İlkin Əliyev: ATƏT-in Minsk qrupunun həmsədrləri kimin işğalçı, kimin isə təcavüzə məruz qalan tərəf olduğunu açıq şəkildə bildirməlidirlər

Bakı:

22 °C

65 %

7 m/s

AZ RU EN

Ana səhifə / Siyasət / İlkin Əliyev: ATƏT-in Minsk qrupunun həmsədrləri kimin işğalçı, kimin isə təcavüzə məruz qalan tərəf olduğunu açıq şəkildə bildirməlidirlər

İlkin Əliyev: ATƏT-in Minsk qrupunun həmsədrləri kimin işğalçı, kimin isə təcavüzə məruz qalan tərəf olduğunu açıq şəkildə bildirməlidirlər

19.08.2020 [20:53]

“Müasir dünyada mövcud olan bir çox problemlərin həlli məsələsində vasitəçilərdən istifadə olunur. Lakin ayrı-ayrı nümunələrə istinadən deyə bilərik ki, vasitəçilik missiyası heç də həmişə uğurlu alınmır. Dövlətlərarası hansısa bir problemlə bağlı uzun illər boyu danışıqlar aparılır, vədlər verilir, ancaq, necə deyərlər, daş yerindən tərpənmir, problem olduğu kimi qalır. Hər dəfə vasitəçilik missiyasının üzvləri və yaxud rəhbərləri dəyişdikdə tərəflər sıfır nöqtəsinə qayıtmaq məcburiyyətində qalırlar. Proseslərin qapalı dövrədə sonsuzluğa qədər davam etməsi isə regional və qlobal təhlükəsizliyə yeni təhdidlər yaradır, ölkələr inkişafla bağlı problemlər yaşayırlar, insanların inamı qırılır”.

Bu fikirləri qəzetimizə açıqlamasında Gənc Politoloqlar Mərkəzinin sədri İlkin Əliyev deyib.

O, konkret olaraq Ermənistan-Azərbaycan Dağlıq Qarabağ münaqişəsinin timsalında da vasitəcilik missiyasının hələlik heç bir uğur qazanmadığını bildirib: “Məlumdur ki, Ermənistanın işğalçılıq siyasətinin nəticəsi olaraq Azərbaycanın ərazi bütövlüyü pozulub. Ölkəmizin beynəlxalq birlik tərəfindən tanınan ərazilərinin 20 faizi işğal altına düşüb və təxminən 1 milyon soydaşımız doğma ev-eşiyini tərk etmək məcburiyyətində qalıb. Problemin həllinə ABŞ, Fransa və Rusiyanın həmsədrliyi ilə ATƏT-in Minsk qrupu cəlb olunub. ABŞ, Fransa və Rusiya kifayət qədər güclü dövlətlərdirlər və qlobal miqyasda gedən proseslərə təsir etmək imkanlarına malikdirlər. Ancaq biz Dağlıq Qarabağ münaqişəsinin həlli ilə bağlı aparılan danışıqlarda həmsədrlərin prinsipiallığını görmürük. Biz bilirik ki, indiki dövrdə separatizm nə qədər təhlükəli bir meyldir. Ermənistan da xarici havadarlarının köməyi ilə işğal etdiyi Azərbaycan ərazisində separatçı bir rejim qurub. Dağlıq Qarabağda yaradılan bu separatçı rejimi heç bir ölkə, heç bir beynəlxalq təşkilat tanımır. Bununla belə, ATƏT-in Minsk qrupunun həmsədrləri işğalçını öz adı ilə çağırmırlar”.

İ.Əliyev əlavə edib ki, ATƏT-in Minsk qrupunun fəaliyyətsizliyi işğalçı Ermənistanın iyul ayında iki ölkə arasındakı dövlət sərhədinin Tovuz istiqamətində törətdiyi təxribata münasibətdə özünü bir daha göstərib. Qurum növbəti dəfə Ermənistan silahlı qüvvələrinin Azərbaycanın mövqelərini qəfil artileriya atəşinə məruz qoymasına, həmçinin yaşayış məntəqələrini, dinc sakinləri hədəfə almasına seyirçi münasibət sərgiləyib. Belə münasibətin məntiqini heç nə ilə izah etmək mümkün deyil. ATƏT-in Minsk qrupunun həmsədrləri obyektivlik göstərərək kimin işğalçı, kimin isə təcavüzə məruz qalan tərəf olduğunu açıq şəkildə bildirməlidirlər.

Paylaş:

Baxılıb: 377 dəfə