İqbal Ağazadə: Bizim əsas hədəfimiz başladığımız müqəddəs zəfər yürüşünü sona çatdırmaq, Vətən müharibəsini qələbə ilə başa vurmaqdır

Bakı:

23 °C

53 %

5 m/s

AZ RU EN

Ana səhifə / Siyasət / İqbal Ağazadə: Bizim əsas hədəfimiz başladığımız müqəddəs zəfər yürüşünü sona çatdırmaq, Vətən müharibəsini qələbə ilə başa vurmaqdır

İqbal Ağazadə: Bizim əsas hədəfimiz başladığımız müqəddəs zəfər yürüşünü sona çatdırmaq, Vətən müharibəsini qələbə ilə başa vurmaqdır

05.11.2020 [08:31]

“Azərbaycan 30 ildən çoxdur ki, erməni terrorçuluğu ilə üz-üzədir. Belə ki, 1988-ci ildən bu günə qədər xalqımıza qarşı aparılan mənfur siyasətdə terror elementləri üstünlük təşkil edir. Erməni terrorizminin əsas hədəfi isə dinc sakinlərimiz olub. Qaradağlı, Malıbəyli, Ağdaban və digər faciələr, onlardan ən dəhşətlisi olan Xocalı soyqırımı xalqımızın qan yaddaşına əbədi olaraq həkk olunub. İndiki halda şəhərlərimizə, dinc əhaliyə qarşı qadağan olunmuş silahlarla, raketlərlə hücumların təşkili həmin soyqırımın tərkib hissəsidir. Ermənistan bu cür terror metodları ilə müharibənin xarakterini dəyişməyə, onun miqyasını böyütməyə cəhd edir”.
Bu fikirləri “Yeni Azərbaycan”a açıqlamasında Azərbaycan Ümid Partiyasının sədri İqbal Ağazadə səsləndirib.
Partiya sədrinin sözlərinə görə, düşmən əhali arasında təşviş yaratmağa və Azərbaycan tərəfini adekvat addımlar atmağa vadar etməyə çalışır: “Amma Ali Baş Komandanın rəhbərliyi altında aparılan Vətən müharibəsinin gedişində Azərbaycan Ordusunun qarşısına konkret tapşırıq və vəzifələr qoyulub. Onların tərkibində isə kimliyindən asılı olmayaraq dinc sakinlərə qarşı güc tətbiq etmək qətiyyən yer almır. Ermənistanın məğlub ordusu elə bir vəziyyətdədir ki, bir tərəfdən döyüş meydanından qaçır, digər tərəfdən dinc yaşayış məntəqələrinə raket atmaqla namərdlik nümayiş etdirir. Ən acınacaqlısı isə odur ki, onlar uşaqları və qadınları cəbhəyə göndərirlər”.
“Bizim əsas hədəfimiz başladığımız müqəddəs zəfər yürüşünü sona çatdırmaq, Vətən müharibəsini qələbə ilə başa vurmaqdır. Biz işğal edilmiş torpaqlarımızın azad edilməsini başa çatdıranda artıq Ermənistanın müharibənin xarakterini dəyişmək cəhdləri boşa çıxacaq. Hesab edirəm ki, sona qədər getməliyik. Mən Ali Baş Komandanın əks-hücum əməliyyatları başlaması barədə qərar verdiyi ilk andan siyasi partiya rəhbəri kimi elan etmişəm ki, mən bu gündən əsgərəm. Ali Baş Komandan bizim yerimizi harada müəyyən etsə, orada da vuruşmağa hazırıq. İndi arxa cəbhədə gedən proseslərə öz töhfəmizi veririk. Şükürlər olsun ki, Azərbaycan Ordusu cəbhədə yeni-yeni uğurlar əldə edir. Ali Baş Komandanın rəhbərlik etdiyi Vətən müharibəsində daim Onun yanındayıq. Doğma torpaqların işğaldan azad olunması yönündə Azərbaycan Ordusunun apardığı müqəddəs işdə sona qədər Ali Baş Komandanın yanında olacağıq”.
Q.RAMAZANOV

Paylaş:

Baxılıb: 588 dəfə