Bəhruz Quliyev: Azərbaycan mətbuatı Xocalı faciəsinin dünya ictimaiyyətinə çatdırılması prosesində aktiv iştirak edir

Bakı:

27 °C

39 %

5 m/s

AZ RU EN

Ana səhifə / Siyasət / Bəhruz Quliyev: Azərbaycan mətbuatı Xocalı faciəsinin dünya ictimaiyyətinə çatdırılması prosesində aktiv iştirak edir

Bəhruz Quliyev: Azərbaycan mətbuatı Xocalı faciəsinin dünya ictimaiyyətinə çatdırılması prosesində aktiv iştirak edir

27.02.2018 [09:58]

“Xocalı soyqırımı mahiyyətinə görə bütövlükdə insanlığa qarşı törədilmiş cinayətdir, vəşhilikdir. Xocalı soyqırımı dünya tarixində ən qəddar və amansız qətliamlardan biridir. Erməni hərbi birləşmələri 366-cı motoatıcı alayın dəstəyi ilə azərbaycanlılara qarşı məhz belə bir dəhşətli cinayət törədiblər”. Bu fikirləri yap.org.az saytına “Səs” qəzetinin baş redaktoru Bəhruz Quliyev deyib.
B.Quliyev bildirib ki, ötən əsrdə ermənilər iki dəfə xalqımıza qarşı soyqırımı törədiblər. Bunlardan birincisi 1918-ci ilin mart qırğınları, ikincisi isə 1992-ci il fevralın 26-da törədilmiş Xocalı soyqırımıdır. Onun sözlərinə görə, hər iki hadisənin mahiyyətində vandalizm siyasəti, dinc, günahsız insanlara qarşı amansız qətliamlar dayanır.
“Xocalı hadisəsində yüzlərlə insan, o cümlədən, uşaqlar, qadınlar, qocalar görünməmiş vəhşiliklə qətlə yetiriliblər. Məhz bu qətliamın səbəbi də bu insanların milli, dini, etnik mənsubiyyətidir. Onlar azərbaycanlı olduqlarına görə qətlə yetirildilər. Bu hadisə baş verdikdən sonra Xocalı həqiqətlərinin dünyada tanıdılması istiqamətində dövlət səviyyəsində sistemli iş aparılır. Bu faciəyə ilk dəfə olaraq Ümummilli liderimiz Heydər Əliyevin təşəbbüsü ilə siyasi-hüquqi qiymət verilib. Hazırda Prezident İlham Əliyevin rəhbərliyi ilə həyata keçirilən siyasət nəticəsində dünyanın bir sıra dövlətləri Xocalı faciəsini soyqırımı aktı kimi tanıyıblar. Eləcə də, Heydər Əliyev Fondunun vitse-prezidenti Leyla xanım Əliyevanın təşəbbüsü ilə reallaşan “Xocalıya ədalət!” kampaniyası nəticəsində hər il dünyanın əksər ölkələrində Xocalı həqiqətlərinin dünya ictimaiyyətinə çatdırılması istiqamətində tədbirlər keçirilir. Bu kampaniya miqyasına görə böyük əhəmiyyət kəsb edir”, - deyə baş redaktor vurğulayıb.
Azərbaycan mətbuatının Xocalı həqiqətlərinin dünya ictimaiyyətinə çatdırılması istiqamətdə vəzifələrindən danışan B.Quliyev qeyd edib ki, mətbuatımız bu prosesdə aktiv iştirak edir. “Necə ki, cəbhədə əsgərlərimiz döyüşə hazır vəziyyətdədir, eyni vəziyyəti jurnalistkamıza da aid etmək olar. Yəni jurnalistlər də döyüş vəziyyətindədir. Çünki torpaqlarımız işğal altındadır və belə olduğu təqdirdə mətbuatımız daim mübarizədə olmalıdır. Bu gün qlobal dünya məkanında intellektual mübarizə gedir və bizim intellekt sahiblərinin də bu baxımdan döyüş meydanına çıxmasına zərurət yaranır. Və jurnalistlər ordusunun intellektual ordu olduğunu nəzərə alsaq, bu gün Azərbaycan jurnalistikası da bu prosesdə fəallığını daha da artırmalıdır. Yəni, Xocalı həqiqətlərinin dünya ictimaiyyətinə çatdırılması yalnız dövlətin vəzifəsi yox, hər bir vətəndaşın, o cümlədən KİV nümayəndələrinin əsas vəzifələrindən biridir. 26 ildir ki, dövrü mətbuatda, elektron mediada Xocalı soyqırımı ilə bağlı məqalələr, əsərlər yazılır, canlı şahidlərin iştirakı ilə filmlər çəkilir. Bu filmlər, nəşrlər xaricdə də yayılır. Bütün bunlar Azərbaycan mətbuatının Xocalı soyqırımının dünya ictimaiyyətinə çatdırılması prosesində aktiv iştirak etdiyini təsdiqləyir. Bununla belə, gələcəkdə bu proses daha da gücləndirilməlidir”, - deyə B.Quliyev vurğulayıb.

Paylaş:

Baxılıb: 565 dəfə