“Azərbaycanın rabitə və yüksək texnologiyalar sektorunda yaradılmış işgüzar mühit” mövzusunda konfrans

Bakı:

25 °C

53 %

6 m/s

AZ RU EN

Ana səhifə / İqtisadiyyat / “Azərbaycanın rabitə və yüksək texnologiyalar sektorunda yaradılmış işgüzar mühit” mövzusunda konfrans

“Azərbaycanın rabitə və yüksək texnologiyalar sektorunda yaradılmış işgüzar mühit” mövzusunda konfrans

04.09.2014 [09:26]

Azərbaycan-Amerika Ticarət Palatasının (“AmCham”) təşkilatçılığı ilə sentyabrın 3-də Bakıda ənənəvi informasiya-kommunikasiya texnologiyaları (İKT) konfransı keçirilib.
AzərTAc xəbər verir ki, “Azərbaycanda rabitə və yüksək texnologiyalar sektoru üzrə yaradılmış işgüzar mühit” mövzusuna həsr olunmuş tədbirdə Rabitə və Yüksək Texnologiyalar və Vergilər nazirliklərinin, Mərkəzi Bankın, özəl sektorun nümayəndələri iştirak ediblər.
Tədbirdə çıxış edən “AmCham”ın icraçı direktoru vəzifəsini müvəqqəti icra edən Fərid İsmayılzadə təmsil etdiyi qurumun Azərbaycanda informasiya-kommunikasiya texnologiyaları (İKT) sektorunun inkişafına daim dəstək olduğunu bildirib.
Qeyd olunub ki, “AmCham” Azərbaycanın biznes maraqlarını dəstəkləyən və təşviq edən aparıcı biznes assosiasiyasıdır. Şirkət Azərbaycanda xarici investisiyaların 80 faizini, eləcə də yerli sərmayələrin əhəmiyyətli hissəsini təmsil edir.
Konfransın gündəliyi barədə məlumat verən F.İsmayılzadə bildirib ki, iştirakçılara İKT sahəsi üzrə digər ölkələrin təcrübələri ilə tanış olmaq, geniş fikir mübadiləsi aparmaq imkanı yaradılacaq.
Rabitə və yüksək texnologiyalar naziri Əli Abbasov tədbirin əhəmiyyətini qeyd edərək bildirib ki, konfransın məqsədi Azərbaycan hökumətinin yüksək texnologiyalar sahəsində həyata keçirdiyi işlərə töhfə vermək və özəl sektorla hökumət nümayəndələri arasında qarşılıqlı işgüzar əlaqələri genişləndirməkdir.
Nazir Azərbaycanda yüksək texnologiyalar sahəsinin inkişafı üzrə həyata keçirilən islahatlardan, İKT sektorunda əldə olunan nailiyyətlərdən danışaraq qeyd edib ki, BMT-nin “Elektron hökumət”in inkişaf səviyyəsinə görə yeni reytinqinin nəticələrinə görə, dünya siyahısında Azərbaycan 68-ci yeri tutaraq, əvvəlki reytinqlə müqayisədə 28 pillə irəliləyib.
Ölkəmizdə İKT sahəsində tətbiq olunan layihələr barədə məlumat verən nazir diqqətə çatdırıb ki, “Azərbaycan -2020: gələcəyə baxış” İnkişaf Konsepsiyasında iqtisadi potensialın qeyri-neft sektoru hesabına iki dəfə artırılması nəzərdə tutulur. Bu məqsədlə bir sıra tədbirlər görülür, o cümlədən əlverişli rəqabət mühiti yaradılır, əmək ehtiyatlarının inkişafına, investisiyaların cəlb edilməsinə diqqət artırılır.
İnteraktiv formatda keçirilən konfransda yüksək texnologiyalar sahəsinin inkişaf perspektivləri müzakirə edilib, Azərbaycanda həyata keçirilən layihələrlə bağlı təqdimatlar olub.
Konfrans öz işini sessiyalarda davam etdirib. Sessiyalarda “Rabitə, yüksək texnologiyalar və “Elektron hökumət”in ölkənin inkişafında rolu”, “Yüksək texnologiyalarda Azərbaycanın insan resurslarının potensialı”, “Yüksək texnologiyalara dair məhsulların stimullaşdırılması”, “Yüksək texnologiya və maliyyə qrupları arasında imkanlar və dilemmalar” mövzuları müzakirə olunub.
Sonda “Microsoft Azərbaycan” MMC və “Yüksək Texnologiyalar Parkı” MMC arasında Anlaşma Memorandumu imzalanıb.
Memorandum çərçivəsində tərəflər İKT-nin tətbiqi istiqamətində imkanların yaradılması sahəsində əməkdaşlıq edəcəklər.

Paylaş:

Baxılıb: 1280 dəfə