Dövlət qulluğuna dair yeni kitab təqdim olunub

Bakı:

12 °C

82 %

4 m/s

Əlaqə

AZ RU EN

Ana səhifə / Siyasət / Dövlət qulluğuna dair yeni kitab təqdim olunub

Dövlət qulluğuna dair yeni kitab təqdim olunub

26.11.2013 [09:11]

Bu günlərdə Azərbaycan Respublikası Prezidenti yanında Dövlət İdarəçilik Akademiyasında “Dövlət qulluğu və kadr siyasəti” kafedrasının dosenti, hüquq üzrə fəlsəfə doktoru Nazənin Hüseynovanın “Dövlət qulluğu və kadr siyasəti” adlı yeni monoqrafiyasının təqdimatı keçirilib. Təqdimatda Akademiyanın professor-müəllim heyəti, həmçinin, tələbələr iştirak ediblər.
Tədbiri giriş sözü ilə açan Akademiyanın I Tədris işləri üzrə prorektoru, professor Əlikram Abdullayev kitabın aktuallığından və müasir dövr üçün əhəmiyyətindən bəhs edib. Akademiyanın Siyasi Araşdırmalar İnstitutunun müdiri professor Elman Nəsirov monoqrafiyada dövlət qulluğu ilə kadr siyasətinin qarşılıqlı əlaqəli şəkildə tədqiqinin, dövlət qulluğunun tarixi inkişafının, bu sahəyə dair nəzəri fikirlərin araşdırılmasının əhəmiyyətindən bəhs edib və monoqrafiyanın aktual mövzuya həsr olunduğunu xüsusilə diqqətə çatdırıb.
“Rəhbər kadrların ixtisasının artırılması” fakültəsinin dekanı professor Gülnarə Qurbanova monoqrafiyanın dolğun məzmunundan bəhs edib, dövlət qulluğu ilə kadr siyasətinin qarşılıqlı əlaqədə təhlil olunmasının, həmçinin, yalnız nəzəri deyil, praktiki bilikləri də əhatə etməsinin əhəmiyyətini vurğulayıb və onun bu sahəyə dair fənnlərin tədrisi prosesində də əhəmiyyətli mənbə ola biləcəyini qeyd edib.
Qeyd edək ki, Nazənin Hüseynovanın təqdim olunan yeni monoqrafiyası Azərbaycan Respublikasının Prezidenti yanında Dövlət İdarəçilik Akademiyasının Tədris-Metodik Şurasının 27.06.2013-cü il tarixli qərarı ilə çapa tövsiyə edilib. Monoqrafiyanın elmi redaktoru fəlsəfə elmləri doktoru, professor Əlikram Abdullayev, rəyçiləri hüquq elmləri doktoru, professor Mayis Əliyev və siyasi elmləri doktoru, professor Elman Nəsirovdur.
Kitabda dövlət qulluğunun ümumi səciyyəsi verilir, onun mahiyyəti, mənşəyi, vəzifə və prinsipləri, beynəlxalq təcrübədə mövcud olan əsas modelləri nəzərdən keçirilir və dövlət qulluğu ilə kadr siyasətinin qarşılıqlı əlaqəsindən, kadr siyasətinin məzmunundan, strukturundan, kadr texnologiyalarından və kadr siyasətinin əsas icra mexanizmlərindən bəhs olunur.
Monoqrafiyada dövlətin məqsəd və funksiyalarının yerinə yetirilməsi, dövlət qulluğunun nüfuzunun, dövlət orqanlarının fəaliyyətində səmərənin və çevikliyin artırılması, vətəndaş məmnunluğunun təmin olunması, dövlət orqanlarının yüksək ixtisaslı, peşəkar və kreativ kadrlarla təmin edilməsi, kadr potensialının inkişaf etdirilməsi və s. dövlət qulluğunun qarşısında duran əsas vəzifələr kimi qiymətləndirilir.

Paylaş:

Baxılıb: 1182 dəfə