Azərbaycanın Ermənistanla müqayisəsi doğru deyil

Bakı:

29 °C

55 %

1 m/s

Əlaqə

AZ RU EN

Ana səhifə / Siyasət / Azərbaycanın Ermənistanla müqayisəsi doğru deyil

Azərbaycanın Ermənistanla müqayisəsi doğru deyil

20.11.2014 [10:07]

Siyavuş Novruzov: Bu gün Azərbaycan Avropa İttifaqına daxil olan ölkələrlə, ən pis halda isə Qazaxıstan və Rusiya ilə müqayisə oluna bilər
“Azərbaycanın Ermənistanla müqayisəsi doğru deyil. Bu gün Azərbaycan Avropa İttifaqına daxil olan ölkələrlə, ən pis halda isə Qazaxıstan və Rusiya ilə müqayisə oluna bilər. Azərbaycanın Ermənistanla müqayisəsi bu gün üçün uğursuz addımdır”. Bu fikirləri Yeni Azərbaycan Partiyası (YAP) İcra katibinin müavini, millət vəkili Siyavuş Novruzov Milli Məclisin dünən keçirilən plenar iclasında 2015-ci ilin dövlət büdcəsinin layihəsinin müzakirəsi zamanı deyib.
S.Novruzov bildirib ki, ölkəmizin müdafiə xərcləri üçün ayrılan vəsait Ermənistanın ümumi büdcəsindən artıqdır. Onun sözlərinə görə, ölkəmizin ərzaq təhlükəsizliyi də vacib məsələdir: “Bu gün Rusiyanın timsalında görürük ki, ərzaq təhlükəsizliyi ölkə üçün nə dərəcədə vacibdir. Buna görə də, Azərbaycanda kənd təsərrüfatının inkişafı üçün mütləq şəkildə kreditlərin verilməsində müəyyən güzəştlər tətbiq edilməlidir. Fermerlər üçün uzunmüddətli kreditlərin verilməsi daha məqsədəuyğundur. Kimsə özünə şəxsi avtomobil almaq istəyirsə, ona verilən kreditlə əkin əkmək istəyən vətəndaşa verilən kredit fərqlənməlidir. Əkinçi də taxıl əkir, bəzən quraqlıq səbəbindən məhsul olmur, onda krediti də ödəyə bilmir”.
İpoteka kreditlərindən danışan YAP İcra katibinin müavini qeyd edib ki, bu gün hər hansı bir nazirliyin idarə rəisinin, dövlət qulluqçusunun əməkhaqları imkan vermir ki, ipoteka krediti götürsün. Belə olan halda, müəllim, həkim, gənc mütəxəssis necə ala bilər? “Banklar vətəndaşa 100 min manat pul verirsə, bunun müqabilində 200 minlik girov qoyulmasını tələb edir. Görünən odur ki, ipoteka krediti imkanlı adamların istifadə etməsinə nəzərdə tutulub ki, onlar bununla kəm-kəsirlərini tamamlasınlar. Halbuki, Prezident İlham Əliyevin səsləndirdiyi şüar odur ki, görülən işlərin hamısı vətəndaşlar üçün olmalıdır”, - deyə millət vəkili vurğulayıb.
S.Novruzov ölkəmizdə təhsilin səviyyəsi barədə də fikirlərini bildirib: “Azərbaycanda təhsil sistemində müxtəlif üsullar tətbiq olunsa da, təhsil alanların faizi, ali məktəblərə qəbul olunmaq üçün ballar ilbəil azalır”.
Onun sözlərinə görə, Azərbaycanda müəllimlərin sayı lazım olandan artıqdır: “Məhz bu sahədə islahatlara ehtiyac var. Müəllimlərlə bağlı attestasiya aparılmalı, bundan sonra əməkhaqqı artırılmalıdır”.
S.Novruzov orta məktəblərdə hərbi dərslərin də bərpasının vacib olduğunu söyləyib: “Məktəblərdə hərbi dərslər bərpa olunmalı, fiziki hazırlıq dərslərinə ciddi yanaşılmalı, bununla bağlı imtahan olmalıdır. Gedin, orta məktəbin qarşısında şagirdlərə baxın, görün, bizim uşaqların fiziki hazırlığı hansı səviyyədədir? Bu gün məktəblərdə hərbi və idman dərsləri bərpa olunmalıdır. Biz kişi yetişdiririk, bizə əsgər lazımdır. Sabah “İŞİD” gələndə bəstəkar axtarmayacağıq, onun qarşısına əsgər çıxmalıdır”.
Millət vəkili dərsliklərin həddindən artıq ağır olduğunu və bunun uşaqlara problem yaratdığını da qeyd edib: “Kitablar çox qalın olur, üz qabıqları ağır materialdan hazırlanır. Kitablar qalın olsa da, içi boşdur. Dərs sisteminə də baxmaq lazımdır. Normal dərs verib, normal insan yetişdirmək lazımdır”.
S.Novruzov, həmçinin, siyasi partiyalar üçün də büdcədən maliyyə vəsaitinin artırılmasını təklif edib.
N.BAYRAMLI

Paylaş:

Baxılıb: 763 dəfə