Rumıniya mətbuatı: Avropanın qaz tədarükündə Azərbaycanın rolu danılmazdır

Bakı:

24 °C

70 %

13 m/s

Əlaqə

AZ RU EN

Ana səhifə / İqtisadiyyat / Rumıniya mətbuatı: Avropanın qaz tədarükündə Azərbaycanın rolu danılmazdır

Rumıniya mətbuatı: Avropanın qaz tədarükündə Azərbaycanın rolu danılmazdır

21.01.2026 [19:52]

Rumıniyanın aparıcı xəbər portallarından biri olan “HotNews.ro”da dərc edilmiş analitik məqalədə Avropa enerji gündəmində diqqət çəkən bir ziddiyyət ön plana çıxarılır. Məqalənin müəllifi, iqtisadi mövzular üzrə ixtisaslaşmış rumıniyalı jurnalist Florentina Çernat bu paradoksu regional enerji axınları və qonşu ölkələrlə əməkdaşlıq kontekstində təhlil edir.

AZƏRTAC xəbər verir ki, yazıda Rumıniyanın daxili qaz hasilatına görə Aİ-də lider mövqedə qərarlaşsa da, soyuq mövsümdə istehlakın kəskin artmasının ölkənin qaz balansında ciddi gərginlik yaratdığı qeyd olunur. Bu vəziyyət təkcə hasilat həcmləri ilə deyil, eyni zamanda, qaz anbarlarının texniki çıxarma gücü, infrastruktur məhdudiyyətləri və bazar mexanizmləri ilə izah edilir. Nəticədə Rumıniya qış aylarının pik dövrlərində xarici mənbələrdən qaz idxalına məcbur qalır.

Analitik təhlildə regional əməkdaşlıq amili xüsusi yer tutur. Qeyd olunur ki, qonşu ölkələrlə mövcud interkonnektorlar Rumıniyanın qısamüddətli qaz ehtiyaclarının ödənilməsində mühüm rol oynayır. Bu isə enerji təhlükəsizliyinin artıq yalnız milli çərçivədə deyil, regional və Avropa miqyasında koordinasiya tələb etdiyini göstərir.

Məqalədə Azərbaycanın enerji amili xüsusi vurğulanır. Bildirilir ki, Xəzər regionunun aparıcı qaz ixracatçısı olan Azərbaycan son illər Avropanın enerji təhlükəsizliyində mühüm rol oynayan tərəfdaşlardan birinə çevrilib. Cənub Qaz Dəhlizi vasitəsilə Avropa bazarlarına çıxarılan Azərbaycan qazı Rumıniya da daxil olmaqla bir sıra ölkələr üçün alternativ və etibarlı təchizat mənbəyi kimi dəyərləndirilir. Florentina Çernatın təhlilinə görə, Rumıniyanın mövsümi asılılıq probleminin azaldılması üçün məhz mənbələrin şaxələndirilməsi, o cümlədən Azərbaycan qazının Avropa bazarındakı payının artması əsas istiqamətlərdən biridir.

Vurğulanır ki, mövcud vəziyyət Rumıniya üçün strateji seçimləri aktuallaşdırır. Ölkə bir tərəfdən daxili hasilatı və Qara dəniz layihələrini sürətləndirməli, digər tərəfdən isə regional və beynəlxalq enerji tərəfdaşlıqlarını dərinləşdirməlidir. Bu kontekstdə Azərbaycanla enerji əməkdaşlığı təkcə iqtisadi deyil, uzunmüddətli enerji təhlükəsizliyi baxımından da əhəmiyyətli faktor kimi qiymətləndirilir.

Məqalədə bildirilir ki, Rumıniyada baş verən bu qaz paradoksu Avropanın ümumi enerji mənzərəsinin ayrılmaz hissəsidir. Bu mənzərədə Azərbaycan faktoru getdikcə daha qabarıq şəkildə önə çıxır və Avropanın qış aylarında enerji dayanıqlığının təmin olunmasında mühüm strateji rol oynayır.

Paylaş:

Baxılıb: 491 dəfə