İsmayıllıda əsas kapitala investisiya qoyuluşu 9,4 faiz artıb

Bakı:

27 °C

59 %

6 m/s

Əlaqə

AZ RU EN

Ana səhifə / İqtisadiyyat / İsmayıllıda əsas kapitala investisiya qoyuluşu 9,4 faiz artıb

İsmayıllıda əsas kapitala investisiya qoyuluşu 9,4 faiz artıb

25.07.2015 [10:30]

İsmayıllıda cari ilin birinci yarısının sosial-iqtisadi inkişafının yekunları və qarşıda duran vəzifələrə həsr olunan hesabat yığıncağı keçirilib.
AZƏRTAC xəbər verir ki, rayon icra hakimiyyətinin başçısı Mirdaməd Sadıqov hesabat məruzəsi ilə çıxış edib.
Diqqətə çatdırılıb ki, birinci yarım ildə rayonda 75 milyon 729 min manat məbləğində ümumi məhsul istehsal olunub. Bu göstərici əvvəlki ilin eyni dövrü ilə müqayisədə 4 milyon 511 min manat çoxdur. Artım bütün sahələrdə, o cümlədən sənayedə 1,8 faiz, kənd təsərrüfatında 4,1 faiz, tikintidə 4,9 faiz və s. təşkil edib. Hesabat dövründə əsas kapitala investisiya qoyuluşu ötən ilin müvafiq dövrü ilə müqayisədə 9,4 faiz artıb. 5 milyon 824 min manat dəyərində əsas fondlar istifadəyə verilib ki, bu da keçən ilin ilk altı ayındakı göstəricidən 5,3 dəfə çoxdur.
İqtisadiyyatın aparıcı sahəsi olan kənd təsərrüfatında, o cümlədən taxılçılıqda, heyvandarlıqda dinamik inkişaf davam edib, üzüm plantasiyalarının, meyvə bağlarının sahələri genişləndirilib. Rayonun sosial-iqtisadi həyatında mühüm rol oynayacaq bir sıra layihələrin icrası davam etdirilib. Belə ki, Keyvəndi kəndində “AZZA Aqro” MMC tərəfindən 1500 başlıq iri heyvandarlıq təsərrüfatının, Qalınçaq kəndində “Şən fermer” MMC-nin quşçuluq təsərrüfatının, İsmayıllı şəhərində “Yaşıl market”in, M.F.Axundzadə küçəsində iki doqquzmərtəbəli yaşayış binasının tikintisi davam etdirilir. Gəraybəyli kəndində həkim məntəqəsinin inşası başa çatdırılaraq zəruri avadanlıqlarla təchiz olunub. Rayonda velosiped zavodunun tikintisi davam etdirilir və bu böyük sənaye obyektinin bu il açılışı nəzərdə tutulur. Yaxın vaxtlarda “Sənaye mərkəzi”nin yaradılması üçün hazırlıq işləri aparılır.
Hesabat yığıncağında təhsil, səhiyyə və mədəniyyət sahələrində həyata keçirilən layihələr, əhalinin su, təbii qaz və elektrik enerjisi ilə təminatı istiqamətlərində də ətraflı müzakirələr aparılıb.
Məruzə və çıxışlarda həyata keçirilən böyük layihələrin, sosial-iqtisadi sahələrdə qazanılan uğurlu nəticələrin Prezident İlham Əliyevin Azərbaycanın hər bir bölgəsinə, o cümlədən İsmayıllıya göstərdiyi diqqət və qayğısının parlaq təzahürü olduğu vurğulanıb.
Hesabat yığıncağında regionların sosial-iqtisadi inkişafına dair 2014-2018-ci illəri əhatə edən üçüncü Dövlət Proqramında İsmayıllı rayonu üçün nəzərdə tutulmuş layihələrdən, bu layihələrin həyata keçirilməsi sahəsində qarşıda duran vəzifələrdən də ətraflı danışılıb.

Paylaş:

Baxılıb: 1049 dəfə