Azərbaycanın “Azerspace-2” ikinci telekommunikasiya peyki layihəsi üzərində işlərə başlanılır

Bakı:

13 °C

76 %

3 m/s

AZ RU EN

Ana səhifə / İqtisadiyyat / Azərbaycanın “Azerspace-2” ikinci telekommunikasiya peyki layihəsi üzərində işlərə başlanılır

Azərbaycanın “Azerspace-2” ikinci telekommunikasiya peyki layihəsi üzərində işlərə başlanılır

08.02.2014 [15:43]

Azərbaycanın ilk “Azerspace-1” telekommunikasiya peyki 2013-cü il fevralın 8-də Fransız Qvianasındakı Kosmik Mərkəzində Kuru kosmodromundan orbitə buraxılıb.
“Azerspace-1” peyki 46 dərəcə şərq uzunluğu geostasionar orbitə çatdırılıb və ən azı 15 illik istismar müddətində Avropa, Afrika, Mərkəzi Asiya, Qafqaz ölkələri və Yaxın Şərq regionuna yüksək keyfiyyətli yayım və telekommunikasiya xidmətləri göstərəcək.
Azərbaycan Prezidenti İlham Əliyev bu hadisəni xalqımızın, dövlətimizin böyük tarixi nailiyyəti adlandırıb. Dövlətimizin başçısı deyib: “Bu, doğrudan da tarixi bir gündür, böyük nailiyyətdir, dövlətimizin böyük qələbəsidir. Bu hadisə onu göstərir ki, müstəqil Azərbaycan dövləti sürətlə, hərtərəfli inkişaf edir və biz artıq kosmik klubun üzvüyük”.
“Azərspace-1” telekommunikasiya peyki ötən ilin iyul ayından kommersiya fəaliyyətinə başlayıb. Peyk üzərindən 60-dan çox yerli və xarici teleradio kanalının yayımı, eləcə də digər müştərilər üçün müxtəlif rabitə kanallarının və platformalarının təşkili həyata keçirilir. Peykin fəaliyyəti nəticəsində altı ay ərzində təxminən 10 milyon ABŞ dolları məbləğində xidmətlər ixrac edilib və bu vəsait “Azərkosmos ASC” tərəfindən kredit borclarının ödənilməsinə yönəlib. Peyklərin Azərbaycandan idarə olunması məqsədi ilə Əsas və Ehtiyat Yerüstü Peyk İdarəetmə Mərkəzləri yaradılıb. Azərbaycanın ilk peyki də həmin mərkəzlərdən yerli mütəxəssislər tərəfindən uğurla idarə olunur. 2016-cı ildə fəzaya buraxılması planlaşdırılan Yer səthinin məsafədən müşahidəsi peykinin layihə sənədləri üzrə hazırlıq işləri başa çatmaqdadır. Müşahidə peykinin ən yeni texnoloji göstəricilər əsasında hazırlanması nəzərdə tutulub. Azərbaycanın ikinci telekommunikasiya peykinin isə 2017-ci ildə orbitə çıxarılması planlaşdırılır.
Azərbaycanda yüksək texnologiyaların tətbiqinə və ölkədə kosmik sənayenin yaradılmasına böyük diqqət göstərilir. Prezident İlham Əliyevin rəhbərliyi altında Azərbaycanda informasiya-kommunikasiya texnologiyalarının tətbiqinin prioritet elan olunması, 2013-cü ilin ölkədə “İnformasiya-kommunikasiya texnologiyaları ili” elan edilməsi bu sahənin inkişafına dövlət səviyyəsində göstərilən diqqətin əyani təsdiqidir.
Dövlətimizin başçısının imzaladığı “Azərbaycan Respublikasında kosmik sənayenin yaradılması və telekommunikasiya peyklərinin orbitə çıxarılması haqqında” Sərəncamı və təsdiq etdiyi “Azərbaycan Respublikasında kosmik sənayenin yaradılması və inkişafı üzrə Dövlət Proqramı” Azərbaycanın beynəlxalq kosmik klubun üzvünə çevrilməsi, ölkədə peyk texnologiyalarının yayılması və tətbiqi üçün geniş imkanlar açıb.
Bunun ardınca Prezident İlham Əliyev 2010-cu ildə “Azərkosmos” Açıq Səhmdar Cəmiyyətinin təsis edilməsi haqqında” Sərəncam imzalayıb və həmin quruma telekommunikasiya peykinin istehsalı və orbitə çıxarılması, Əsas və Ehtiyat Yerüstü Peyk İdarəetmə Mərkəzlərinin yaradılması ilə bağlı xüsusi tapşırıq verilib.

Paylaş:

Baxılıb: 1331 dəfə