“Azərsu” ASC kadr potensialının gücləndirilməsi istiqamətində tədbirləri davam etdirir

Bakı:

21 °C

83 %

2 m/s

Əlaqə

AZ RU EN

Ana səhifə / İqtisadiyyat / “Azərsu” ASC kadr potensialının gücləndirilməsi istiqamətində tədbirləri davam etdirir

“Azərsu” ASC kadr potensialının gücləndirilməsi istiqamətində tədbirləri davam etdirir

12.03.2014 [09:37]

Qorxmaz Hüseynov: Son 2 ildə keçirilmiş 75 təlimə Səhmdar Cəmiyyətin 1600-ə yaxın işçisi cəlb olunub
“Azərsu” Açıq Səhmdar Cəmiyyəti (ASC) kadr potensialının gücləndirilməsi, işçilərin peşə hazırlığının artırılması istiqamətində tədbirləri davam etdirir. Bu barədə “Azərsu” ASC-nin Mətbuat xidməti və ictimaiyyətlə əlaqələr şöbəsindən məlumat verilib.
Məlumatda deyilir ki, “Azərsu” ASC-nin Türkiyənin Gedik Universiteti və UGETAM şirkəti ilə əməkdaşlığı çərçivəsində mart ayının 11-də “İnfrastrukturun yenilənməsi və keyfiyyət anlayışı” mövzusunda növbəti təlimə start verilib. Bu məqsədlə Türkiyənin bir sıra təhsil və sənaye müəssisələrinin mütəxəssislərindən ibarət nümayəndə heyəti ölkəmizə gəlib.
Təlim proqramının açılış mərasimində çıxış edən “Azərsu” ASC-nin sədri Qorxmaz Hüseynov layihələrin keyfiyyətlə icra olunmasında, eləcə də, infrastrukturun idarəedilməsində yeni texnologiyaların tətbiqinə ciddi diqqət yetirildiyini bildirib.
Qeyd olunub ki, bu sahədə qabaqcıl təcrübənin mənimsənilməsi və tətbiqi məqsədi ilə müxtəlif ölkələrin, o cümlədən, Türkiyənin şirkətləri ilə sıx əməkdaşlıq edilir. Bütün bunlar nəzərə alınaraq “Azərsu” ASC-nin mütəxəssisləri ölkə daxilində və xaricdə təşkil olunan təlimlərə cəlb edilirlər. Son 2 ildə keçirilmiş 75 təlimə Səhmdar Cəmiyyətin 1600-ə yaxın işçisi cəlb olunub.
Mütəxəssislərin 240 nəfəri Türkiyə Su İnstitutu, İstanbul şəhər Sukanal İdarəsi, 12 rəhbər işçi isə İzmit Sukanal İdarəsində istehsalat sahələri ilə tanış olmaq imkanı əldə ediblər. Təlimlərdə layihələndirmə, tikinti, mexanika, energetika, avtomatika, içməli su və çirkab sutəmizləyici qurğuların istismarı, abonent işləri, informasiya-kommunikasiya texnologiyaları, tikinti və digər sahələr üzrə mütəxəssislər iştirak edib, böyük təcrübə qazanıblar. “Azərsu” ASC-nin sədri belə tədbirlərin təşkilinin əhəmiyyətli olduğunu və təlimlərin gələcəkdə də davam etdirilməsinin vacibliyini bildirib.
Təlim keçmək üçün dəvət olunmuş Türkiyənin Gedik Holdinq şirkətinin rəhbəri Mustafa Koçak, Türkiyə Respublikasının ölkəmizdəki səfirinin müşaviri Meral Barlas, Gedik Universitetinin müəllimi, sabiq səfir Erkan Gezer, UGETAM şirkətinin idarə heyətinin rəhbəri Ümit Doğay Arınç çıxış edərək təlimlərin əhəmiyyətini vurğulayıb, bu sahədə Azərbaycan şirkətlərinə kömək etməkdə maraqlı olduqlarını bildiriblər.
4 gün davam edəcək tədbir çərçivəsində “Azərsu” ASC-nin əməkdaşlarına, həmçinin, su və kanalizasiya layihələrini icra edən podratçı şirkətlərin mütəxəssislərinə qaynaq texnologiyaları, içməli suyun təmizlənməsi və nəqli, tullantı sularının zərərsizləşdirilməsi, sayğaclaşma və digər məsələlərlə bağlı təlimlər veriləcək.
NADİR

Paylaş:

Baxılıb: 1473 dəfə