Əməkdar memar Rasim Əliyevin “Xatirələr” kitabının təqdimatı olub

Bakı:

24 °C

60 %

1 m/s

Əlaqə

AZ RU EN

Ana səhifə / Mədəniyyət / Əməkdar memar Rasim Əliyevin “Xatirələr” kitabının təqdimatı olub

Əməkdar memar Rasim Əliyevin “Xatirələr” kitabının təqdimatı olub

08.04.2017 [12:18]

Aprelin 7-də Beynəlxalq Muğam Mərkəzində Əməkdar memar, Dövlət mükafatı laureatı Rasim Əliyevin müəllifi olduğu “Xatirələr” kitabının təqdimatı olub. Kitab Azərbaycan, rus və ingilis dillərində nəşr edilib.
AZƏRTAC xəbər verir ki, dövlət və hökumət rəsmilərinin, Milli Məclisin deputatlarının, mədəniyyət və incəsənət xadimlərinin iştirak etdikləri mərasimdə çıxış edən mədəniyyət və turizm naziri Əbülfəs Qarayev Rasim Əliyevin Azərbaycan mədəniyyətinə, memarlığına verdiyi dəyərli töhfələrdən danışıb. Bildirib ki, onun yaradıcılığı yaşadığı epoxanın portretidir.
Qeyd olunub ki, Rasim Əliyev haqqında danışarkən onun istedadlı memar, fırça ustası olması ilə yanaşı, böyük yaradıcılıq və şəhərsalma prosesinin təşkilatçısı kimi fəaliyyətini də vurğulamaq lazımdır. Bakının, eləcə də ölkəmizin bölgələrində yerləşən tarixi abidələrimizin bugünkü görkəmində məhz Rasim Əliyevin dəstxətti görünür.
Görkəmli ziyalı, akademik Həsən Əliyevin ailəsində dünyaya göz açan Rasim Əliyev Naxçıvanda Hüseyn Cavidin qəbri üzərində memarlıq-xatirə kompleksinin, Heydər Əliyev Beynəlxalq Aeroportunun və Naxçıvan Hava limanının, Bakının bir neçə metro stansiyasının, şəhərin əsas parklarının, Azərbaycanın Türkiyədəki səfirliyinin binasının və digər memarlıq sahəsində özünəməxsusluğu və bənzərsizliyi ilə seçilən layihələrin müəllifi və həmmüəllifidir. O, 1965-ci ildə Bakının baş memarı təyin olunub və 23 il müddətində bu vəzifəni şərəflə, ləyaqətlə yerinə yetirib.
Görkəmli memarın böyük tələbə ordusu olduğunu söyləyən natiq deyib ki, Rasim Əliyev nəinki Azərbaycanda, xarici ölkələrdə də tanınır.
Nazir təqdimatı keçirilən kitabın ərsəyə gəlməsində zəhməti olanlara təşəkkürünü bildirib.
Azərbaycan Yazıçılar Birliyinin sədri, Xalq yazıçısı, kitabın “Ön söz” müəllifi Anar yüksək poliqrafik şəkildə nəşr edilən nəşrin böyük bir ömrün salnaməsi olduğunu söyləyib. Bildirib ki, Rasim Əliyevin memarlıq və rəssamlıq əsərləri zəngin insanın sənət həyatını əks etdirir. Kitabda kamil bir Azərbaycan ziyalısını görürük.
Azərbaycan Dövlət Rəssamlıq Akademiyasının rektoru, akademik Ömər Eldarov Rasim Əliyevin hisslərlə yaşayan insan olduğunu deyib. Bildirib ki, bu səbəbdən də onun əsərləri belə gözəl və baxımlıdır. O, memarlığa, rəssamlığa vurğun insan olan Rasim Əliyevlə birgə həyata keçirdikləri layihələrdən də danışıb.
Azərbaycan Memarlıq və İnşaat Universitetinin rektoru professor Gülçöhrə Məmmədova Rasim Əliyevi müasir Azərbaycan memarlığının patriarxı kimi dəyərləndirib. Bildirib ki, o, uzun və şərəfli yaradıcılıq yolu keçib, XX əsrin ikinci yarısı Azərbaycan memarlıq tarixi onun adı ilə bağlıdır.
Qeyd olunub ki, geniş dünyagörüşə, dərin biliklərə sahib Rasim Əliyev memarlıq fəaliyyətini istiqamətləndirən şəxsiyyətlərdəndir.
Rektor Rasim Əliyevin əsərlərini təqdim etmək, həyat və yaradıcılığı barədə məlumat vermək baxımından kitabı yüksək qiymətləndirib.
Tədbir boyu kitabda yer alan xatirələr əsasında ekranlaşdırılan videoçarxlar nümayiş olunub. Həmçinin Azərbaycan və xarici musiqilər səsləndirilib.
Sonra çıxış edən Rasim Əliyev öz həyatında, yaradıcılığında Ulu öndər Heydər Əliyevin əvəzsiz rolunu xüsusi qeyd edib. Memar, Prezident İlham Əliyevə və Birinci vitse-prezident, Heydər Əliyev Fondunun prezidenti Mehriban Əliyevaya memarlıq sahəsinə göstərdikləri böyük diqqət və qayğıya görə öz dərin minnətdarlığını bildirib.
Müəllif kitabı atası Həsən Əliyev, anası Zərqələm Əliyeva və əmisi Heydər Əliyevin işıqlı xatirəsinə ithaf etdiyini söyləyib.
Rasim Əliyev kitabın yazılmasında əməyi keçənlərə və tədbirin təşkilatçılarına minnətdarlığını bildirib.