Sankt-Peterburqda Parlamentlərarası İttifaqın 137-ci Assambleyası keçiriləcək

Bakı:

25 °C

56 %

9 m/s

Əlaqə

AZ RU EN

Ana səhifə / Siyasət / Sankt-Peterburqda Parlamentlərarası İttifaqın 137-ci Assambleyası keçiriləcək

Sankt-Peterburqda Parlamentlərarası İttifaqın 137-ci Assambleyası keçiriləcək

13.10.2017 [10:19]

Oktyabrın 14-18-dək Sankt-Peterburqda Parlamentlərarası İttifaqın (PAİ) 137-ci Assambleyası keçiriləcək. Gözlənildiyinə görə, Milli Məclisin sədri Oqtay Əsədov başqa olmaqla Azərbaycan Parlamentinin nümayəndə heyəti də bu tədbirdə iştirak edəcək.
MDB Parlamentlərarası İttifaqının mətbuat xidmətindən AZƏRTAC-a verilən məlumata görə, dünyanın beş qitəsindən 100-ə yaxın ölkənin parlamentlərinin sədrləri və 150-dən çox xarici ölkənin nümayəndə heyətləri Assambleyada iştirak edəcəklərini təsdiqləyiblər. Tədbirin qeydiyyata alınmış iştirakçılarının ümumi sayı 2300-dən çoxdur. Ən iri beynəlxalq KİV-lər PAİ Assambleyasını işıqlandıracaqlar.
Assambleyada mühüm hadisələrdən biri “Demokratiya haqqında ümumi bəyannamənin 20 illiyi qarşısında: müxtəlifliyimizin ümumiliyi” adlı qətnamənin qəbul edilməsi olacaq. Tədbirin proqramında Parlamentlərarası İttifaqın: Qadın Parlamentarilər Forumu və Gənc Parlamentarilər Forumu tematik iclaslar və sessiyalar keçirilməsi nəzərdə tutulur. PAİ-nin daimi komitələrinin - Assambleya rəhbər komitəsinin, demokratiya və insan haqları komitəsinin, Birləşmiş Millətlər Təşkilatı İşləri üzrə Komitənin, davamlı inkişaf, maliyyə və ticarət komitəsinin, sülh və beynəlxalq təhlükəsizlik məsələləri komitəsinin iclasları keçiriləcək.
Assambleya çərçivəsində Parlamentlərarası İttifaqın altı geosiyasi qrupunun: Afrika qrupu, Ərəb qrupu, Asiya-Sakit Okean qrupu, Avrasiya qrupu, Latın Amerikası qrupu və “On iki üstəgəl” qrupunun (Qərbi və Mərkəzi Avropa ölkələri, Kanada və bəzi başqa dövlətlər) iclasları keçiriləcək. Türkmənistan parlamentarilərinin də PAİ-yə qoşulması gözlənilir. Onlar özlərinin bu niyyətini Parlamentlərarası İttifaqın 137-ci Assambleyasının keçirilməsi ərəfəsində bəyan ediblər.
Xüsusi qeyd etmək lazımdır ki, Sankt-Peterburqda Assambleyanın keçiriləcəyi günlərdə PAİ-nin yeni sədri seçiləcək.
Parlamentlərarası İttifaqın Assambleyasının tədbirləri üç məkanda: “Ekspoforum” Konqres-sərgi Mərkəzində, Tavriya sarayında və Parlament mərkəzində keçiriləcək.
Parlamentlərarası İttifaq ən qədim beynəlxalq parlament təşkilatıdır. 1889-cu ildə yaradılmış bu ittifaq dünyanın 173 ölkəsinin parlamentarilərini və 11 parlamentlərarası təşkilatı birləşdirir. Dünyada ən nüfuzlu parlament təşkilatlarından biri olan Parlamentlərarası İttifaq mövcud olduğu bütün müddətdə parlamentarizmin inkişafına, insan haqlarına riayət edilməsinə, həmçinin millətlərarası sülhün bərqərar olmasına və beynəlxalq təhlükəsizliyin qorunub saxlanmasına kömək edir.

Paylaş:

Baxılıb: 524 dəfə