Rioda Azərbaycan paraolimpiyaçılarının medal sayı 9-a çatdı

Bakı:

20 °C

60 %

2 m/s

Əlaqə

AZ RU EN

Ana səhifə / İdman / Rioda Azərbaycan paraolimpiyaçılarının medal sayı 9-a çatdı

Rioda Azərbaycan paraolimpiyaçılarının medal sayı 9-a çatdı

16.09.2016 [13:42]

Braziliyanın Rio-de-Janeyro şəhərində keçirilən XV Yay Paraolimpiya Oyunlarında Azərbaycan idmançıları uğurlu çıxışlarını davam etdirirlər. Paraolimpiyaçılarımız yarışların başa çatmasına 5 gün qalmış komanda hesabına artıq 9 medal toplaya biliblər. Qarşıdakı günlərdə də idmançılarımızın daha bir neçə medal qazanmaq şansı çox yüksəkdir. Bu isə o deməkdir ki, paraolimpiyaçılarımız ən azından Londondakı nəticəni təkrarlaya biləcəklər.
Qeyd edək ki, sentyabrın 8-də möhtəşəm “Marakana” stadionunda startı verilən XV Yay Paraolimpiya Oyunlarında paraolimpiyaçılar idmanın 22 növü üzrə 528 dəst medal uğrunda yarışırlar. Ümumilikdə götürdükdə isə Paraolimpiadada 4350 idmançı medallar uğrunda mübarizə aparır.
Xatırlatmaq yerinə düşər ki, bu, “London-2012” Yay Paraolimpiya Oyunları ilə müqayisədə 25 dəst çox deməkdir. Bundan əlavə, medal sayının artırılması yarışlarda qadın idmançıların geniş heyətlə çıxışı ilə əlaqədardır. Belə ki, Paraolimpiadada iştirak edən 4350 idmançıdan 1650-si qadındır. Bu, “London-2012”dən 9,9 faiz, “Atlanta-1996”dan isə iki dəfə çoxdur. Qadınlar 224 dəst medal uğrunda yarışacaqlar. Bu isə medalların 43 faizini təşkil edir.
Azərbaycan XV Yay Paraolimpiya Oyunlarında 24 idmançı ilə təmsil olunur. İdmançılarımız cüdo, atletika, pauerliftinq, üzgüçülük, güllə atıcılığı və kamandan oxatma yarışlarında mübarizə aparırlar. Sentyabrın 15-dək keçirilən yarışlarda paraolimpiyaçılarımızdan Ramil Qasımov (cüdo, 73 kq) çempion adını qazanıb. Yelena Çebanu (atletika, 100 m, uzunluğa tullanma), Bayram Mustafayev (cüdo, 66 kq), Kamil Əliyev (uzunluğa tullanma), Raman Saleh (üzgüçülük, arxasıüstə 100 m), Dmitri Saleh (uzgüçülük, 100 metr - brass) ikinci, Yelena Çebanu (atletika, 200 m), Rövşən Səfərov (cüdo, 81 kq) isə üçüncü yeri tutub. Bununla da Azərbaycan idmançılarının ölkəmizə qazandırdıqları medalların sayı 9-a (1 qızıl, 6 gümüş və 2 bürünc) çatıb və yığmamız komanda hesabında 38-ci yerdə qərarlaşıb.
Təəssüf hissi ilə qeyd etmək lazımdır ki, ikiqat Paraolimpiya çempionu, “Bakı-2015” ilk Avropa Oyunlarının qalibi, Azərbaycan milli paraolimpiya komandasının bayraqdarı İlham Zəkiyev Braziliyada fəxri kürsüyə çıxa bilməyib.
Xatırladaq ki, 2012-ci ildə Londonda keçirilən Paraolimpiya Oyunlarında milli komandamız 21 idmançı ilə təmsil olunmuşdu. Yarışlarda idmançılarımız 12 medal qazanmışdılar. Bunlardan 4-ü qızıl, 5-i gümüş, 3-ü isə bürünc olmuşdu. Komanda hesabında idmançılarımız 27-ci yerə çıxmışdılar.
Yeri gəlmişkən, ötən ay Rioda keçirilən XXXI Yay Olimpiya Oyunlarında Azərbaycan idmançıları rekord sayda - 18 medal (1 qızıl, 7 gümüş və 10 bürünc) qazanaraq ölkəmizin Olimpiya hərəkatında tarix yazdılar. Əminliklə söyləmək olar ki, paraolimpiyaçılarımız da onların bu tarixi nailiyyətlərindən ruhlanaraq, qarşıdakı günlərdə də əzmlə mübarizə aparacaq, ölkəmizə rekord sayda medallarla dönəcəklər, Azərbaycanın Paraolimpiya hərəkatı tarixinə yeni parlaq səhifə yazmış olacaqlar.
Səlim LOĞMANOĞLU

Paylaş:

Baxılıb: 1263 dəfə