Mirzəcan Xəlilov: Cənub Qaz Dəhlizi bütün regionun enerji xəritəsini dəyişəcək

Bakı:

9 °C

87 %

8 m/s

Əlaqə

AZ RU EN

Ana səhifə / İqtisadiyyat / Mirzəcan Xəlilov: Cənub Qaz Dəhlizi bütün regionun enerji xəritəsini dəyişəcək

Mirzəcan Xəlilov: Cənub Qaz Dəhlizi bütün regionun enerji xəritəsini dəyişəcək

08.06.2018 [17:32]

"Bu gün nəinki ölkəmizin, o cümlədən regionun və Avropanın enerji təhlükəsizliyinin təmin olunmasında böyük strateji əhəmiyyətə malik olan Cənub Qaz Dəhlizini XXI əsrin qlobal layihəsi kimi dəyərləndirə bilərik. Zəngin "Şahdəniz" yatağının ehtiyatlarının işlənməsinə və Azərbaycan qazının Avropa ölkələrinə çatdırılmasına hesablanan bu layihənin təşəbbüskarı rolunda məhz Azərbaycan çıxış edib". Bunu Milli Məclisin deputatı Mirzəcan Xəlilov deyib. Millət vəkilinin sözlərinə görə, Cənub Qaz Dəhlizi dünya neft-qaz sənayesində ən mühüm və ən genişmiqyaslı layihələrdən biri kimi Xəzər regionundakı qaz təchizatını Avropa bazarlarına birləşdirməklə bütün regionun enerji xəritəsini dəyişəcək. Azərbaycanın Avropanın enerji təhlükəsizliyində mühüm rol oynadığını bildirən Milli Məclisin deputatı qeyd edib ki, hazırda Avropa İttifaqı ölkələrinin bəziləri neftin 40 faizini respublikamızdan alır. "Bununla belə, ölkəmiz Avropanın enerji təhlükəsizliyində daha fəal şəkildə iştirak etmək əzmindədir və bu məqsədlə öz potensialına əsaslanaraq müxtəlif təşəbbüslərlə çıxış edir. Cənub Qaz Dəhlizi Azərbaycanın Avropa İttifaqı ilə enerji təhlükəsizliyi sahəsində faydalı əməkdaşlıq əlaqələrinin daha geniş miqyasda inkişafı üçün etibarlı zəmin yaradır. Cənub Qaz Dəhlizi Avropanın enerji təhlükəsizliyinə, regional və qlobal əməkdaşlığın dərinləşməsinə sanballı töhfə olacaq", - deyə qeyd edən M.Xəlilov həmçinin vurğulayıb ki, Cənub Qaz Dəhlizinin açılışı Azərbaycanın təməlini Ümummilli lider Heydər Əliyevin qoyduğu və Prezident İlham Əliyev tərəfindən çox dəqiqliklə həyata keçirilən ölkənin uzunmüddətli inkişafına hesablanmış enerji strategiyasının növbəti parlaq səhifəsidir. O, xatırladıb ki, Azərbaycan Cənub Qaz Dəhlizi Məşvərət Şurasının yaradılması təşəbbüsünü 2015-ci ildə irəli sürüb.
Azərbaycanın təsdiq edilmiş qaz ehtiyatlarının 2,6 trilyon kubmetrə bərabər olduğunu söyləyən Mirzəcan Xəlilov bildirib ki, proqnozlaşdırılan qaz ehtiyatlarımız isə 4-5 trilyon kubmetr səviyyəsindədir. Hazırda Avropada Azərbaycan qazına çox böyük ehtiyac olduğunu deyən deputat əlavə edib ki, Cənub Qaz Dəhlizi vasitəsilə ilk qazın 2018-ci ilin sonlarında Gürcüstan və Türkiyəyə təchiz edilməsi planlaşdırılır. "Avropaya isə qaz təchizatının Azərbaycanda dənizdə ilk qaz hasil edildiyi vaxtdan bir ildən bir qədər çox müddət keçdikdən sonra gerçəkləşəcəyi gözlənilir. Bu isə bir daha Azərbaycanın regionun lider dövləti kimi, beynəlxalq münasibətlər sistemində də etibarlı tərəfdaş imicini möhkəmləndirəcək, həmçinin ölkəmizin daha geniş coğrafiyada güclü aktor kimi iştirakını təsdiqləyəcək", - deyə M.Xəlilov qeyd edib.
Millət vəkili M.Xəlilovun fikrincə, Cənub Qaz Dəhlizinin rəsmi açılışı ölkəmizin inkişafına da yeni töhfələr verəcək. Belə ki, dəhlizin istismarı onilliklər ərzində ölkəmizə, xalqımıza böyük fayda gətirəcək. İstehlakçıları şaxələndirilmiş enerji mənbəyi və marşrutu ilə təmin edən Azərbaycanın Avropa ölkələri ilə əlaqələri yeni mərhələyə yüksələcək. Bütövlükdə Cənub Qaz Dəhlizi regional və qlobal miqyasda təhlükəsizliyin və sabitliyin möhkəmlənməsində öz müsbət rolunu oynayacaq.

Paylaş:

Baxılıb: 867 dəfə