Milli Məclisin növbəti plenar iclası keçirilib

Bakı:

28 °C

57 %

3 m/s

Əlaqə

AZ RU EN

Ana səhifə / Siyasət / Milli Məclisin növbəti plenar iclası keçirilib

Milli Məclisin növbəti plenar iclası keçirilib

29.10.2014 [10:08]

Parlamentin dünənki iclasında ümumilikdə 21 qanun və qərar qəbul edilib
Dünən Milli Məclisin növbəti plenar iclası keçirilib. Milli Məclisin sədri Oqtay Əsədov iclası açdıqdan sonra gündəlik elan edilib və təsdiq olunub.
Əvvəlcə cari məsələlər müzakirə olunub. Deputatlar ermənilərin girov götürdükləri azərbaycanlıların Dağlıq Qarabağda keçirilən qondarma “məhkəməsi”nə, Azərbaycana ikili standartlardan yanaşılması ilə bağlı məsələlərə münasibət bildiriblər. Girov götürülən həmvətənlərimizə ağır işgəncələr verildiyi diqqətə çatdırılaraq bildirilib ki, bununla bağlı İnsan Hüquqları üzrə Avropa Məhkəməsinə, Avropa Şurasının İşgəncələr Əleyhinə Komitəsinə müraciət edilməli, beynəlxalq təşkilatlar qarşısında tələb qaldırılmalıdır.
Milli Məclisin sədri Oqtay Əsədov da Azərbaycana qarşı ikili standartların mövcud olduğunu qeyd edib. “Bu gün Azərbaycan dinamik inkişaf edir. Ölkə Prezidenti milli maraqlarımıza əsaslanan uğurlu siyasət həyata keçirir” - deyən, Oqtay Əsədov bildirib ki, bəzi beynəlxalq qurumların və dövlətlərin ölkəmizə qarşı ikili standartlarla yanaşmasının səbəbi bu amillərlə bağlıdır. Onun sözlərinə görə, Azərbaycan dövləti müstəqil siyasət həyata keçirir ki, bu da bir çoxlarının xoşuna gəlmir: “İkili standartlar da məhz burdan yaranır. Azərbaycan bütün dövlətlərlə bərabərhüquqlu ikitərəfli münasibətlər qurmaq istəyir. Bu yanaşmanı da müəyyən xarici qüvvələr qəbul etmək istəmirlər. Ona görə də, Azərbaycanın bir yolu var. Biz öz inkişafımıza davam edib daha da güclənməliyik”.
Milli Məclisin Sosial siyasət komitəsinin sədr müavini Musa Quliyev isə çıxışında diplomatik pasportu olan şəxslərin xarici səfərlərə ezamiyyətləri zamanı tibbi sığoratlanmasını təklif edib. Onun sözlərinə görə, bu sığorta tətbiq olunmadığı üçün ezamiyyətdə olanlar xəstələnərsə müalicə üçün ya ölkəmizə qayıtmalı, ya da xaricdə öz vəsaiti hesabına xəstəxanaya müraciət etməlidir. Ona görə də, millət vəkili bu məsələnin qanunla tənzimlənməsini təklif edib.
Daha sonra iclasın gündəliyində duran məsələlər müzakirə olunub. Millət vəkilləri əvvəlcə Əli Rüstəmovun Ali Məhkəmənin hakimi təyin olunması haqqında qərar qəbul ediblər. Daha sonra “Polis haqqında” qanuna dəyişikliklər məsələsi müzakirəyə çıxarılıb. Bu barədə parlamentin Hüquq siyasəti və dövlət quruculuğu komitəsinin sədri Əli Hüseynli məlumat verib. Ə.Hüseynli bildirib ki, “Polis haqqında” qanunun 26-cı maddəsinə təklif edilən dəyişikliyə əsasən yalnız müvafiq icra hakimiyyəti (Daxili İşlər Nazirliyi) tərəfindən siyahısı müəyyən olunan polis əməkdaşları elektroşokdan istifadə edə biləcəklər.
Dəyişikliyə görə, elektroşok vasitələri insan həyatına və sağlamlığına real təhlükə yaradan basqın və ya digər zorakılıq edildikdə, qiyam və ya kütləvi iğtişaşlar baş verdikdə, yaşayış binalarına, habelə müəssisələrin, idarələrin, təşkilatların binalarına qrup halında basqın dəf edildikdə, tutulan şəxs tərəfindən silahlı müqavimət göstərildikdə və ya göstəriləcəyinə ehtimal etməyə kifayət qədər əsas olduqda istifadə oluna bilər. Bununla yanaşı, cinayət törədilməsində şübhəli bilindiyinə görə tutulmuş, barəsində həbs qətimkan tədbiri seçilmiş və ya müəyyən müddətə azadlıqdan məhrumetmə, yaxud ömürlük azadlıqdan məhrumetmə növündə cəzaya məhkum olunmuş şəxsin həbsdən qaçmasının qarşısını aldıqda, habelə bu şəxsin qanunsuz azad edilməsi üçün kənar şəxslər tərəfindən güc işlədildikdə elektroşok vasitəsinin istifadəsi mümkün olacaq. Hazırkı qanunvericiliyə görə isə elektroşokdan istifadədə məhdudiyyət yoxdur. İdarə və bölmə rəislərinin, komandirlərin icazəsi ilə hər bir polis nəfəri elektroşokdan istifadə edə bilər. Sənəd müzakirələrdən sonra qəbul olunub.
İclasda, həmçinin, bir sıra qanunlara əlavə və dəyişikliklər edilib. Bütövlükdə, parlamentin dünənki iclasında 21 məsələ müzakirə edilərək qəbul olunub.
Nardar BAYRAMLI

Paylaş:

Baxılıb: 1649 dəfə