Eldar İbrahimov: Azərbaycan xalqı birmənalı şəkildə inanır ki, Ali Baş Komandanımızın rəhbərliyi ilə biz torpaqlarımızı mütləq işğaldan azad edəcəyik

Bakı:

26 °C

53 %

5 m/s

AZ RU EN

Ana səhifə / Siyasət / Eldar İbrahimov: Azərbaycan xalqı birmənalı şəkildə inanır ki, Ali Baş Komandanımızın rəhbərliyi ilə biz torpaqlarımızı mütləq işğaldan azad edəcəyik

Eldar İbrahimov: Azərbaycan xalqı birmənalı şəkildə inanır ki, Ali Baş Komandanımızın rəhbərliyi ilə biz torpaqlarımızı mütləq işğaldan azad edəcəyik

11.02.2017 [10:46]

“2016-cı ilin aprel hadisələri Azərbaycan tarixində torpaqlarımızın işğaldan azad edilməsi istiqamətində dönüş nöqtəsidir. Bunu yalnız Azərbaycanda deyil, dünyanın bir çox ölkələrində qəbul edirlər. Hətta düşmən Ermənistan da hadisələr vaxtı Azərbaycanın hansı gücə malik olduğunu gördü və qəbul etdi. 2016-cı ilin aprel ayından bu yana Ermənistanda ciddi narahatçılıq var. Uzun illər ölkəmizi ATƏT Parlament Assambleyasında təmsil edən millət vəkili olaraq bilirəm ki, o vaxtdan bu yana Azərbaycanın işğal olunmuş ərazilərində süni şəkildə məskunlaşdırılan, xaricdən gətirilən ermənilər ciddi narahatlıq içindədirlər və imkanı olanlar, öz pasportunu əldə edə bilənlər Azərbaycanın işğal olunmuş ərazilərini tərk edirlər”. Bu fikirləri Yeni Azərbaycan Partiyasının (YAP) İdarə Heyətinin üzvü, Milli Məclisin Aqrar siyasət komitəsinin sədri Eldar İbrahimov deyib.
E.İbrahimov bildirib ki, 2016-cı ilin aprel hadisələrindən sonra Azərbaycan xalqının öz torpaqlarını işğaldan azad etmək əzmi güclənib və insanlarda ruh yüksəkliyi artıb: “Hesab edirəm ki, biz mütləq Heydər Əliyev siyasəti, Prezident İlham Əliyevin iradəsi və qətiyyəti sayəsində torpaqlarımızı işğaldan azad edəcəyik. Artıq 2016-cı il aprel hadisələrindən sonra bir çox məsələlər Azərbaycanın xeyrinə işləyir. Daha doğrusu, Azərbaycan bu məsələdə işğala məruz qalan bir tərəfdir, sadəcə beynəlxalq hüquq düzgün işlədikdə bizdə sevinc hissi doğur. Beynəlxalq hüquq yerinə yetirilmədikdə terror hadisələri, bir ölkənin başqa bir ölkənin ərazilərini işğal etməsi məsələsi, yəni insan qanının axması çoxalacaq. Ona görə də Belarus dövləti beynəlxalq hüquq normalarına söykənərək, Azərbaycanın işğal olunmuş ərazilərinə dəfələrlə qanunsuz səfər edən və işğal faktına dəstək yönümlü çağırışlar edən Aleksandr Lapşini Azərbaycana təhvil verdi. İndi bütün dünya biləcək ki, hansısa əcnəbinin bir daha Azərbaycanın işğal olunmuş ərazilərinə qanunsuz olaraq səfər etməsi həmin adama xeyir gətirməyəcək. Mən əminəm ki, ayrı-ayrı ölkələrdə insanların erməni lobbisi tərəfindən aldadılaraq, Azərbaycanın işğal olunmuş ərazilərinə turist adı ilə göndərilməsi hallarına son qoyulacaq. Belə səfərə gedən hər kəs onu da Lapşinin taleyinin gözləyəcəyini biləcək”.
Eldar İbrahimov qeyd edib ki, Azərbaycan uğurlu daxili və xarici siyasət həyata keçirir: “İndi elə bir dönəmdə yaşayırıq ki, dünyanın qabaqcıl ölkələri də balanslı siyasət həyata keçirə bilmirlər. Azərbaycan Respublikasının Prezidenti İlham Əliyevin siyasəti nəticəsində ölkəmiz beynəlxalq müstəvidə böyük uğurlar qazanır. Azərbaycan dünyanın belə bir mürəkkəb dönəmində nəinki regionun, hətta dünyanın ən stabil ölkələrindəndir. Hesab edirəm ki, dövlətimizin başçısı İlham Əliyevin bacarığı, savadı, dünyagörüşü, iradəsi, əzmi sayəsində Azərbaycan öz hədəflərinə çatacaq. Bu hədəflərin başında ərazi bütövlüyümüz, ərazilərimizin işğaldan azad edilməsi məsələsi durur. Ötən ay Azərbaycan Prezidenti Cəbrayıl rayonunun işğaldan azad olunmuş Cocuq Mərcanlı kəndinin bərpa olunması haqqında Sərəncam imzaladı. Bu Sərəncamın çox böyük mənəvi üstünlüyü var. Bu o deməkdir, dövlətimiz digər ərazilərimizi də işğaldan azad edəcək və insanlar öz doğma yurdlarına qayıdacaqlar. Bu hadisə həm işğalçı Ermənistana, həm də bütün dünyaya bir mesaj oldu. Bu gün ölkəmizdə elə bir ruh yüksəkliyi var ki, hər kəs, xüsusilə gənclər Ali Baş Komandanın əmri ilə hər an silaha sarılmağa hazırdırlar. Biz belə bir gəncliyimizlə fəxr edirik. Şəhid Çingiz Qurbanovun nəşinin erməni tərəfindən geri alınması Azərbaycan Prezidentinin qətiyyətli mövqeyinin nəticəsdir. Dövlət başçısının Çingiz Qurbanova Milli Qəhrəman fəxri adını verməsi isə bir daha torpaqlarımızın azadlığı uğrunda fədakarlıq edən insanlarımıza yüksək diqqət və ehtiramın nümunəsidir. Prezidentimiz Çingizin ailə üzvləri ilə görüşündə də onun qəhrəmanlığını xüsusi vurğulayıb. Bütün bunlar hər bir vətəndaşda böyük ruh yüksəkliyi yaradır. Azərbaycan xalqı birmənalı şəkildə inanır ki, Ali Baş Komandanımızın rəhbərliyi ilə biz torpaqlarımızı mütləq işğaldan azad edəcəyik”.

Paylaş:

Baxılıb: 541 dəfə