“İslam Əməkdaşlıq Təşkilatına üzv dövlətlərin inkişafında qadınların rolu” mövzusunda V Beynəlxalq konfrans başa çatıb

Bakı:

28 °C

62 %

2 m/s

AZ RU EN

Ana səhifə / Siyasət / “İslam Əməkdaşlıq Təşkilatına üzv dövlətlərin inkişafında qadınların rolu” mövzusunda V Beynəlxalq konfrans başa çatıb

“İslam Əməkdaşlıq Təşkilatına üzv dövlətlərin inkişafında qadınların rolu” mövzusunda V Beynəlxalq konfrans başa çatıb

22.10.2014 [09:41]

Oktyabrın 21-də Bakıda “İslam Əməkdaşlıq Təşkilatına (İƏT) üzv dövlətlərin inkişafında qadınların rolu” mövzusunda V Beynəlxalq konfrans başa çatıb.
AzərTAc xəbər verir ki, tədbirin ikinci günü “İslam Əməkdaşlıq Təşkilatına üzv dövlətlərdə qadınların səlahiyyətlərinin artırılması” layihəsi üzrə UNDP-Türkiyə təqdimatları olub. Eyni zamanda, İslam ölkələri üçün statistik, iqtisadi, sosial tədqiqat və təlim Mərkəzinin İƏT-ə üzv dövlətlərin qadınlara baxışına dair təqdimatı keçirilib.
Tədbirdə çıxış edənlər bildiriblər ki, İƏT-ə üzv olan bəzi dövlətlərdə qadınların səhiyyə, təhsil sahəsində problemləri hələ də qalmaqdadır və bununla bağlı ciddi islahatlara ehtiyac var. Əlbəttə, İƏT-ə üzv ölkələrdə qadınların şəraitinin yaxşılaşdırılması, onların müxtəlif sahələrdə iştirakının təmin edilməsi sahəsində xeyli irəliləyişə nail olunub. Amma bu, kifayət deyil. Qadınların və qızların təhsildən kənarda qalmaları, zorakılıqla üzləşmələri onları siyasi proseslərdən də kənarda qoyur. Qadınların inkişafının təminatı üçün onların təhsilə cəlb edilmələri əsas məsələlərdən biridir. Bu, qadınların özünü yetişdirmələrinə, işlə təmin olunmalarına, həyatın müxtəlif sahələrində onların fəallıqlarının artırılmasına öz töhfəsini verəcək.
Qeyd edilib ki, qadınların inkişafına mane olan əsas məsələlərdən biri də erkən nikahdır. Təəssüf ki, İƏT-ə üzv olan bəzi dövlətlərdə bu sahədə istənilən nailiyyət əldə edilməyib. Qadınların iqtisadi azadlıqlarının olmaması və işsiz qalmaları özü ilə müəyyən psixoloji problemlər gətirir. Sağlam və güclü bir qadın sağlam bir ailə deməkdir. Turizm sahəsində qadınlar üçün daha çox imkanlar var. Gender bərabərliyi sahəsində də islahatlara ehtiyac duyulur.
İdarəetmədə qadınların rolunun artması cəmiyyətdə demokratiyanın inkişafının göstəricisidir.
Bildirilib ki, konfransda qadınların vəziyyətinin yaxşılaşdırılması istiqamətində səslənən təklifləri həyata keçirmək üçün əlavə tədbirlər planı hazırlanmalıdır. Qadınların vəziyyətinin yaxşılaşdırılması üçün siyasi mexanizmlər də tərtib edilməlidir.
Çıxış edənlər əminliklə deyiblər ki, bu konfrans qadınların problemlərinin həllinə öz töhfəsini verəcək. Bütün üzv dövlətlər öz səylərini gücləndirməlidirlər ki, bu çağırışlara cavab verilsin.
İştirakçılar konfransın yüksək səviyyədə təşkilinə görə Azərbaycan hökumətinə, xüsusilə Azərbaycanın birinci xanımı, Heydər Əliyev Fondunun prezidenti Mehriban Əliyevaya təşəkkürlərini bildiriblər.
Tədbirdə bir sıra təkliflər səslənib, suallar cavablandırılıb.
Konfransın yekununda Bakı Bəyannaməsi qəbul olunub.

Paylaş:

Baxılıb: 709 dəfə