Jolt Şomloi: Azərbaycandan çox şey öyrənə bilərik

Bakı:

22 °C

64 %

3 m/s

Əlaqə

AZ RU EN

Ana səhifə / Siyasət / Jolt Şomloi: Azərbaycandan çox şey öyrənə bilərik

Jolt Şomloi: Azərbaycandan çox şey öyrənə bilərik

26.02.2010 [09:16]

Tanınmış macar iqtisadçısı, İqtisadi Modelləşdirmə və Proqnozlaşdırma Mərkəzinin aparıcı elmi işçisi Jolt Şomloi Azərbaycanın uğurları, Prezident İlham Əliyevin həyata keçirdiyi ölkənin modernləşdirilməsi və dünya iqtisadi sisteminə inteqrasiya xətti barədə yüksək fikirdə olduğunu bildirib. Doktor Şomloi AzərTAc-ın müxbiri ilə söhbətində deyib ki, Azərbaycan dövlətinin sürətli inkişafını və ölkədə həyata keçirilən islahatları diqqətlə izləyir və böyük məmnunluq hissi ilə bildirirəm ki, bu sahədə ilk nəticələr çox güclü təsir bağışlayır. Macarıstanlı ekspert deyib: “Dünya maliyyə-iqtisadi böhranından ciddi zərər çəkmiş Macarıstan üçün Azərbaycanın təcrübəsini öyrənmək çox maraqlıdır. Azərbaycan son il yarımda sənaye cəhətdən inkişaf etmiş ölkələrin demək olar ki, hamısını sarsıtmış çətinliklərdən bacarıqla yan keçmiş və həmin böhrandan daha da bərkimiş halda çıxmışdır. Dünya böhranının dalğaları, obrazlı şəkildə desək, sizin sahillərə də çırpılırdı, bu təhlükə sizin qapıları da döyürdü. Bu sınaqdan uğurla çıxmış ölkələr azdır və onlardan biri də Azərbaycandır. Sizin sahillər həqiqətən bu kortəbii qüvvənin zərbəsinə davam gətirə bilmişdir. Bu baxımdan, Azərbaycanın təcrübəsini, ölkəmizdə aparılan islahatları öyrənmək, uğurlarınızın sirrini aydınlaşdırmaq bizim üçün çox maraqlıdır. Azərbaycanın büdcə siyasətini öyrənmək bizim üçün xüsusilə maraqlıdır. Fikrimcə, bu siyasət çox diqqətlə düşünülmüş və risklərdən qorunmuşdur”.
ölkələrimizin iqtisadi əməkdaşlıq üzrə hökumətlərarası komissiyanın Azərbaycandan olan üzvlərinin bu yaxınlarda Macarıstana səfərinin praktiki əhəmiyyəti barədə suala doktor Şomloi belə cavab verib: “Sizin nüfuzlu hökumət nümayəndə heyətinin səfəri və həmin səfər çərçivəsində ölkələrimiz arasında iqtisadi əməkdaşlığın genişləndirilməsi barədə protokol imzalanması mənə yaxşı məlumdur. Bu, əyani şəkildə göstərir ki, Azərbaycan Prezidenti İlham Əliyevin Macarıstana iki səfəri və bizim Baş nazirin Bakıya səfərləri zamanı çoxsaylı sazişlər imzalanması ilə təməli qoyulmuş əməkdaşlığın bazası kifayət qədər möhkəmdir və bu əməkdaşlığı daha da genişləndirmək üçün yaxşı imkanlar yaranmışdır. Elə buna görə də Hökumətlərarası Komissiya yaradılmış, bu günlərdə həmin komissiyanın Azərbaycan tərəfindən olan üzvləri Macarıstanda olmuş və qarşılıqlı faydalı iqtisadi əməkdaşlığın prioritet istiqamətlərini müəyyən etmişlər”.
Müsahib daha sonra qeyd edib ki, onun ölkəsi Azərbaycanın ərazi bütövlüyünü rəsmi səviyyədə dəstəkləyir və zorakılığa əsaslanan separatizmə, etnik təmizləmələrə qarşı çıxır. O deyib: “Enerji ehtiyatları ilə təchizat amilindən çox asılı olan bir ölkə kimi biz NABUCCO layihəsinin taleyi üçün narahatıq. Qaz kəmərlərinin sayı nə qədər çox olsa, bizim üçün bir o qədər yaxşıdır. İki qaz kəməri birindən, üç qaz kəməri isə ikisindən yaxşıdır. Zənnimcə, enerji hasil edən və onu nəql edən ölkələrin siyasi təhlükəsizliyi təmin edilmədən enerji təhlükəsizliyinin təmin edilməsi mümkün deyildir. Siyasi təhlükəsizlik və enerji təhlükəsizliyi ayrılmaz amillərdir. Buna görə də Macarıstan istər rəsmi səviyyədə, istərsə də qeyri-hökumət səviyyəsində Ermənistan-Azərbaycan münaqişəsinin beynəlxalq hüquq normaları əsasında, daha dəqiq desək, Helsinki Yekun Aktı, BMT-nin Nizamnaməsi, habelə Avropa Şurası, ATƏT və BMT-nin Baş Məclisi, BMT-nin Təhlükəsizlik Şurası çərçivəsində qəbul edilmiş qərar və qətnamələr əsasında tezliklə tənzimlənməsinin tərəfdarıdır. Bizim ölkə Avropa İttifaqının üzvüdür, buna görə də biz Avropa dəyərlərinə tam əməl edirik. Bu dəyərlər dövlətlərin ərazi bütövlüyünə, insan hüquqlarına və həmin dövlətlərdə məskunlaşmış azlıqların hüquqlarına hörmət edilməsini, yerli hakimiyyət orqanlarına demokratik seçkilər yolu ilə tamdəyərli özünüidarənin təmin olunmasını nəzərdə tutur. Biz münaqişə tərəflərindən hər ikisinin prezidentləri arasında ATƏT-in Minsk qrupunun himayəsi altında əlaqə saxlanmasını alqışlayırıq. Şübhə etmirik ki, tərəflər konstruktiv mövqe tutsalar, beynəlxalq hüquq normaları əsasında öz millətlərini regionda çoxdan gözlənilən sülhə qovuşdura bilərlər. Beləliklə, həm Azərbaycanın ərazi bütövlüyünə riayət olunacaq, həm də regionların və milli azlıqların səmərəli özünüidarə hüququ tamamilə təmin ediləcəkdir”.
Söhbətin sonunda doktor Şomloi çoxmillətli Azərbaycan xalqına böyük uğurlar, firavanlıq, tərəqqi, sülh, ölkənin ərazi bütövlüyünün tezliklə bərpa olunmasını və məcburi köçkünlərin öz evlərinə qayıtmasını arzulayıb.

Paylaş:

Baxılıb: 1330 dəfə