Razi Nurullayev: Hazırkı dönəmdə milli həmrəyliyə xidmət edən hər bir addım böyük əhəmiyyətə malikdir

Bakı:

28 °C

54 %

5 m/s

AZ RU EN

Ana səhifə / Siyasət / Razi Nurullayev: Hazırkı dönəmdə milli həmrəyliyə xidmət edən hər bir addım böyük əhəmiyyətə malikdir

Razi Nurullayev: Hazırkı dönəmdə milli həmrəyliyə xidmət edən hər bir addım böyük əhəmiyyətə malikdir

09.10.2020 [08:47]

“Bu günlərdə tariximizin ən məsuliyyətli dövrünü yaşayırıq. Torpaqlarımızın işğaldan azad olunması prosesinin getdiyi bir vaxtda bütün cəmiyyətimiz vahid mövqe nümayiş etdirir. 50 siyasi partiya rəhbərinin iştirakı ilə bir neçə gün öncə Prezident Administrasiyasında “Milli həmrəylik - siyasi dialoqun nəticəsi” adlı videokonfrans formatında keçirilən görüş də bu baxımdan önəmlidir”. Bu fikirləri Milli Cəbhə Partiyasının sədri, millət vəkili Razi Nurullayev deyib.
R.Nurullayev bildirib ki, Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin rəhbərliyi ilə keçirilən görüşdə ölkənin siyasi partiyalarının rəhbərləri bir araya gəlməklə Azərbaycanda yaşanan milli və siyasi həmrəyliyi bir daha nümayiş etdiriblər. Onun sözlərinə görə, ölkəmizdə fəaliyyət göstərən siyasi partiyalar Ali Baş Komandan, Prezident İlham Əliyevin Vətənimizin ərazi bütövlüyünün və vətəndaşların təhlükəsizliyinin qorunması, Ermənistanın ölkəmizə qarşı genişmiqyaslı terror təxribatlarının qarşısının alınması məqsədilə həyata keçirdiyi bütün siyasi və hərbi tədbirləri yekdilliklə dəstəklədiklərini və Onun yanında olduqlarını bildiriblər: “Çünki biz müasir tariximizin və haqq mübarizəmizin ən məsuliyyətli və ən qürurlu mərhələsini yaşayırıq. Bu günlərdə milli həmrəyliyə xidmət edən hər bir addım böyük əhəmiyyətə malikdir. Siyasi sabitliyə, etibarlı münasibətlərə və davamlı inkişafa xidmət edən bu addım milli həmrəyliyin, xalq-hakimiyyət birliyinin təcəssümüdür. Hesab edirəm ki, bu gün hər bir vətəndaş siyasi baxışlarından asılı olmayaraq Qarabağı düşünməlidir. Bu baxımdan, ölkəmizdə fəaliyyət göstərən siyasi partiyaların həmrəylik nümayiş etdirməsi, Ali Baş Komandanın ətrafında daha sıx birləşməsi, dövlətçilik mövqeyindən çıxış etməsi böyük önəm kəsb edir. Bu gün ölkəmizdə heç vaxt olmadığı qədər milli birlik mövcuddur. Milli Cəbhə Partiyasının sədri olaraq bəyan etmişəm ki, mən və partiyamızın bütün üzvləri torpaqlarımızın işğaldan azad olunması naminə döyüşə getməyə və şəhid olmağa hazırıq. Biz belə bir zamanda Ali Baş Komandan İlham Əliyevin ətrafında sıx birləşmişik və bütün siyasi partiyaları da bu birliyə dəvət edirik. Baş verən proseslər milli birliyimizi və siyasi dialoqu zəruri edir. Və bu istiqamətdə atılan addımlar məmnunluq doğurur”.
NARDAR

Paylaş:

Baxılıb: 416 dəfə