Gürcüstanın Baş naziri İrakli Qaribaşvili Azərbaycana rəsmi səfər edib

Bakı:

20 °C

56 %

4 m/s

Əlaqə

AZ RU EN

Ana səhifə / Siyasət / Gürcüstanın Baş naziri İrakli Qaribaşvili Azərbaycana rəsmi səfər edib

Gürcüstanın Baş naziri İrakli Qaribaşvili Azərbaycana rəsmi səfər edib

13.09.2014 [10:58]

Azərbaycanda rəsmi səfərdə olan Gürcüstanın Baş naziri İrakli Qaribaşvili sentyabrın 12-də “Bakı Ağ şəhər” layihəsi ilə tanış olub.
Baş nazir İrakli Qaribaşviliyə “Bakı Ağ şəhər” layihəsi haqqında ətraflı məlumat verilib. Layihənin İnkişaf Departamentinin rəhbəri Fuad Verdiyev bildirib ki, burada şəhərsalma işləri Prezident İlham Əliyevin Sərəncamı ilə təsdiq olunmuş “2006-2010-cu illərdə Azərbaycan Respublikasında ekoloji vəziyyətin yaxşılaşdırılması üzrə kompleks tədbirlər planı” çərçivəsində həyata keçirilir. “Bakı Ağ şəhər”in təməl daşı 2011-ci il dekabrın 24-də Prezident İlham Əliyev tərəfindən qoyulub.
Layihənin hazırlanmasında yerli mütəxəssislərlə yanaşı, xarici şirkətlərin əməkdaşları da iştirak edirlər. Bildirilib ki, layihə “MİPİM Asia Awards 2011” müsabiqəsinin “Mərkəzi və Qərbi Asiyada gələcəyin ən yaxşı layihəsi” nominasiyasının qalibi olub, habelə “Cityspace Global 2011” sərgisində “Ən yaxşı şəhərsalma layihəsi” nominasiyasında mükafat alıb.
“Bakı Ağ şəhər” layihəsi Gürcüstanın Baş nazirində böyük maraq doğurub.
* * *
Sentyabrın 12-də Gürcüstanın Baş naziri İrakli Qaribaşvili ölkəmizdə və regionda ilk dəfə keçirilən Azərbaycan Beynəlxalq müdafiə sənayesi - “ADEX 2014” sərgisi ilə tanış olub.
Bakı Ekspo Mərkəzində nümayiş olunan sərgi barədə Gürcüstanın Baş naziri İrakli Qaribaşviliyə ətraflı məlumat verilib. Bildirilib ki, sərgidə dünyanın 34 ölkəsindən 200 şirkət və 22 rəsmi nümayəndə heyəti iştirak edir.
Gürcüstanın Baş naziri əvvəlcə Azərbaycanın Müdafiə Sənayesi Nazirliyinin stendinə baxıb. Sərgiyə 37 şirkətlə qatılan Azərbaycan irimiqyaslı ekspozisiyası ilə fərqlənir. Azərbaycan “ADEX 2014”də 168 adda məmulat nümayiş etdirir.
Baş nazir Türkiyə, Rusiya, Belarus, Koreya Respublikası, Polşa, İsrail və Ukraynanın milli qruplarının ekspozisiyaları ilə də tanış olub.
Gürcüstanın Baş nazirinə məlumat verilib ki, bu sərgi milli hərbi sənaye potensialının nümayişi, hərbi sənaye kompleksinin müxtəlif sahələrində istifadə olunan müasir müdafiə texnologiyaları və nümunələri, o cümlədən də ən yeni hərbi texnika növləri ilə tanışlıq, beynəlxalq əməkdaşlıq əlaqələrinin qurulması baxımından əhəmiyyətlidir. Qeyd olunub ki, bu sərgiyə olan böyük maraq Azərbaycanın mühüm strateji tərəfdaş kimi yüksək rolunu və əhəmiyyətini bir daha təsdiqləyir. Gürcüstanın Baş naziri İrakli Qaribaşviliyə məlumat verilib ki, bu cür ixtisaslaşdırılmış sərginin keçirilməsi Azərbaycanda hərbi sənayenin inkişafına təkan verməklə yanaşı, ölkədə istehsal edilən hərbi məhsulların dünya bazarında rəqabətə davamlı olmasına da töhfə verəcək.
Sonra qonaq sərginin Bakı Ekspo Mərkəzinin həyətində təşkil olunan digər hissəsinə baxıb.
* * *
Sentyabrın 12-də Gürcüstanın Baş naziri İrakli Qaribaşvilinin Azərbaycan Respublikasına rəsmi səfəri başa çatıb.
Hər iki ölkənin dövlət bayraqlarının dalğalandığı Heydər Əliyev Beynəlxalq Aeroportunda hörmətli qonağın şərəfinə fəxri qarovul dəstəsi düzülüb.
Gürcüstanın Baş naziri İrakli Qaribaşvilini hava limanında Azərbaycanın Baş nazirinin müavini Abid Şərifov və digər rəsmi şəxslər yola salıblar.