Bakı Ali Neft Məktəbində 20 Yanvar faciəsinin 24-cü ildönümü ilə bağlı tədbir keçirilib

Bakı:

14 °C

77 %

4 m/s

Əlaqə

AZ RU EN

Ana səhifə / Siyasət / Bakı Ali Neft Məktəbində 20 Yanvar faciəsinin 24-cü ildönümü ilə bağlı tədbir keçirilib

Bakı Ali Neft Məktəbində 20 Yanvar faciəsinin 24-cü ildönümü ilə bağlı tədbir keçirilib

18.01.2014 [08:54]

Mübariz Qurbanlı: Biz hamımız bu faciəni törətmiş şəxslərin ədalət qarşısında cavab verməsi üçün çalışmalıyıq
Dünən Bakı Ali Neft Məktəbində 20 Yanvar faciəsinin 24-cü ildönümü ilə bağlı tədbir keçirilib. Tədbiri giriş sözü ilə açan Bakı Ali Neft Məktəbinin rektoru Elmar Qasımov bildirib ki, “qanlı tarix” illər, əsrlər ötsə də, insanlarımızın xatirəsində hər zaman yaşayacaq. Onun sözlərinə görə, bu, həqiqətən də Azərbaycanın salnaməsinə yazılmış qanlı tarixdir: “Lakin Azərbaycan xalqı bu günü yalnız hüzn və matəm günü olaraq qeyd etməməlidir. 20 Yanvar gecəsi baş verən faciə, eyni zamanda, millətimizin tarixinə azadlıq uğrunda ümummilli savaş kimi daxil oldu. 1990-cı ilin yanvar ayının “Qanlı Şənbə” axşamı, illərdən bəri azad yaşamaq istəyən xalqımızın mərd oğul və qızları azadlıq uğrunda ilk qəti addımlarını atdılar. Yəni, bizim bu günümüz üçün öz canlarını fəda etdilər. Vətən şəhidlərini heç vaxt unutmayacaq. 20 Yanvar Azərbaycan xalqının hüzn və şərəf günüdür. Xalqımız bu faciədə həyatdan getmiş övladlarına matəm saxlamaqla bərabər, eyni zamanda onların şəhidlik zirvəsinə baxaraq başını dik tutmalıdır, çünki Vətən və torpaq şəhidləri ilə ucalır”.
E.Qasımov qeyd edib ki, Ümummilli liderimiz Heydər Əliyev hələ Moskvada yaşayarkən, həyatını böyük təhlükə altında qoyaraq, hadisənin səbəbkarlarına kəskin etirazını bildirib.
Tədbirdə çıxış edən Yeni Azərbaycan Partiyası (YAP) İcra katibinin müavini, millət vəkili Mübariz Qurbanlı bildirib ki, 24 il öncə Azərbaycan xalqının taleyində nəhs və qorxunc günlər yaşanırdı. Onun sözlərinə görə, xalqımız qırmızı imperiyanın “Qızıl ordusu”nun, sovet hərb maşınının zoruna məruz qalmışdı: “Xalqımız təcavüzə uğramış, günahsız insanlar gülləbaran edilmiş, milli heysiyyatımız tankların altına atılmışdı. 20 Yanvar faciəsi Azərbaycan xalqını qorxutmaq, onun milli oyanışını, Qarabağ uğrunda mübarizliyini məhv edib sındırmaq məqsədi daşıyan mənfur planın tərkib hissəsi idi”.
M.Qurbanlı qeyd edib ki, həmin gün Azərbaycanın o vaxtkı rəhbərliyinin istəyi və SSRİ rəhbərliyinin əmri ilə Azərbaycanda kommunist rejimini saxlamaq və milli azadlıq hərəkatını boğmaq məqsədilə Bakıya böyük bir ordu yeridilib. “SSRİ Müdafiə Nazirliyi, DİN və DTK-nın hazırlayıb həyata keçirdiyi “Udar” adlı əməliyyatda əsas rolu xüsusi təyinatlı “ALFA” və SSRİ DTK-nın “A” təxribat qrupları oynayırdı. Sovet qoşunlarının təcavüzü nəticəsində Bakıda 137 mülki vətəndaş öldürülmüş, 700-dən çox adam yaralanmışdı. Öldürülənlər arasında beş millətin nümayəndələri, 20-dən çox qadın, uşaq var idi. “Qara Yanvar”ın indiyədək özündə saxladığı sirlər çoxdur. Azərbaycan Respublikasının Prezidenti cənab İlham Əliyevin rəhbərliyi altında bütün dövlət və hökumət nümayəndələri var gücləri ilə çalışırlar ki, Azərbaycan xalqının başına gətirilmiş bütün müsibətlər və faciələr dünya dövlətləri tərəfindən tanınsın və bu hadisələrə hüquqi qiymət verilsin. Biz hamımız əl-ələ verib bu faciəni törətmiş şəxslərin ədalət qarşısında cavab verməsi üçün çalışmalıyıq” - deyə, YAP İcra katibinin müavini vurğulayıb.
Tədbirdə 20 Yanvar faciəsi zamanı lentə alınmış görüntüləri əks etdirən film nümayiş etdirilib.
Nardar BAYRAMLI

Paylaş:

Baxılıb: 879 dəfə