Dövlət Təhlükəsizliyi Xidmətinin əməkdaşı “K-1 full kontakt” döyüş növü üzrə dünya çempionu olub

Bakı:

31 °C

45 %

7 m/s

Əlaqə

AZ RU EN

Ana səhifə / İdman / Dövlət Təhlükəsizliyi Xidmətinin əməkdaşı “K-1 full kontakt” döyüş növü üzrə dünya çempionu olub

Dövlət Təhlükəsizliyi Xidmətinin əməkdaşı “K-1 full kontakt” döyüş növü üzrə dünya çempionu olub

12.12.2017 [09:54]

Azərbaycanda idmanın hərtərəfli inkişafı dövlət siyasətinin prioritet istiqamətlərindən biridir. Ümummilli lider Heydər Əliyev daim idmana böyük önəm verirdi. Dahi rəhbər deyirdi ki, idman ölkəni dünyaya tanıtmağın ən təsirli vasitəsidir və bu mənada onun yerini heç nə verə bilməz.
Ulu öndər Heydər Əliyev tərəfindən əsası qoyulmuş, Prezident İlham Əliyevin müdrik rəhbərliyi ilə həyata keçirilən uğurlu strategiya nəticəsində sürətlə inkişaf edən və qüdrətlənən ölkəmizdə idman sahəsinə göstərilən diqqət və qayğı sayəsində Azərbaycanın idman şöhrəti dünyanın hər tərəfinə yayılıb. Respublikanın idman uğurlarının əldə edilməsinə Azərbaycanın Birinci vitse-prezidenti xanım Mehriban Əliyevanın misilsiz xidmətləri xalqımız tərəfindən rəğbətlə qarşılanır.
Azərbaycan öz idmançılarının uğurları ilə fəxr edir. Əlbəttə ki, bütün bu uğurların təməlində Vətən sevgisi durur və idman qələbələrinə də aparan başlıca amil budur. Hər dəfə şahidi oluruq ki, bu uğurların əldə edilməsində Azərbaycan vətəndaşı, xalqı və cəmiyyəti birdir, həmrəydir.
Dövlət Təhlükəsizliyi Xidməti (DTX) də digər dövlət orqanları ilə yanaşı, bu işlərə öz əməli töhfələrini verməkdədir. Prezident İlham Əliyevin diqqət və qayğısı sayəsində DTX-nin maddi-texniki və təlim-tədris bazasının möhkəmləndirilməsi, şəxsi heyətin sosial müdafiəsinin gücləndirilməsi və iş şəraitinin yaxşılaşdırılması ilə bərabər, əməkdaşların əməliyyat-döyüş və fiziki hazırlığının artırılmasına da xüsusi diqqət yetirilir. DTX-də şəxsi heyətin idmanla məşğul olması, fiziki sağlamlığının möhkəmləndirilməsi üçün hər cür şərait yaradılıb. DTX-nin əməkdaşları idmanın müxtəlif növləri üzrə dünya, Avropa çempionatları və digər mötəbər beynəlxalq əhəmiyyətli turnir və yarışlarda uğurlar əldə edərək Azərbaycanın bayrağını yüksəklərə qaldırırlar.
DTX-nin ictimai əlaqələr şöbəsindən AZƏRTAC-a bildiriblər ki, növbəti belə qələbələrdən biri də dekabrın 8-10-da İtaliyanın Florensiya şəhərində keçirilən və 35 ölkənin təcrübəli idmançılarının mübarizə apardıqları “K-1 full kontakt” döyüş növü üzrə dünya birinciliyində qazanılıb.
Xidmətin əməkdaşı Ziya Bayramov çətin yarışlarda məharətlə mübarizə apararaq rəqiblərini məğlub edərək dünya çempionu adına layiq görülüb.
İnanırıq ki, bu gün hər sahədə uğurlara doğru cəsarətlə və qətiyyətlə addımlayan Azərbaycanın bütün idmançıları, o cümlədən DTX-nin əməkdaşları olan idmançılarımız bundan sonra da yüksək nəticələr əldə edərək ölkəmizin idman nüfuzunun artmasına öz layiqli töhfələrini verəcəklər.

Paylaş:

Baxılıb: 1244 dəfə