Gənclər siyasəti üzrə birinci qlobal forum Bakı Bəyannaməsinin qəbulu ilə başa çatıb

Bakı:

23 °C

56 %

5 m/s

Əlaqə

AZ RU EN

Ana səhifə / Siyasət / Gənclər siyasəti üzrə birinci qlobal forum Bakı Bəyannaməsinin qəbulu ilə başa çatıb

Gənclər siyasəti üzrə birinci qlobal forum Bakı Bəyannaməsinin qəbulu ilə başa çatıb

31.10.2014 [09:54]

Bakıda keçirilən Gənclər siyasəti üzrə birinci qlobal forum oktyabrın 30-da başa çatıb.
AzərTAc xəbər verir ki, forumun sonuncu günü keçirilən regional sessiyalarda Afrika, Ərəb ölkələri (Qərbi Asiya), Asiya və Sakit Okean, Avropa və Mərkəzi Asiya, Latın Amerikası və Karib hövzəsi ölkələrində gənclər siyasəti, gənclərin inkişafı ilə bağlı görülən işlər müzakirə edilib, təcrübə mübadiləsi aparılıb.
Sonra sessiyaların moderatorları müzakirələrlə bağlı hesabat veriblər. BMT baş katibinin gənclər üzrə elçisi Əhməd Əlhəndavinin moderatorluğu ilə keçirilən sessiyada çıxış edənlər gənclərin siyasi proseslərdə iştirakı və bu proseslərə göstərdikləri təsir, dünya gənclər təşkilatlarının fəaliyyəti, gənclər arasında işsizliklə bağlı problemlər, gənclərin sahibkarlıq fəaliyyəti, yaxşı ali təhsil almağın əhəmiyyəti haqqında danışıblar. Müxtəlif ölkələri təmsil edən nümayəndələr “Ebola” virusuna qarşı birgə mübarizənin vacibliyini vurğulayıblar, bu işdə həmrəyliklərini nümayiş etdiriblər.
Sonra BMT baş katibinin 2015-ci ildən sonrakı İnkişaf Planı üzrə xüsusi məsləhətçisi Əminə Muhammadın forum iştirakçılarına videomüraciəti nümayiş olunub. Müraciətdə dünya gənclərinin ilk qlobal tədbirinin yüksək səviyyədə təşkilinə görə Azərbaycan hökumətinə minnətdarlıq ifadə olunub, forumun əhəmiyyəti vurğulanıb.
Daha sonra forumun “Nəticələr, öhdəliklər və fəaliyyətlər” mövzusunda son sessiyası keçirilib. Avropa Şurası gənclər departamentinin təhsil və təlim bölməsinin rəhbəri Rui Qomesin moderatorluğu ilə keçirilən sessiyada üç gün ərzində forumda aparılan səmərəli müzakirələrdən, səsləndirilən maraqlı ideyalardan danışılıb.
Azərbaycanın gənclər və idman naziri Azad Rəhimov çıxış edərək forumda gənclərlə bağlı bir sıra mühüm məsələlərin müzakirə olunduğunu bildirib. Nazir müzakirələr zamanı əsas diqqətin gənclər və dövlət, gənclər və cəmiyyət arasında münasibətlərə ayrıldığını söyləyib. O, forumun gənclərə təcrübə mübadiləsi aparmaq üçün yaxşı imkan yaratdığını və bu tədbirin bir çox maraqlı məqamlarla yadda qaldığını diqqətə çatdırıb.
A.Rəhimov deyib ki, gələcəyimiz olan gənclərə böyük diqqət göstərmək çox vacibdir. Onların inkişafı üçün ən önəmli məsələlərdən biri də keyfiyyətli təhsildir. Azərbaycan coğrafi baxımdan çox önəmli məkanda yerləşir. Biz gənclərimizin digər ölkələrin gəncləri ilə daim ünsiyyətdə olmalarını və yaxşı təcrübə qazanmalarını istəyirik.
Azərbaycanın dünyada baş verən proseslərə ciddi yanaşdığını vurğulayan A.Rəhimov Prezident İlham Əliyevin göstərişi ilə ölkəmizin “Ebola” virusu ilə mübarizə üçün BMT-nin Qlobal Fonduna bir milyon dollar yardım edəcəyini xatırladıb.
Küveytin gənclər məsələləri üzrə dövlət naziri Şeyx Salman Sabah Salem əl-Hamud əl-Sabah bildirib ki, biz forumda əldə etdiyimiz təcrübəni öz ölkəmizdə gənclər siyasətinin inkişafında istifadə edəcəyik. Forum dünya gəncləri üçün böyük əhəmiyyətə malikdir. Küveytli nazir növbəti forumun da bu cür müvəffəqiyyətlə keçiriləcəyinə əminliyini ifadə edib, bu tədbirin yüksək səviyyədə təşkilinə görə Azərbaycan hökumətinə təşəkkürünü bildirib.
Sonda forumun Bakı Bəyannaməsi qəbul olunub.
Bununla da üç gün davam edən Gənclər siyasəti üzrə birinci qlobal forum öz işini başa çatdırıb.

Paylaş:

Baxılıb: 678 dəfə