Karl Öllinqer: İqtisadi artımın səviyyəsi Azərbaycanda gedən güclü inkişafa bariz nümunədir

Bakı:

24 °C

63 %

1 m/s

Əlaqə

AZ RU EN

Ana səhifə / Siyasət / Karl Öllinqer: İqtisadi artımın səviyyəsi Azərbaycanda gedən güclü inkişafa bariz nümunədir

Karl Öllinqer: İqtisadi artımın səviyyəsi Azərbaycanda gedən güclü inkişafa bariz nümunədir

10.03.2010 [10:34]

Ərazi və əhalicə eyni səviyyədə olan, öz tarixi keçmişində bir çox oxşarlıqlara malik Azərbaycan ilə Avstriya arasında son illərdə əlaqələr yüksələn xətlə inkişaf etməkdədir. Bu əlaqələrin inkişafına daim səy göstərən şəxslərdən biri də Avstriya Milli Şurasının (parlament) deputatı, Cənubi Qafqaz üzrə parlament işçi qrupunun sədri Karl öllinqerdir. Rəhbərlik etdiyi işçi qrupunun fəaliyyəti ilə əlaqədar Cənubi Qafqaz regionuna yaxından bələd olan K.öllinqer AzərTAc-ın xüsusi müxbiri ilə söhbətində Avstiya ilə Azərbaycan arasında ikitərəfli əlaqələrin inkişaf perspektivlərindən söhbət açıb.
Yaxın vaxtlarda - Avstriyanın Azərbaycanda səfirliyi açılandan sonra ikitərəfli münasibətlərin daha da inkişaf edəcəyinə ümidvar olduğunu ifadə edən Karl öllinqer, regionun aparıcı ölkəsi olan Azərbaycan ilə Mərkəzi Avropanın qabaqcıl dövləti Avstriya arasında əməkdaşlığın inkişafı üçün böyük potensialın mövcudluğunu qeyd edib. Azərbaycan ilə Avstriya arasında əlaqələr qədim tarixə malikdir. Dünya müharibələri, soyuq müharibə dövrü, Avropanı iki cəbhəyə ayıran “dəmir pərdə”, sovet rejimi regionlararası əlaqələrdə fasilə yaratsa da, hazırda ərazi və əhalicə eyni böyüklüyə malik ölkələrimiz arasında münasibətlər yüksək səviyyədədir.
İqtisadi sahədə geniş potensialın olduğunu diqqətə çatdıran K.öllinqer, eyni zamanda, mədəniyyət, elm və humanitar sahələrdə də əməkdaşlıq və mübadilənin dərinləşdirilməsinin vacibliyini vurğulayaraq deyib: “Yaşıllar Partiyasının təmsilçisi kimi alternativ enerji sahəsində ölkələrimiz arasında əməkdaşlığın daha sürətlə inkişafını arzu edirəm. çünki Azərbaycan günəşli ölkədir və Bakı şəhərinə də “küləklər şəhəri” deyildiyini bilirəm. Bu sahədə Avstriya müasir texnoloji imkanları Azərbaycana təqdim edə bilər”.
Azərbaycanın Avropanın enerji təhlükəsizliyinin təminatı üçün gələcəkdə daha böyük əhəmiyyət kəsb edəcəyini bildirən K.öllinqer deyib ki, Qərb ölkələri müxtəlif kəmər layihələri barədə uzun-uzadı danışıqlar aparmaq və tərəddüd göstərməkdənsə, konkret fəaliyyətə keçməlidirlər. Avropa üçün NABUCCO qaz kəməri layihəsinin reallaşması çox əhəmiyyətlidir. Lakin çox tərəddüd göstərməyimiz Azərbaycan kimi ölkələri haqlı olaraq digər enerji marşrutlarını nəzərdən keçirməyə sövq edir.
Azərbaycan Respublikası Milli Məclisinin 90 illik yubiley tədbirlərində iştirakını məmnuniyyətlə xatırlayan K.öllinqer ölkədə gedən quruculuq işləri və inkişaf prosesindən təkcə onun deyil, bütün xarici qonaqların heyran qaldıqlarını bildirib: “Nəhəng tikinti meydançasını xatırladan Bakıda gedən inşaat və quruculuq işləri bütün qonaqlar kimi, məndə də heyranlıq doğurmuşdur. Azərbaycanda həyata keçirilən uğurlu siyasət nəticəsində əldə edilən iqtisadi artımın göstəriciləri bizim üçün təsəvvür edə bilməyəcəyimiz dərəcədə yüksək idi və bu, ölkədə güclü iqtisadi inkişafın getdiyinə bariz nümunədir”.
Təəssüf ki, Ermənistanın hərbi təcavüzü və ölkədə yüz minlərlə qaçqın və məcburi köçkünün olması iqtisadi inkişafın tam sürətlə irəliləməsinə əngəl törədir, gənc respublikanın qarşısına həllini gözləyən əlavə məsələlər çıxarır. Cənubi Qafqaz üzrə parlament işçi qrupu mürəkkəb geosiyasi məkanda yerləşən regionda mövcud münaqişələrlə bağlı vəziyyəti Avstriya parlamentinə düzgün şəkildə çatdırmağa çalışır. Avstriya Dağlıq Qarabağ münaqişəsinin beynəlxalq norma və prinsiplərə riayət etməklə beynəlxalq təşkilatlar, xüsusilə də ATƏT çərçivəsində dinc yolla nizamlanmasına çalışır. Müsahibim deyib: “İndiyədək münaqişənin bir çox həll variantı müzakirə edilmişdir. Şəxsən hesab edirəm ki, qaçqın və məcburi köçkünlərin öz torpaqlarına qayıtması təmin edilmədən istənilən həll variantı yolverilməzdir”.
Cənubi Qafqaz üzrə parlament işçi qrupunun rəhbəri kimi regiondakı ölkələrə müxtəlif illərdə səfər etdiyini qeyd edən K.öllinqer Ermənistan qədər səfalət və yoxsulluq içində olan ölkəyə rast gəlmədiyini söyləyərək demişdir: “ATƏT-in missiyası çərçivəsində Ermənistanda seçkiləri izləyərkən, Yerevandan şimalda yerləşən rayonlarda əhalinin yaşayış səviyyəsini, bərbad infrastrukturu müşahidə edəndə insanda depressiv hisslər yaranırdı”.
Deputat bildirib ki, zəngin mədəniyyət və qədim adət-ənənələrə malik Azərbaycandan öyrəniləsi çox şeylər vardır. çoxsaylı xalqların və müxtəlif dinlərə tapınan insanların Azərbaycanda dinc birgəyaşayışı Avstriya üçün örnək ola bilər.

Paylaş:

Baxılıb: 1144 dəfə