Daşkəsəndə 2014-cü ilin I rübü uğurlu nəticələrlə yadda qalıb

Bakı:

21 °C

83 %

2 m/s

Əlaqə

AZ RU EN

Ana səhifə / İqtisadiyyat / Daşkəsəndə 2014-cü ilin I rübü uğurlu nəticələrlə yadda qalıb

Daşkəsəndə 2014-cü ilin I rübü uğurlu nəticələrlə yadda qalıb

18.04.2014 [10:31]

Dünən Daşkəsən rayonunda 2014-cü ilin I rübünün sosial-iqtisadi inkişafının yekunları və qarşıda duran vəzifələrə həsr olunmuş ümumrayon yığıncağı keçirilib. Daşkəsən rayon İcra Hakimiyyətinin başçısı Əhəd Abıyev yığıncağı giriş sözü ilə açaraq deyib ki, cari ilin birinci rübü Azərbaycan iqtisadiyyatında çox uğurlu və yadda qalan olub. Keçən ilin yekunları bu ilin inkişafına möhkəm zəmin yaradıb. Respublikamızın digər rayonlarında olduğu kimi, Daşkəsən rayonunda da 2014-cü ilin birinci rübündə bir çox nailiyyətlərin qazanıldığını söyləyən Ə.Abıyev qeyd edib ki, rayonda iqtisadiyyatın əsas sahələrində istehsal olunmuş məhsul və xidmətlərin ümumi həcmi əvvəlki ilə nisbətən xeyli artıb.
O, deyib ki, Prezident İlham Əliyevin diqqət və qayğısı sayəsində Azərbaycanın təbii sərvətlərlə zəngin sənaye rayonu olan Daşkəsən 2014-cü ildə özünün ən sürətli inkişaf dövrünü yaşayacaq: “Rayonumuzun hərtərəfli inkişafı üçün layihələrin, proqramların həyata keçirilməsi istiqamətində işlər aparılır. 2014-cü ilin birinci rübü ərzində rayon ərazisində bir sıra tikinti, təmir-bərpa, yenidənqurma, abadlıq-quruculuq işləri görülmüşdür və hazırda da həmin işlər davam etdirilməkdədir. Cari ilin keçən dövrü ərzində Statistika idarəsinin yeni müasir inzibati binası istifadəyə verilmişdir. Alunitdağ qəsəbə və Kəmərqaya kənd tam orta məktəb binalarının və Quşçu kənd uşaq bağçasının təmir işlərinə başlanılmış və hazırda bu işlər davam etdirilir. Ötən il rayonun tarixində görünməmiş sayda - 7 məktəb tikilib istifadəyə verilmişdir. Bu il isə 16 məktəbin tikintisi və əsaslı təmiri nəzərdə tutulmuşdur. Çovdar qızıl zavodunun tikintisi davam etdirilmiş, hazırda zavodda son tamamlanma işləri aparılır. Yatağın tam istifadəyə verilməsi burada 300 nəfər əhalinin işlə təmin olunmağına imkan yaradacaqdır. Daşkəsən rayonunda gənclər üçün yeni müasir tipli təlim və istirahət mərkəzinin tikintisi başa çatdırılmışdır. Quşçu qəsəbəsində 16 mənzilli yeni yaşayış binasının tikintisinə başlanılmış və hazırda tikinti işləri davam etdirilir. 2013-cü ildə Daşkəsən rayonunda İcra Hakimiyyəti üçün yeni müasir tipli inzibati binanın tikintisinə başlanılmış, tezliklə son tamamlama işləri yerinə yetirilərək bu binanın möhtəşəm bir açılışı olacaqdır. Daşkəsən şəhərində yeni avtovağzal kompleksinin tikintisinə başlanmış və tikinti işləri başa çatmaq üzrədir. Daşkəsən şəhərində avtovağzalla bağlı mövcud olan avtobus marşrutları, rayonun kəndlərində yeni yolların salınması vacibliyi, respublikanın qonşu rayonlarına əlaqə imkanı nəzərə alınaraq, yeni yaradılacaq avtovağzalın istifadəyə verilməsi ilə əlaqədar Daşkəsən-Bakı, Daşkəsən-Sumqayıt, Daşkəsən-Lənkəran, Daşkəsən-Qazax və Daşkəsən-Gəncə avtobus marşrutlarının müasir nəqliyyat vasitələrinin işlənməsi üçün razılıq alınmış, aidiyyəti üzrə nazirliklərə göstəriş verilmişdir. Şəhərin küçələrindəki istinad divarlarında, səkilərdə təmir işləri aparılmış və hazırda həmin işlər davam etdirilir”.
Daşkəsən rayon İcra Hakimiyyətinin başçısı daha sonra rayonda qeydə alınmış digər sosial - iqtisadi göstəricilər haqqında məlumat verib.
Toplantıda, həmçinin, Daşkəsən rayonu üzrə Maliyyə idarəsinin rəisi Natiq Zeynalov, rayon Təhsil şöbəsinin müdiri Nazim Verdiyev, RİHB-nin Daşkəsən şəhər İƏDÜN-si Nüsrət Vəliyev çıxış edərək müvafiq sahələr üzrə əldə olunmuş göstəriciləri diqqətə çatdırıblar.

Paylaş:

Baxılıb: 1392 dəfə