"Partiyamızın bütün bələdiyyələr üzrə namizədləri mövcuddur"

Bakı:

14 °C

77 %

9 m/s

Əlaqə

AZ RU EN

Ana səhifə / Müsahibə / "Partiyamızın bütün bələdiyyələr üzrə namizədləri mövcuddur"

"Partiyamızın bütün bələdiyyələr üzrə namizədləri mövcuddur"

27.11.2009 [09:29]

Əli Əhmədov: Müxalifət partiyalarının bələdiyyə seçkilərində namizədlərinin sayının az olmasının günahını başqa strukturlarda axtarmaq lazım deyil
“Digər partiyalardan fərqli olaraq, Yeni Azərbaycan Partiyasının (YAP) irəli sürdüyü namizədlərin əksəriyyəti Dairə seçki komissiyaları tərəfindən qeydə alınıb. Partiyamızın bütün bələdiyyələr üzrə namizədləri mövcuddur”. Bu sözləri YAP Sədrinin müavini-İcra katibi Əli Əhmədov bələdiyyə seçkiləri ilə əlaqədar jurnalistlərin suallarını cavablandırarkən deyib. Əli Əhmədov bəzi müxalifət partiyalarının seçki ilə bağlı iddialarının əsassız olduğunu da bildirib.
- Müxalifət partiyalarını təmsil edən deputatlar həmin partiyaların namizədlərinə qarşı təzyiqlərin olduqlarını iddia edirlər. Bildirirlər ki, bir sıra şəxslərin namizədliyi qeydə alınmayıb. Bu iddialara münasibətiniz necədir?
- Bələdiyyə seçkilərində çoxlu sayda partiyaların, o cümlədən də, müxalifət partiyalarının iştirak etməsinə baxmayaraq, onların təmsil etdiyi nümayəndələrin say etibarilə xeyli az olduğu aydın şəkildə nəzərə çarpır. Bu vəziyyətə görə həmin partiyalar tərəfindən nə dairə seçki komissiyalarını, nə də ayrı-ayrı strukturları günahlandırmaq kimi səmərəsiz yol seçilməməlidir”. Əgər müxalifət partiyalarının kifayət qədər nümayəndələri olsaydı, onlar çoxlu sayda namizəd irəli sürərdilər və qeydə alınanlar da çox olardı. Həmin partiyaların az sayda namizədlərinin olmasının günahını nə Dairə seçki komissiyalarında, nə də başqa strukturlarda axtarmaq düzgündür. Əgər xatırlayırsınızsa, 2004-cü ildə keçirilmiş seçkilərdə də eyni hal müşahidə edilirdi. O zaman da bələdiyyə seçkilərində təmsil olunmaq üçün müxalifət partiyalarının yerlərdə insan resurslarının olmamasını açıq şəkildə bildirirdik. 2009-cu ilin seçki mənzərəsi də bunu əyani şəkildə göstərir. Ayrı-ayrı partiyaların öz insan resurslarının məhdudluğunu ört basdır etməkdən ötrü DSK-ları və yerli icra orqanlarını hədəf kimi seçmələrini səmərəli siyasi mübarizə forması saymıram.
- YAP ölkə üzrə bələdiyyələrin yarısından çoxunda namizədləri olduğu üçün qanunla İctimai Televeziyada ödənişsiz efir vaxtı almaq hüququ əldə edib. Ancaq digər partiyalardan heç biri bu imkanı qazana bilməyib. 2004-cü ildə də yalnız YAP bu hüququ əldə etsə də, bu imkandan istifadə etmədi. Builki seçkilərdə ödənişsiz efir vaxtı hüququndan istifadə edəcəksinizmi, yoxsa bundan imtina olunacaq?
- Bilirsiniz, əgər söhbət ödənişsiz təbliğatdan gedirsə, bunun məqsədi bir tərəfdən siyasi partiyalara dövlət tərəfindən imkan yaradılması mənası daşıyırsa, digər tərəfdən, debat təşkil etmək məqsədi güdür. İndiki halda YAP partiya şəklində seçkilərdə iştirak edən yeganə siyasi təşkilat olduğundan bu debatı aparmaq imkanı yoxdur. Belə olan halda, YAP-ın verilmiş bu imkandan istifadə etməsi də öz mənasını itirir. Bizim digər partiyaların nümayəndələri ilə diskussiyalar aparmaq imkanımız olmayacaq. Ona görə də, hesab edirəm ki, bu şəkildə televiziyada təşviqat aparmaq öz mənasını itirir. YAP-ın bütövlükdə müəyyənləşdirdiyi konsepsiyada əhəmiyyətli məqamlardan biri ondan ibarətdir ki, seçki təşviqatının bütün ağırlığını yerlərdə keçirək. çünki, bələdiyyə üzvləri yerlərdə seçiləcək. Belə olan halda, təşviqat da həmin bələdiyyənin ərazisində aparılmalıdır ki, namizədlərin həqiqətən bələdiyyə üzvlüyünə layiqli olduğunu bu ərazidə yaşayan insanların diqqətinə çatdıraq.
- Əli müəllim, fərdi qaydada namizədliyini irəli sürən YAP üzvləri də var. Onlara qarşı münasibət necə olacaq?
- Belə namizədlərin sayı çox deyil. Biz yerlərdə rayon və şəhər təşkilatlarının vasitəsilə partiya üzvləri arasında izahat işləri aparmışıq. Bunun da mahiyyəti ondan ibarətdir ki, bütün üzvlər YAP tərəfindən irəli sürülən namizədlərin təşviqatının aparılmasına kömək etməlidirlər. Və onu bildirmək istəyirəm ki, əsas etibarilə bu vəzifənin öhdəsindən gələ bilmişik. YAP üzvlərinin əksəriyyəti namizədlərin təşviqat kampaniyasında iştirak edəcəklər. Az sayda fərdi qaydada bələdiyyələrə namizədliyini irəli sürmüş YAP üzvləri də var. Bu məsələ ilə ciddi şəkildə məşğuluq. Fikrimcə, seçki kampaniyasının məntiqi də onu irəli sürür ki, bir partiya uğurlu seçki kampaniyası aparmaqdan ötrü onun bütün resursları, o cümlədən, insani resurslar bu məqsədə xidmət etməlidir. Əgər hansısa üzvümüz kampaniyanın uğurla aparılmasına maneçilik törədəcəksə, o, özünü partiyadan kənarda qoymuş olur. Bütövlükdə, bu məsələyə biz kütləvi deyil, fərdi qaydada yanaşacağıq və müvafiq qərarlar qəbul olunacaq.
Nardar BAYRAMLI

Paylaş:

Baxılıb: 1316 dəfə