46 illik ömür...

Bakı:

17 °C

63 %

9 m/s

Əlaqə

AZ RU EN

Ana səhifə / Mədəniyyət / 46 illik ömür...

46 illik ömür...

20.06.2025 [08:15]

Fazil Salayevin anım günüdür

Komediya aktyorlarımız sırasında tamaşaçını necə güldürməyi bilən, məhz insanların istəyi ilə komik situasiyalarda necə hərəkət etməyin min bir yolunu qət edənlər çox olub. Həmin aktyorlardan Fazil Salayevin adını xüsusilə qeyd etməliyik. Xüsusi koloritə malik olan Fazil Salayev sadəcə səhnədə deyil, eyni zamanda həyatda da çox şən, deyib-gülməyi sevən biri idi. Bu gün 46 illik ömründə böyük yaradıcılıq yolu qət edən, xalqımızın sevimli aktyoru Fazil Salayevin anım günüdür. Deyilənə görə, Fazil Salayevin kumiri məşhur italyan aktyoru Toto idi. Çox güman ki, Salayevin bu seçimində Toto ilə zahiri oxşarlıqlarının olması da böyük rol oynamışdı. Teatr İnstitutunu bitirən F.Salayev Akademik Milli Dram Teatrına işə qəbul olunduqdan sonra bu teatrın səhnəsində müxtəlif obrazlar oynayır. Ancaq bir müddət sonra dram teatrından gedir və Musiqili Komediya Teatrında işə düzəlir.

Fazil Salayev kinoda ilk rolunu 32 yaşında oynayıb. Rejissor Həsən Seyidbəyli onu “Möcüzələr adası” filmində epizodik rola dəvət edir. Cəmi bir il sonra isə F.Salayev rejissor Ağarza Quliyevin ekranlaşdırdığı “Ulduz” filmində müxbir rolunu oynayır. Ardınca “Alma almaya bənzər”, “Bir cənub şəhərində”, “Dərviş Parisi partladır” kimi filmlərdə yaddaqalan obrazlar yaradır.

1966-cı ildə Həsən Seyidbəyli “Sən niyə susursan?” filmində F. Salayevə kiçik bir rol tapşırır və o, bu rolun da öhdəsindən lazımınca gəlir. 1969-cu ildə Şamil Mahmudbəyovun çəkdiyi “Şərikli çörək” filmindəki Qırçı Məhəmməd rolu isə onun aktyor kimi məşhurlaşmasında xeyli rol oynayır.

Aktyorun oynadığı sonuncu film onun həyatının son aylarına təsadüf edir. Rejissor Cahangir Mehdiyev Moskva Kinematoqrafiya İnstitutunda oxuyarkən kurs işi üçün “Araşdırın” filminə Fazil Salayevi çəkir.

Həyat yoldaşı Fəridə Salayeva 2009-cu ildə verdiyi müsahibədə Fazil Salayevin son günlərini belə xatırlayırdı:

“Ölümündən bir qədər əvvəl veriliş efirə getmişdi. Orada Həsən Seyidbəyli onun haqqında danışmışdı. Fazil öləndən sonra verilişi yenidən efirə verdilər. Söz-söhbət gəzirdi ki, guya Fazil bizimlə yola getmirmiş. Təsəllim qızlarım olub. Axı onlar rəhmətliyin ən qiymətli yadigarlarıdır. Üç qız zarafat deyil. Fazil rəhmətə gedəndə hələ hamısı evdəydi. Sonra başım qarışdı onları köçürməyə. Daha sonra nəvələrim dünyaya gəldi. Fazil evin vur-tut bircə uşağı olub. Özü də varlı-hallı bir kişinin. Üstəlik, üç qardaşın evində yeganə uşağı idi. Rəhmətlik qayınatamın artistlikdən xoşu gəlməzdi. Elə sözün doğrusu, mənim də. Teatrda tamaşalarda oynayırdı, tək-tük halda gedib baxırdım. Piano çalmağı, oxumağı aləm idi. Hədsiz istedadlı idi. Bakının yarısı dostları idi. Mənsə ciddi, qısqanc... Bir az da cavanlıq idi, indiki ağlım hardan idi. Necə deyərlər, çox fərqimiz vardı...”.

Xüsusilə “Mozalan” satirik jurnalından yaddaşlara həkk olan istedadlı aktyor Fazil Salayev qısa ömür yaşasa da, oynadığı rolları, gözəl mimikası və yumor hissi ilə xalqımızın yaddaşında əbədi qaldı. İllər keçsə də, onun yaratdığı rollara və filmlərə maraq itməyib, bu gün də sevilə-sevilə baxılır.

Yeganə BAYRAMOVA

Paylaş:

Baxılıb: 425 dəfə