Politoloq: Ermənilər işğal olunmuş ərazilərdə kütləvi məzarlıqların üzə çıxacağından narahatdırlar

Bakı:

28 °C

52 %

3 m/s

AZ RU EN

Ana səhifə / Siyasət / Politoloq: Ermənilər işğal olunmuş ərazilərdə kütləvi məzarlıqların üzə çıxacağından narahatdırlar

Politoloq: Ermənilər işğal olunmuş ərazilərdə kütləvi məzarlıqların üzə çıxacağından narahatdırlar

26.02.2015 [00:10]

“Əldə etdiyimiz səhih məlumatlara əsasən, ermənilər DNT analizlərinin toplanması prosesində işğal olunmuş ərazilərdə kütləvi məzarlıqların üzə çıxacağından narahat olaraq əsir-girov və itkin düşmüş şəxslərlə bağlı əməkdaşlıqdan və bu sahədə informasiya mübadiləsindən yayınırlar”.
Bunu APA-ya Siyasi İnnovasiya və Texnologiya Mərkəzinin sədri Mübariz Əhmədoğlu Fransa prezidenti Fransua Olandın təşəbbüsü ilə Azərbaycan və Ermənistan dövlət başçıları arasında Parisdə keçirilmiş görüşdə əldə olunmuş razılaşmanın Ermənistan tərəfindən pozmaq cəhdlərini şərh edərkən bildirib.
M.Əhmədoğlu deyib ki, artıq media ötən ilin oktyabrında Azərbaycan və Ermənistan prezidentlərinin görüşündə əsir və itkin düşmüş, girov götürülmüş vətəndaşların məsələsinin müzakirə olunması barədə məlumat verib: “Həmin görüşdə razılığa gəlinib ki, hər iki ölkənin aidiyyəti orqanları arasında əsir-girov və itkin düşmüş şəxslərlə bağlı məsələlərin həlli üçün birbaşa əməkdaşlıq qurulsun və informasiya mübadiləsi aparılsın. Bu prosesin Beynəlxalq Qızıl Xaç Komitəsinin himayəliyi altında həyata keçirilməsi də razılaşdırılmışdı. Bundan sonra Beynəlxalq Qızıl Xaç Komitəsinin Azərbaycan nümayəndəliyinin rəhbərliyi ilə görüş keçirilib və hər iki ölkənin müvafiq komissiyaları arasında əməkdaşlığın qurulması məsələsi müzakirə olunub. Əldə olunmuş razılaşmaya əsasən, Dövlət komissiyasının sədri işçi qrupuna lazımi göstərişlərini verib”.
M.Əhmədoğlunun sözlərinə görə, hazırda Ermənistan tərəfi növbəti dəfə razılaşmanın pozulmasına yönəlmiş fəaliyyətsizlik nümayiş etdirir: “İlkin qənaət ondan ibarət idi ki, Ermənistanın müvafiq dövlət komissiyası işğal altında olan ərazilərdə çox səthi araşdırma apardığına görə, hətta öz itkilərinin sayını belə dəqiq müəyyən etməyib. Lakin dəqiq mənbələrdən əldə etdiyimiz məlumata əsasən deyə bilərik ki, ermənilərin bu prosesi əngəlləmək üçün çox ciddi əsasları var. Müəyyən olunub ki, işğal olunmuş ərazilərdə azərbaycanlıların qətlə yetirilərək basdırıldığı kütləvi məzarlıqlar mövcuddur və DNT analizlərinin toplanması prosesində həmin məzarlıqlar aşkarlanacaq. Ermənilər bunun qarşısını almaq üçün işğal olunmuş ərazilərdə əsir və itkin düşmüş, girov götürülmüş şəxslərlə bağlı hər hansı araşdırma aparılmasında maraqlı deyillər”.
M.Əhmədoğlu bildirib ki, bu faktın üzə çıxması və öz təsdiqini tapması Ermənistan üçün çox böyük zərbə olar və beynəlxalq aləmdə ermənilərin nüfuzuna çox ciddi xələlə gətirə bilər. Buna görə də Ermənistanın aidiyyəti komissiyası əməkdaşlıqdan yayınır.

Paylaş:

Baxılıb: 660 dəfə