Tarix qalibləri yadda saxlayır!

Bakı:

31 °C

39 %

3 m/s

Əlaqə

AZ RU EN

Ana səhifə / MEDİA / Tarix qalibləri yadda saxlayır!

Tarix qalibləri yadda saxlayır!

16.10.2025 [11:15]

Əsrlərlə danışılacaq 44 günlük mübarizə...

2020-ci ilin payızında Azərbaycan xalqı tarixi bir mübarizənin şahidi oldu. 27 sentyabrda başlayan və cəmi 44 gün davam edən Vətən müharibəsi yalnız torpaqlarımızın azadlığı ilə nəticələnmədi, bu, həm də milli birliyin, xalq iradəsinin, haqqın və ədalətin parlaq təntənəsi idi. Azərbaycan tarix boyu öz suverenliyi uğrunda apardığı savaşda qələbə qazandı. Bu qələbə yalnız silah gücü ilə yox, xalqın ruhu, şəhidlərin qanı və Prezident İlham Əliyevin siyasi iradəsi ilə qazanıldı.

30 illik ədalətsizliyə son

Ermənistanın 1990-cı illərin əvvəlində işğal etdiyi Qarabağ və ətraf rayonlar 30 il boyunca beynəlxalq hüququn, BMT qətnamələrinin pozulması fonunda tapdalanmışdı. Lakin 2020-ci ildə bu ədalətsizliyə son qoyuldu. Azərbaycan Ordusu mərdliklə, planlı şəkildə bir-bir torpaqları azad etdi. Cəbrayıl, Füzuli, Zəngilan, Qubadlı, və nəhayət, Qarabağın tacı olan Şuşa - hər biri qəhrəman əsgərlərimizin qanı, canı bahasına geri alındı.

Şuşanın azad edilməsi təkcə strateji yox, həm də mənəvi zirvə idi. 8 noyabr 2020-ci il tarixi artıq hər bir azərbaycanlının yaddaşında bir zəfər simvoludur.

Ermənistanın müharibə cinayətləri

Müharibə özlüyündə fəlakətdir. Amma haqq savaşında belə bir düşmənin necə qeyri-insani üsullara əl atdığını dünya gördü. Ermənistan ordusu cəbhə bölgəsindən uzaqda yerləşən, mülki əhalinin yaşadığı şəhərləri - Gəncə, Bərdə, Tərtər kimi bölgələri ballistik raketlərlə atəşə tutdu. Bu hücumlar nəticəsində onlarla günahsız uşaq, qadın, qoca həyatını itirdi. Tərtər praktiki olaraq hər gün atəş altında idi. Bərdəyə raket zərbəsi isə xüsusi qəddarlıq nümunəsi idi, o zaman klaster bombalardan istifadə edilmişdi. Bu, beynəlxalq hüquqa zidd, birmənalı şəkildə hərbi cinayətdir.

Ermənistan həm də işğal dövründə törətdiyi vandallıqla mədəni irsimizə qarşı vəhşiliklə özünü ifşa etdi. Azad edilən torpaqlarda dağıdılmış məscidlər, talan edilmiş muzeylər, yerlə-yeksan edilmiş kəndlər aşkarlandı. Bu, sadəcə müharibə nəticəsi deyildi, planlı şəkildə həyata keçirilmiş soyqırımı idi.

İkili standartlara qarşı haqqın səsi

Azərbaycan 44 gün ərzində həm hərbi, həm siyasi, həm də informasiya cəbhəsində misilsiz uğurlar qazandı. Prezident İlham Əliyevin apardığı diplomatik mübarizə nəticəsində dünya ictimaiyyəti ilk dəfə reallıqları açıq şəkildə görməyə başladı. Artıq torpaqları işğal olunmuş ölkə yox, qalib dövlətik. Bu statusu bizə heç kim bağışlamadı, biz onu haqqımızla, qurbanlarımızla qazandıq.

Ölkə başçısı müharibə zamanı dünyanın aparıcı media orqanlarına verdiyi müsahibələrdə bu cinayətləri birbaşa faktlarla ifşa etdi. Xarici jurnalistlər Gəncəyə, Bərdəyə, Tərtərə gətirildi. Onlar hadisə yerindən canlı görüntülərlə dünyaya reallıqları çatdırdılar. Bu, informasiya müharibəsinin mühüm bir cəbhəsi idi və Azərbaycan bu müharibədə də qalib gəldi.

Ancaq təəssüf ki, beynəlxalq ictimaiyyətin bəzi dairələri bu cinayətlərə ya laqeyd yanaşdı, ya da bərabərlik prinsipi adı altında həm qurbanı, həm cinayətkarı eyni tərəzidə tutmağa çalışdılar. Amma biz susa bilməzdik. Hər bir şəhidimizin, mülki vətəndaşımızın qanı haqq səsimizə çevrildi. İkili standartlara qarşı tək dayandıq, amma susmadıq. Azərbaycan öz səsini dünyaya çatdırmağı bacardı.

Həqiqəti susdurmaq olmaz...

Bu gün qarşımızda dayanan məsələ təkcə Qarabağın yenidən qurulması deyil, eyni zamanda ədalətin bərpasıdır. Ermənistanın törətdiyi müharibə cinayətləri unudulmamalı, unudulmasına imkan verilməməlidir. Bu, yalnız hüquqi məsələ deyil, həm də əxlaqi məsələdir. Azərbaycan bu həqiqətləri təkcə öz müdafiəsi üçün deyil, həm də dünya ədalət sistemi adına söyləyir.

Ermənistanın müharibə cinayətləri təkcə 44 günlə məhdudlaşmır, bu, illərlə davam edən işğal idi. Azərbaycan həmin cinayətləri sənədləşdirməklə, ifşa etməklə və beynəlxalq tribunallara daşımaqla həm öz haqqını müdafiə edir, həm də tarix qarşısında borcunu yerinə yetirir. Çünki həqiqəti susdurmaq olmaz...

Yeganə

Paylaş:

Baxılıb: 688 dəfə