Qüdrət Həsənquliyev: Biz Vətənimizin bütövlüyü uğrunda mübarizədə Ali Baş Komandanın yanındayıq

Bakı:

22 °C

64 %

8 m/s

Əlaqə

AZ RU EN

Ana səhifə / Siyasət / Qüdrət Həsənquliyev: Biz Vətənimizin bütövlüyü uğrunda mübarizədə Ali Baş Komandanın yanındayıq

Qüdrət Həsənquliyev: Biz Vətənimizin bütövlüyü uğrunda mübarizədə Ali Baş Komandanın yanındayıq

30.09.2020 [08:48]

“Ermənistan silahlı qüvvələrinin hərbi təxribatlarının qarşısını almaq, mülki əhalinin təhlükəsizliyini təmin etmək məqsədilə Azərbaycan Ordusunun bütün cəbhə boyu əks-hücum əməliyyatı başlayıb. Xalqımızın çoxdan gözlədiyi gün gəlib çatdı. Ali Baş Komandanı, zabit və əsgərlərimizi torpaqlarımızın işğaldan azad olunması istiqamətində əldə etdiyimiz qələbələr münasibətilə təbrik edirəm. Torpaqlarımızı işğaldan azad etmək üçün xalqımızı bütün soydaşlarımızı Ali Baş Komandanın, ordumuzun ətrafında sıx birləşməyə çağırıram”. Bu fikirləri Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev deyib.
Qüdrət Həsənquliyev bildirib ki, ümumiyyətlə, son aylar Azərbaycan diplomatiyası uğurla beynəlxalq ictimaiyyəti regionda baş verənlər, həmçinin işğalçı Ermənistanın hücuma hazırlaşdığı və təxribatçı fəaliyyəti barədə məlumatlandırırdı. Azərbaycan Respublikası Prezidentinin BMT Baş Məclisinin 75-ci sessiyasındakı çıxışı isə bu baxımdan son dərəcə təsirli və əhəmiyyətli idi. Partiya sədrinin fikrincə, işğalçı Ermənistanın genişmiqyaslı hərbi əməliyyatlara başlaması, mülki əhalinin yaşadığı kəndləri və infrastrukturları hədəf kimi seçərək ağır silahlarla bombalaması beynəlxalq hüquqa ziddir və qarşısı qətiyyətlə alınmalıdır: “Ermənistanın siyasi hakimiyyəti daxili siyasətdə yaşadığı sosial-iqtisadi problemləri, epidemioloji vəziyyətin gətirdiyi sosial çətinlikləri həll etməkdə acizdir. Ermənistan hökuməti vətəndaşlarının diqqətini bu problemlərdən yayındırmaq, daxili siyasi mübarizəni arxa plana çəkmək məqsədi ilə mütəmadi olaraq cəbhə xəttində atəşkəsi pozur. Ona görə də Azərbaycan Ordusu haqlı olaraq düşmənə layiq olduğu cəzanı verir”.
Q.Həsənquliyev xatırladıb ki, Azərbaycanda fəaliyyət göstərən 50 siyasi partiya yaranmış vəziyyətlə bağlı bəyanat imzalayıb: “Bəyanatda qeyd olunduğu kimi, siyasi partiyalar Ali Baş Komandan, Prezident İlham Əliyevin Vətənimizin ərazi bütövlüyünün və vətəndaşların təhlükəsizliyinin qorunması, Ermənistanın ölkəmizə qarşı həyata keçirdiyi genişmiqyaslı terror təxribatlarının qarşısının alınması məqsədilə həyata keçirdiyi bütün siyasi və hərbi tədbirləri yekdilliklə dəstəkləyir və Onun yanında olduğunu bildirir. Belə mürəkkəb şəraitdə ölkəmizin bütün vətəndaşlarını və dünya azərbaycanlılarını bir daha milli birliyə və vəhdətə səsləyir, hər kəsi Azərbaycanın haqq səsinin dünya birliyinə çatdırılmasına töhfə verməyə, beynəlxalq ictimaiyyəti isə Azərbaycanın həm tarixi həqiqətlər, həm də beynəlxalq hüquqla dəstəklənən haqq mübarizəsinə biganə qalmamağa çağırırıq”.
Nardar BAYRAMLI

Paylaş:

Baxılıb: 312 dəfə