Düşmənin bütün təxribatlarının qarşısı Azərbaycan Ordusu tərəfindən qətiyyətlə alınır

Bakı:

23 °C

63 %

1 m/s

Əlaqə

AZ RU EN

Ana səhifə / Siyasət / Düşmənin bütün təxribatlarının qarşısı Azərbaycan Ordusu tərəfindən qətiyyətlə alınır

Düşmənin bütün təxribatlarının qarşısı Azərbaycan Ordusu tərəfindən qətiyyətlə alınır

29.08.2020 [00:36]

Ekspertlərin fikrincə, Ermənistan silahlı qüvvələrinin diversiya-kəşfiyyat qrupunun təxribat törətmək cəhdi düşmənin işğalçılıq siyasətinin növbəti təzahürüdür

Məlum olduğu kimi, avqustun 23-də cəbhənin Goranboy rayonu istiqamətində Ermənistan silahlı qüvvələrinin diversiya-kəşfiyyat qrupunun komandiri, baş leytenant 1989-cu il təvəllüdlü Qurgen Alaverdyan Azərbaycan Ordusu tərəfindən həyata keçirilmiş tədbirlər nəticəsində saxlanılıb. Bununla bağlı Azərbaycan Respublikası Baş Prokurorluğunun və Dövlət Təhlükəsizliyi Xidmətinin birgə məlumatında bildirilir ki, Ermənistan silahlı qüvvələri tərəfindən işğal edilmiş Kəlbəcər rayonu ərazisində qanunsuz olaraq yaradılmış silahlı birləşmələrin tərkibində xidmət keçən Q.Alaverdyanın Azərbaycanın hərbi qulluqçularına, ölkənin müəssisə, idarə və təşkilatlarına yönələn diversiya hərəkətləri, habelə digər cinayətlər törətməsinə əsaslı şübhələr müəyyənləşib. Faktla bağlı Azərbaycan Respublikasının Cinayət Məcəlləsinin müvafiq maddələri ilə cinayət işi başlanıb.

Bu məqamda qeyd etmək yerinə düşər ki, uzun illərdir, Azərbaycan torpaqlarını işğal altında saxlayan Ermənistan zaman-zaman hərbi təxribatlara əl atır, təmas xəttində, eləcə də dövlət sərhədimizdə atəşkəsi pozur, dinc əhaliyə qarşı silah işlədir. Təbii ki, düşmənin bütün təxribatları onun məğlubiyyəti və çoxsaylı itkiləri ilə müşayiət olunur.

Məsələyə münasibət bildirən Milli Məclisin deputatı Ceyhun Məmmədov qeyd edib ki, cəbhənin Goranboy rayonu istiqamətində Ermənistan silahlı qüvvələrinin diversiya-kəşfiyyat qrupunun təxribat törətmək cəhdi düşmənin işğalçılıq siyasətinin növbəti təzahürüdür: “Bu təxribat bir daha onu göstərir ki, Ermənistan rəhbərliyi özünün çirkin niyyətindən əl çəkmir. Belə ki, hələ ötən ay Ermənistanın növbəti təxribatının qarşısı ordumuz tərəfindən alınıb. Amma baş verənlər onu göstərir ki, düşmən Tovuz istiqamətində gedən döyüşlərdəki məğlubiyyətindən nəticə çıxarmayıb”.

Deputatın sözlərinə görə, son təxribat onu göstərir ki, düşmən cəbhə bölgəsində məqsədli şəkildə gərginlik yaratmaq istəyir: “Görünür, Ermənistan rəhbərliyi diqqəti daxildəki ictimai-siyasi və sosial-iqtisadi problemlərdən yayındırmaq istəyir. Buna baxmayaraq, düşmənin bütün təxribatlarının qarşısı Azərbaycan Ordusu tərəfindən hər dəfə qətiyyətlə alınır. Çünki Azərbaycan Silahlı Qüvvələri düşmənin bütün təxribatlarına cavab verməyə qadirdir”.

Ehtiyatda olan polkovnik Əzizağa Qəni-zadə isə bildirib ki, son hadisədə düşmənin diversiya-kəşfiyyat qrupu itki verərək geri çəkilməyə məcbur edilib: “Ermənistanın diversiya-təxribat qrupunda yaralanan və ölənlərin olduğu deyilsə də, düşmən məlumatı təkzib edir. Üstəlik, Ermənistanın Müdafiə Nazirliyi bildirib ki, guya erməni zabiti azaraq Azərbaycan Ordusunun mövqelərinə keçib. Əslində bu, Tovuz hadisələrindən sonra Ermənistan silahlı qüvvələrinin Azərbaycana qarşı növbəti uğursuz təxribat cəhdidir”.

Ə.Qəni-zadə bildirib ki, mahiyyət etibarilə sabotaj, diversiya və terror xarakterli uğursuz əməliyyatın əsas hədəfi Azərbaycan Ordusunun bölmələrinin kazarmaları və şəxsi heyəti olub: “Lakin bölmələrimizin ayıq-sayıqlığı, şəxsi heyətin peşəkarlığı nəticəsində düşmənin təxribatının qarşısı alınıb, erməni hərbçiləri itki verərək qorxaqcasına geri qaçmağa məcbur olublar. Düşmən tərəfdən yaralanan və ölənlərin olduğu bildirilsə də, Ermənistan hakimiyyəti 2016-cı ilin Aprel döyüşləri və 2020-ci ilin iyulunda Azərbaycan-Ermənistan sərhədinin Tovuz rayonu istiqamətində gedən döyüşlər zamanı olduğu kimi, yenə də döyüş itkiləri və yaralananlar barədə məlumatı gizlətməyə çalışır”.

“Ermənistanın ombudsmanı A.Tatoyan isə tutulan kəşfiyyatçının hüquqlarının pozulduğunu iddia edib. Belə bir iddianı irəli sürən Tatoyan məhz Ermənistan tərəfinin Cenevrə Konvensiyasının bütün tələblərini kobud şəkildə pozaraq Dilqəm Əsgərova, Şahbaz Quliyevə, o cümlədən bu günədək əsir və girov götürülmüş digər azərbaycanlılara vəhşicəsinə işgəncələr verilməsi barədə də danışsaydı, daha obyektiv olardı”, - deyə Ə.Qəni-zadə bildirib.

Qaşqay

Paylaş:

Baxılıb: 365 dəfə