Mübariz Qurbanlı: Xankəndidə aeroportun açılması Azərbaycana qarşı təxribatdır

Bakı:

25 °C

60 %

4 m/s

Əlaqə

AZ RU EN

Ana səhifə / Müsahibə / Mübariz Qurbanlı: Xankəndidə aeroportun açılması Azərbaycana qarşı təxribatdır

Mübariz Qurbanlı: Xankəndidə aeroportun açılması Azərbaycana qarşı təxribatdır

20.07.2012 [00:35]

Gün.Az-ın YAP İcra katibinin müavini, Milli Məclisin deputatı Mübariz Qurbanlı ilə müsahibəsi:
- Xankəndidə aeroport işə salmağı planlaşdıran Ermənistan bu niyyəti ilə bağlı hansı məqsədləri güdə bilər?
- İrəvan bu məsələdə yalnız bir məqsədi - Ermənistan tərəfindən işğal edilmiş Azərbaycan ərazisində yaradılmış özü-özünü elan edən qurumu beynəlxalq arenaya çıxarmaq niyyətini güdür. Bununla yanaşı, Ermənistan torpaqların işğalı faktını möhkəmləndirmək istəyir. Bununla əlaqədar olaraq rəsmi Bakı Azərbaycanın işğal edilmiş ərazisinin bir hissəsində aeroportun fəaliyyət göstərməsi faktı ilə razılaşa bilməz.
- Xankəndidə sözügedən aeroportun işə salınmamağı üçün Azərbaycan hansı addımları atmalıdır və ata bilər?
- Azərbaycan Beynəlxalq Mülki Aviasiya Təşkilatının üzvü qismində artıq bir neçə dəfə bəyan edib ki, işğal edilmiş ərazilər üzərində uçuşlar beynəlxalq sənədlərin norma və tələbləri ilə ziddiyyət təşkil edir.
Azərbaycanın işğal edilmiş ərazilərin üzərində uçuşlara yol verməmək məqsədilə ata biləcəyi addımlar müxtəlif ola bilər. Həm də, Azərbaycan artıq bəyan edib ki, işğal altında olan ərazilərin səmasında həyata keçirən uçuşları özünün hava məkanının pozulması kimi dəyərləndirəcək və bununla bağlı müvafiq addımlar atacaq. Bununla yanaşı, onu da qeyd etmək istəyirəm ki, hökumət işğal altında olan ərazilərin üzərində aparılan uçuşlara yol verilməməsi üçün istənilən sərt tədbirləri görmək səlahiyyətinə malikdir.
Ermənistan hakimiyyət orqanları və onların işğal edilmiş Azərbaycan ərazilərində yaratdıqları separatçı rejim rəsmi Bakının bəyanatlarının ciddilik səviyyəsini dərk etməlidirlər. Axı beynəlxalq hüququn tələblərinə uyğun olaraq, Azərbaycanın ölkənin hava məkanını pozmuş uçan aparatları vurmaq hüququ var. Buna görə də, BMT, ATƏT və Avropa Şurası vəziyyətin bu şəkildə inkişaf etməsinə yol verməməkdən ötrü müvafiq tədbirlər görməlidir. Hesab edirəm ki, Azərbaycan öz tərəfindən bu məsələni BMT və ATƏT müstəvisində də qaldırmalıdır. çünki Azərbaycanın işğal altında olan ərazilərinin üzərində uçuşların həyata keçirilməsinə yönələn hərəkətlər çox təhlükəlidir.
- Erməni tərəfinin bu cür hərəkətləri Dağlıq Qarabağ münaqişəsinin nizamlanması üzrə danışıqlar prosesinə necə təsir göstərə bilər?
- Əgər Xankəndi ilə İrəvan arasında hava əlaqəsi yaradılarsa, bu hazırkı dövrdə aparılan danışıqlara böyük xələl gətirməklə yanaşı, Ermənistanın beynəlxalq hüquq normaları, BMT Təhlükəsizlik Şurasının Dağlıq Qarabağ münaqişəsinin nizamlanması üzrə qəbul etdiyi dörd qətnamə və digər beynəlxalq təşkilatların qəbul etdikləri sənədlərə etinasız yanaşmasına növbəti sübut olacaq.
Bu hərəkətlər Azərbaycan və Ermənistanın münaqişənin həlli üçün apardıqları danışıqlar prosesinə bütünlüklə böyük zərbə vura bilər. Hesab edirəm ki, Ermənistana təzyiq göstərilərsə, bu ölkənin hakimiyyəti öz təxribatyönümlü niyyətlərindən imtina edəcək.
- Ermənistan tərəfinin Xankəndidə aeroport açmaq cəhdləri hərbi əməliyyatlara təhrik edə bilərmi?
- Şübhəsiz. İrəvanın Azərbaycanın işğal altında olan torpaqları üzərində uçuşlar təşkil etmək cəhdləri ümumiyyətlə, Azərbaycan və Ermənistan qoşunlarının təmas xətti zonasındakı vəziyyətə mənfi təsir göstərəcək. Yeri gəlmişkən, Azərbaycan işğal olunmuş torpaqlar üzərindən uçuşlar həyata keçiriləcəyi təqdirdə cavab tədbirləri görmək məcburiyyətində qalacaq ki, bu da öz növbəsində cəbhə xəttində gərginliyi artıra bilər. Beləliklə də, Azərbaycan təxribata sövq olunur.
- ATƏT-in Minsk qrupu həmsədrlərinin Xankəndidə hava limanının mümkün fəaliyyətinə mövqeyini necə qiymətləndirirsiniz?
- ATƏT-in Minsk qrupu həmsədrləri ziddiyyətli çıxışlar etmək əvəzinə, Xankəndiyə təyyarə uçuşlarının mümkünsüzlüyündən danışmalı idilər. çünki, İrəvanın niyyətlərində Xankəndi ilə hava əlaqəsinin qurulması və insanlar üçün gediş-gəlişin yüngülləşdirilməsi deyil, təxribat gizlənir. Bu təxribatlarda məqsəd isə Azərbaycanı bu və ya digər addımlar atmağa sövq etmək, Bakını çıxılmaz vəziyyətdə qoymaqdır. Lakin əminəm ki, Azərbaycan diplomatiyası bu vəziyyətdən çıxış yolu tapacaq.

Paylaş:

Baxılıb: 1143 dəfə