Avropa Xəbər Agentlikləri Alyansı: Pandemiya dövründə informasiya istehlakı artsa da, xəbər müxtəlifliyi azalıb

Bakı:

24 °C

57 %

7 m/s

AZ RU EN

Ana səhifə / Siyasət / Avropa Xəbər Agentlikləri Alyansı: Pandemiya dövründə informasiya istehlakı artsa da, xəbər müxtəlifliyi azalıb

Avropa Xəbər Agentlikləri Alyansı: Pandemiya dövründə informasiya istehlakı artsa da, xəbər müxtəlifliyi azalıb

13.06.2020 [09:37]

Vebinarda AZƏRTAC-ın İdarə Heyətinin sədri Aslan Aslanov informasiya istehsalı və istehlakında mövcud meyillərdən danışıb
Pandemiya dövründə informasiya istehlakı artsa da, xəbər müxtəlifliyi azalmağa doğru dəyişib. İş formatında və üslubunda da müəyyən dəyişikliklər baş verib.
Bu məsələlər Avropa Xəbər Agentlikləri Alyansına (EANA) üzv agentliklərin iyunun 12-də keçirilən onlayn görüşündə müzakirə olunub.
Görüşdə Fransanın France Press, Almaniyanın DPA, Türkiyənin Anadolu, İspaniyanın EFE, Finlandiyanın STT, Ukraynanın Ukrinform və digər agentliklərin rəhbərləri və nümayəndələri iştirak ediblər. Azərbaycanı Alyansın üzvü olan AZƏRTAC-ın İdarə Heyətinin sədri, OANA-nın vitse-prezidenti Aslan Aslanov təmsil edib.
Təqdimatla çıxış edən DPA agentliyinin prezidenti Piter Kropş qeyd edib ki, koronavirus pandemiyası xəbər istehlakının xeyli artmasına səbəb olub. İnsanlar əsasən bu xəstəlik və yaranan iqtisadi böhranla daha çox maraqlanıblar. Lakin bununla belə, bütün sahələrdəki durğunluq informasiya müxtəlifliyinə mənfi təsir edir. Video və mətn həcminin qısalması, foto satışının, press-reliz və reklam biznesinin zəifləməsi müşahidə olunur. Bu baxımdan Avropa agentlikləri gəlirlərin azaldığı dövrdə qənaət rejiminə keçmək niyyətindədir.
Eyni zamanda, karantin səbəbindən agentliklər fəaliyyətlərinin böyük hissəsini mobil texnologiyalar və məsafədən iş vasitələri ilə həyata keçirdiklərini, bunun da yeni imkanlar açdığını qeyd edirlər. Bu cür iş rejimində uzun müddət fəaliyyət göstərmək mümkün olsa da, mövcud məhdudiyyətlər innovasiyaların tətbiqinə mənfi təsir göstərir.
Görüşdə çıxış edən AZƏRTAC-ın İdarə Heyətinin sədri Aslan Aslanov bu qeyri-adi dövrdə insanların etibarlı informasiyaya ehtiyacından, dezinformasiyanın cəmiyyətə mənfi təsirindən danışıb. O bildirib ki, Azərbaycanda COVID-19-a qarşı mübarizə ilə yanaşı, Prezident İlham Əliyevin rəhbərliyi ilə dövlətin həyata keçirdiyi sosial-iqtisadi dəstək və tibbi iqtisadiyyatın təşkili proqramları maraq doğuran əsas mövzular olub. Agentlik bu sahələr üzrə xəbər, video, analitik və infoqrafika materialları hazırlayaraq 8 dildə yayıb. Statistikaya əsasən, AZƏRTAC-ın informasiyalarına müraciətlərin pandemiya dövründə 40 faiz yüksəldiyini qeyd edən Aslan Aslanov deyib: “Azərbaycanda koronavirusla bağlı vəziyyəti idarə edən Nazirlər Kabineti yanında Operativ Qərargahın mütəmadi brifinqləri, medianın sorğularına operativ cavabları dezinformasiyanın ölkədə geniş yayılmasının qarşısını alıb”.
Görüşdə pandemiya zamanında auditoriya üçün müxtəlif informasiya növlərinin istehsalından da bəhs edilib. Qeyd olunub ki, karantin rejimində məktəblərin bağlanması ilə əlaqədar AZƏRTAC özünün Uşaq Bilik Portalı vasitəsilə şagirdlər və uşaqlar üçün təlim və tədris materialları, maarifləndirici və düşündürücü məlumatlar yayıb.
Alyansın vebinarda iştirak edən üzv agentliklərinin rəhbərləri öz təcrübələrini bölüşüb, belə görüşlərin davam etdirilməsinin vacibliyini vurğulayıblar.

Paylaş:

Baxılıb: 405 dəfə