000 tamaşaçı toplayaraq baxılma sayına görə kifayət qədər yüksək reytinqli sayılıb.
Beləliklə, “Eurosport” kanalı Beynəlxalq Velosipedçilər İttifaqının 2.1 kateqoriyalı “Tour d’Azerbaidjan-2014” veloyürüşünü başa çatmaqda olan ilin ən uğurlu layihələrindən biri kimi dəyərləndirir və konkret rəqəmlər də yarışa olan böyük marağın təzahürüdür. Təbiidir ki, bütün bunlar ilk növbədə artıq bir idman ölkəsi kimi dünya ictimaiyyətinin diqqətini özünə cəlb edə bilmiş, iqtisadiyyatı sürətlə inkişaf edən, siyasi sabitlik və tolerantlıq nümunəsi kimi qəbul olunan müstəqil Azərbaycan Respublikasının əldə etdiyi uğurların, tarixdə ilk Avropa oyunlarını keçirmək kimi möhtəşəm və məsuliyyətli işi öz üzərinə götürmüş ölkəmizə olan marağın göstəricisidir.
NADİR

Paylaş:

Baxılıb: 1463 dəfə