Azərbaycan Dünya Neft Şurasının 2023-cü ildə keçirəcəyi Konqresə ev sahibliyini irəli sürüb

Bakı:

10 °C

81 %

7 m/s

Əlaqə

AZ RU EN

Ana səhifə / İqtisadiyyat / Azərbaycan Dünya Neft Şurasının 2023-cü ildə keçirəcəyi Konqresə ev sahibliyini irəli sürüb

Azərbaycan Dünya Neft Şurasının 2023-cü ildə keçirəcəyi Konqresə ev sahibliyini irəli sürüb

09.05.2019 [10:11]

Azərbaycanın Dünya Neft Şurasının (WPC) 2023-cü ildə keçirəcəyi 24-cü Dünya Neft Konqresinə ev sahibliyi irəli sürülüb.
AZƏRTAC xəbər verir ki, mayın 8-də energetika naziri Pərviz Şahbazovun sədrliyi ilə “Azərbaycan Milli Neft Komitəsi” İctimai Birliyinin (İB) ötənilki fəaliyyətinə və qarşıda duran vəzifələrə həsr edilmiş iclası keçirilib.
P.Şahbazov “Azərbaycan Milli Neft Komitəsi” İB-in 2005-ci ildə təsis edildiyini diqqətə çatdırıb. O, Azərbaycanın Dünya Neft Şurasına üzv kimi qəbulunda Ümummilli Lider Heydər Əliyevin neft strategiyasının rolunu xüsusi qeyd edib. Bildirib ki, Dünya Neft Şurasının əsas qayəsi qlobal miqyasda karbohidrogen ehtiyatlarından insanların rifahı naminə istifadə edilməsidir və bu, Azərbaycanın enerji kursunun da başlıca hədəfidir.
Karbohidrogen ehtiyatları və düşünülmüş məqsədyönlü siyasətin bütövlükdə regional inkişafı təmin etdiyini deyən nazir enerji layihələrinin əhəmiyyətindən danışıb. Prezident İlham Əliyevin siyasi iradəsi sayəsində Xəzər regionunun tərəfdaşlıq münasibətləri ilə dünyanın digər enerji mərkəzlərindən fərqli statusda olduğunu bildirib.
Qeyd edib ki, indiyə kimi ölkəmizdə hasil olunmuş 2 milyard 58 milyon ton neftin 746 milyon tonu müstəqillik dövründə çıxarılıb. Hazırda orta gündəlik neft hasilatı isə təxminən 770 min barreldir.
Energetika naziri neftlə bağlı fəaliyyətin bir neçə istiqamətdə həyata keçirildiyini deyib: “Bu gün neft ehtiyatlarının işlənməsi, neft sənayesinin investisiya ilə təmin edilməsi ilə yanaşı, neftin qiymətinin sabitləşdirilməsi prosesində də iştirak edirik. Eyni zamanda, neftin qiymətlərdən asılılığının azaldılması üçün hasilatda səmərəliliyə nail olunması, neftdən əlavə dəyər yaradan məhsul kimi istifadə edilməsi istiqamətində tədbirlər görürük. Həmçinin, quruda və açıq dənizdə ilk dəfə neft hasilatının, neft sənayesində bir sıra mühüm ilklərin beşiyi kimi ölkəmizin dünyada tanıdılmasına çalışırıq”.
Dünya Neft Şurasının 2023-cü ildə keçiriləcək 24-cü Dünya Neft Konqresinə ev sahibliyi etməsi üçün Bakının namizəd olduğunu deyən nazir lazımi dəstəyin qazanılmasında “Azərbaycan Milli Neft Komitəsi” İB-in üzərinə mühüm vəzifələrin düşdüyünü qeyd edib, müvafiq tapşırıqlar verib.
Sonra “Azərbaycan Milli Neft Komitəsi” İB-in illik fəaliyyətinə dair hesabat dinlənilib. Birliyin idarəetmə aparatının rəhbəri Nazim Vəliyev “Azərbaycan Milli Neft Komitəsi” İB-in ölkəmizin neft-qaz sektorundakı maraqlarını Dünya Neft Şurası beynəlxalq təşkilatında fəal təmsil etdiyini vurğulayaraq, Bakı şəhərinin namizədliyi çərçivəsində görülmüş işləri diqqətə çatdırıb.
Energetika nazirinin müavini Elnur Soltanov isə bildirib ki, 24-cü Dünya Neft Konqresinə namizəd bu ilin iyununda Sankt-Peterburqda keçiriləcək növbəti iclası zamanı gizli səsvermə ilə müəyyən ediləcək. Azərbaycanla yanaşı, Kanada, Birləşmiş Ərəb Əmirlikləri, Argentina və Qazaxıstan da namizəd ölkələr sırasındadır. İclasda üzv ölkələrin dəstəyinin qazanılması üçün aparılan təbliğat işləri barədə söhbət açılıb.
Həmçinin “Azərbaycan Milli Neft Komitəsi” İB-in gələcək fəaliyyətinin digər istiqamətlərinə dair də müzakirələr aparılıb.

Paylaş:

Baxılıb: 874 dəfə