Azərbaycan ilə İran arasında iqtisadiyyatın bir çox sahələrində əməkdaşlıq daha da inkişaf edəcək

Bakı:

25 °C

69 %

10 m/s

AZ RU EN

Ana səhifə / İqtisadiyyat / Azərbaycan ilə İran arasında iqtisadiyyatın bir çox sahələrində əməkdaşlıq daha da inkişaf edəcək

Azərbaycan ilə İran arasında iqtisadiyyatın bir çox sahələrində əməkdaşlıq daha da inkişaf edəcək

06.08.2015 [01:02]

İranda səfərdə olan Azərbaycanın iqtisadiyyat və sənaye naziri, Azərbaycan-İran müştərək iqtisadi komissiyasının həmsədri Şahin Mustafayev avqustun 4-də bu ölkənin rabitə və informasiya texnologiyaları naziri, İran-Azərbaycan müştərək iqtisadi komissiyasının həmsədri Mahmud Vaezi ilə görüşüb.
İranlı nazir bildirib ki, iki qonşu dövlət arasında tarixi bağlılıq var. Əlaqələrimiz inkişaf mərhələsindədir, əməkdaşlığımızın perspektivləri üçün böyük potensial mövcuddur və bundan xalqlarımızın mənafeyi naminə istifadə etmək lazımdır. Bir sıra sahələrdə yaxınlaşma müşahidə edilir. İran Azərbaycanla elektrik şəbəkəsinin sinxronlaşdırılması təklifini irəli sürüb və bu sahədə işlər davam etdirilməlidir.
M.Vaezi əlavə edib ki, İranın Qərb dövlətləri ilə nüvə proqramına dair əldə etdiyi razılaşmadan sonra Azərbaycandan geniş tərkibli nümayəndə heyətinin İrana səfəri çox əhəmiyyətlidir. “Bu səfər bizim üçün də önəmlidir. Nüvə sahəsində böyük nailiyyət əldə etdikdən sonra bizim qonşu ölkələr, xüsusilə də Azərbaycanla əlaqələrimiz daha sürətlə inkişaf edəcək. Bu səfər onu göstərir ki, dünyada baş verən hər hansı bir hadisənin iki ölkə arasındakı əlaqələrə heç bir mənfi təsiri yoxdur. Bu əlaqələr yüksək templə inkişaf etməkdə davam edəcək”, - deyən M.Vaezi tezliklə gömrük, enerji, neft-qaz və neft-kimya, bank sahələrində də yaxşı əlaqələrin qurulacağına ümidvar olduğunu deyib.
Şahin Mustafayev deyib ki, Azərbaycan İranla sanksiyalar dövründə də əməkdaşlıq edib və sanksiyalar aradan qalxdıqdan sonra da əməkdaşlıq edəcək. Nazir vurğulayıb ki, ölkələrimiz arasında qarşılıqlı maraq doğuran sahələr çoxdur. Neft-qaz, energetika, nəqliyyat, təhsil, səhiyyə sahələrində və özəl qurumlar arasında əlaqələr mövcuddur və bu əlaqələr ildən-ilə genişlənir. Qeyd olunub ki, Azərbaycan və İran prezidentləri siyasi iradə nümayiş etdirərək qarşılıqlı faydalı əməkdaşlığın əsasını qoyublar. Səfərlər intensivləşib və hər dəfə yeni əməkdaşlıq imkanları yaranır. Nüvə proqramı sahəsində İranı əldə etdiyi uğur münasibətilə təbrik edən Ş.Mustafayev bildirib ki, turizm sahəsində irəliləyiş müşahidə olunur. 2013-cü ildə Azərbaycandan İrana 500 min turist gəlmişdisə, 2014-cü ildə bu rəqəm 800 minə çatıb ki, bu da böyük göstəricidir.
Səfər çərçivəsində nümayəndə heyətinin tərkibinə daxil olan müxtəlif sahələrin mütəxəssislərinin İranın müvafiq qurumlarında geniş müzakirələr aparacağını nəzərə çatdıran Ş. Mustafayev bu müzakirələrin səmərəli olacağına inamını ifadə edib.
Bildirilib ki, Azərbaycanın 6 şirkəti qarşılıqlı sərmayələr sahəsində İranla əməkdaşlıq edir: “Şirkətlərin biri İranda zavod tikmək istəyir. Bu layihənin reallaşdırılmasında hər iki tərəf maraqlıdır və bütün mövcud imkanlardan istifadə olunur. “İran Khodro” şirkəti də Azərbaycanda avtomobil istehsalı üçün zavod tikmək istəyir. Azərbaycan hökuməti bunu dəstəkləyir və bunun reallaşması üçün yer verməyə hazırdır”.
Vurğulanıb ki, İran və Azərbaycan əczaçılıq, turizm və viza sahəsində əməkdaşlığı davam etdirir.
Görüşdə Azərbaycanın İrandakı səfiri Cavanşir Axundov da iştirak edib.
Görüşdən sonra nazirlər mətbuat konfransı keçiriblər.

Paylaş:

Baxılıb: 1116 dəfə