Siyavuş Novruzov: ATƏT-in Demokratik Təsisatlar və İnsan Haqları Bürosunun seçkidə müşahidə aparmasına etiraz etmirik

Bakı:

33 °C

40 %

9 m/s

AZ RU EN

Ana səhifə / Siyasət / Siyavuş Novruzov: ATƏT-in Demokratik Təsisatlar və İnsan Haqları Bürosunun seçkidə müşahidə aparmasına etiraz etmirik

Siyavuş Novruzov: ATƏT-in Demokratik Təsisatlar və İnsan Haqları Bürosunun seçkidə müşahidə aparmasına etiraz etmirik

01.09.2015 [10:27]

“Azərbaycan noyabrın 1-də keçiriləcək parlament seçkisində ATƏT-in Demokratik Təsisatlar və İnsan Haqları Bürosunun və digər beynəlxalq qurumların müşahidə aparmasının tərəfdarıdır”. Bunu “Report”a açıqlamasında Yeni Azərbaycan Partiyası (YAP) İcra katibinin müavini, Milli Məclisin deputatı Siyavuş Novruzov deyib.
O qeyd edib ki, Azərbaycan hakimiyyəti hər zaman ölkədə keçirilən seçkilərdə bütün beynəlxalq təşkilatların müşahidə aparmasına tərəfdar olub və müşahidə missiyalarına lazımi şərait yaradıb.
S.Novruzov vurğulayıb ki, bəzi beynəlxalq təşkilatların Azərbaycandakı seçkilərlə bağlı rəyləri qərəzli və obyektivlikdən uzaq olur: “Müqayisəli şəkildə nümunələr göstərə bilərəm. Həmin təşkilatların Azərbaycanın da daxil olduğu postsovet məkanında keçirilən seçkilərə verdikləri rəylə Əfqanıstan, İraq, Misirdə baş tutan seçkilərə yanaşmaları fərqli olur. Burada subyektiv amillər üstünlük təşkil edir, bəyanatlar heç bir qanunvericiliyə, beynəlxalq hüquqa uyğun gəlmir.
Onlar Misirdə keçirilən seçkilərə müsbət rəy verdilər. Üç aydan sonra Misir prezidenti Məhəmməd Mursini həbsxanaya saldılar. İraqda da keçirilən seçkilərə müsbət rəy verirlər. Orada hər gün partlayışlar baş verir, xeyli insan da həyatını itirir. Onların müsbət rəy verdiyi ölkələrdə hələ normal dövlətlər qurulmayıb.
Yəni, bunların mövqeyi dünya ictimaiyyətinə bəllidir. Azərbaycanla bağlı mənfi bəyanatlar verəndə özlərini gülünc vəziyyətə qoyurlar. Azərbaycan seçkiləri hansısa qurum, təşkilat üçün keçirmir ki? Seçkini xalq keçirir. Kənardan kimin nə qiymət verməsindən asılı olmayaraq, xalq kimə səs verdiyini yaxşı bilir”.
S.Novruzov deyib ki, Azərbaycanda keçirilən seçkiləri həm yerli, həm də beynəlxalq müşahidəçilər izləyir. Onun sözlərinə görə, builki parlament seçkisini müşahidə etmək üçün Azərbaycanın ayrı-ayrı strukturları Avropa Şurası Parlament Assambleyasına, ATƏT Parlament Assambleyasına, ATƏT-in Demokratik Təsisatlar və İnsan Haqları Bürosuna, Avropa Parlamentinə təkliflər göndərib: “Yəni, kimin müşahidə aparmaq arzusu varsa, bunu həyata keçirə bilər. Amma ABŞ-da, Rusiyada keçirilən seçkilərə ATƏT-in müşahidə missiyası buraxılmayıb. Bir sıra dövlətlər o təşkilatların qərəzli mövqeyini əsas gətirərək seçkini izləməyə razılıq vermir. Amma Azərbaycan həmin təşkilatlara şərait yaradır, çünki ölkəmizdə şəffaf seçkilər keçirilir”.
S.Novruzov bildirib ki, bəzi beynəlxalq təşkilatlar Azərbaycandakı seçkiləri izləmək üçün müşahidə missiyası göndərən zaman məqsədli şəkildə nümayəndə heyətinin tərkibinə işğal olunmuş Dağlıq Qarabağa qanunsuz səfər edən adamların adlarını salırlar: “Bunu ona görə edirlər ki, Azərbaycan həmin müşahidəçilərdən imtina etsin, viza verməsin, onlar da həmin məsələni əllərində bayraq etsinlər”.

Paylaş:

Baxılıb: 635 dəfə