Yaşıl iqtisadiyyat, enerji effektivliyi və ətraf mühit

Bakı:

16 °C

88 %

3 m/s

Əlaqə

AZ RU EN

Ana səhifə / Siyasət / Yaşıl iqtisadiyyat, enerji effektivliyi və ətraf mühit

Yaşıl iqtisadiyyat, enerji effektivliyi və ətraf mühit

22.10.2014 [09:56]

Yaşıl iqtisadiyyat, enerji effektivliyi və ətraf mühit oktyabrın 21-də Bakıda işə başlayan konfransın əsas mövzusudur.
AzərTAc xəbər verir ki, konfransda müxtəlif ölkələrin dövlət və özəl qurumlarının nümayəndələri, ekologiya sahəsində fəaliyyət göstərən alimlər və aparıcı mütəxəssislər, neft-qaz şirkətlərinin təmsilçiləri iştirak edir.
Azərbaycan Memarlıq və İnşaat Universitetinin rektoru, professor Gülçöhrə Məmmədova çıxış edərək konfransın elm və texnologiyaların ən yeni nailiyyətlərinin tətbiqi ilə ənənəvi və qeyri-ənənəvi enerji mənbələrindən səmərəli istifadə etmək, yüksək enerji qənaətinə nail olmaq, yanacaq və enerji mənbələrinin işlənməsinin ətraf mühitə mənfi təsirinin aradan qaldırılması yollarının öyrənilməsi məqsədi daşıdığını deyib.
Tədbirin əhəmiyyətindən danışan G.Məmmədova bildirib ki, əsas məqsəd davamlı inkişaf üçün ətraf mühitin mövcud vəziyyətinin kompleks təhlilini aparmaq, bu sahədə yeni üsul və texnologiyalardan istifadə təcrübəsini bölüşmək və ətraf mühitin mühafizəsi üzrə təkliflər işləyib hazırlamaqdır. Artıq 10 ildən çoxdur ki, Memarlıq və İnşaat Universitetində ekologiya mühəndisliyi ixtisası yaradılıb. Ötən müddətdə bu ali təhsil ocağı bir çox Avropa universitetləri ilə ətraf mühit və ekologiya sahələrində əlaqələr qurub.
Belə tədbirlərin neft-qaz sənayesinin yaratdığı ekoloji problemlərin həllində əhəmiyyətli rol oynadığını deyən Azərbaycan Respublikası Dövlət Neft Şirkətinin (ARDNŞ) ekologiya üzrə vitse-prezidenti Rəfiqə Hüseynzadə ARDNŞ tərəfindən ətraf mühitin mühafizəsi istiqamətində həyata keçirilən layihələrdən və görüləcək işlərdən danışıb. Ekologiyanın qorunması məsələlərinin dövlət siyasətinin prioritet istiqamətlərindən biri olduğunu vurğulayan ARDNŞ-in vitse-prezidenti bildirib ki, 2006-cı ildən indiyədək neft məhsulları ilə çirklənmiş 1400 hektar ərazi rekultivasiya edilərək abadlaşdırılıb. Bərpa edilmiş ərazilərdə 600 minə yaxın müxtəlif növ ağac və dekorativ kol əkilib.
R.Hüseynzadə Avropanın enerji effektivliyinin təmin olunmasında əhəmiyyətli rol oynayacaq TANAP və TAP layihələrində də ətraf mühitin qorunmasına xüsusi diqqət yetiriləcəyini deyib. O, ARDNŞ-in Azərbaycanda fəaliyyət göstərən xarici şirkətlər, xüsusilə bp ilə ətraf mühitin mühafizəsi istiqamətində sıx əməkdaşlıq etdiyini diqqətə çatdırıb.
Azərbaycan Respublikası Torpaq və Xəritəçəkmə Komitəsinin sədri Qərib Məmmədov konfrans iştirakçılarına torpaq ehtiyatlarından səmərəli istifadə olunması və onların mühafizəsi, torpaqların münbitliyinin bərpası və artırılması istiqamətində görülən işlər barədə məlumat verib. Bildirib ki, komitə torpaqların eroziyadan, şorlaşma, şorakətləşmə və müxtəlif antropogen və texnogen çirklənmələrdən mühafizəsi, münbitliyin qorunması layihələrini aidiyyəti təşkilatlarla birlikdə hazırlayır və həmin layihələrin yerinə yetirilməsinə nəzarət edir.
Q.Məmmədov konfrans iştirakçılarını interaktiv xəritə interfeysi, Dövlət Torpaq və Xəritəçəkmə Komitəsi tərəfindən hazırlanaraq qurumun geoserverində yerləşdirilmiş Regionların İnkişafı Analitik İnformasiya Sistemi barədə də məlumatlandırıb.
Konfrans öz işini plenar iclaslarla davam etdirib.
İki gün davam edəcək konfransın əsas istiqamətlərinə antropogen amillərin təsiri nəticəsində atmosfer havasının, su və torpaq ehtiyatlarının çirklənməsi ilə bağlı problemlərin müzakirəsi, Xəzər dənizinə və Kür çayına atılan tullantıların öyrənilməsi, monitorinqin aparılması, xarici elm mərkəzlərinin və universitetlərin iştirakı ilə birgə təhsil proqramlarının işlənib hazırlanması da daxildir.
Tədbirin təşkilatçıları Memarlıq və İnşaat Universiteti, ARDNŞ və Beynəlxalq Ekoenergetika Akademiyasıdır.

Paylaş:

Baxılıb: 650 dəfə