Heydər Əliyev Fondu və Rabitə və İnformasiya Texnologiyaları Nazirliyinin mütəxəssisləri Naxçıvana səfər edib

Bakı:

25 °C

78 %

7 m/s

AZ RU EN

Ana səhifə / Siyasət / Heydər Əliyev Fondu və Rabitə və İnformasiya Texnologiyaları Nazirliyinin mütəxəssisləri Naxçıvana səfər edib

Heydər Əliyev Fondu və Rabitə və İnformasiya Texnologiyaları Nazirliyinin mütəxəssisləri Naxçıvana səfər edib

08.04.2010 [15:00]

Heydər Əliyev Fondu ilə Azərbaycan Rabitə və İnformasiya Texnologiyaları Nazirliyinin əməkdaşlarından ibarət birgə qrup Naxçıvan Muxtar Respublikasında Regional İnformasiya Mərkəzinin tikintisi ilə tanış olmaq üçün bir günlük səfərlə Naxçıvana yola düşüb.
RİTN mətbuat xidmətinin rəhbəri Müşfiq Əmirovun “APA-Economics”ə verdiyi məlumata görə, mərkəz Heydər Əliyev Fondu, Rabitə və İnformasiya Texnologiyaları Nazirliyi və BMT-nin İnkişaf Proqramının birgə həyata keçirdiyi və məhdud qabiliyyətli insanların informasiya-kommunikasiya texnologiyalarından (İKT) istifadə imkanlarının artırılması məqsədini daşıyan layihənin davamı çərçivəsində tikilir. Müasir texnologiyalarla təchiz olunacaq bu mərkəzdə oxu zalı, təlim-tədris mərkəzi, audiokitabxana, kitabxana fondunun audioformata çevrilməsi üçün səsyazma studiyası, sürətli internetə çıxışla və xüsusi olaraq kor və görmə qabiliyyəti zəif uşaqlar üçün nəzərdə tutulmuş son model kompüterlərlə təmin olunmuş kompüter mərkəzi qurulacaq. Mərkəzin internet saytı yaradılacaq. 50 adda kitabın brayl əlifbası ilə çap olunaraq kitabxananın səsyazma studiyasının köməyi ilə audio formata çevrilməsi nəzərdə tutulur.
Mərkəzdə görmə qabiliyyəti zəif olan insanlar üçün kompüterlərə elektron böyüdücü cihazların quraşdırılması, brayl şriftli kitabların nəşri, lal və karlar üçün subtitrli filmlərin nümayişi, əqli cəhətdən zəif insanlar üçün zehni inkişaf etdirən kompüter oyunlarının yaradılması nəzərdə tutulur. Buraya əlil arabası ilə gələnlərin maneəsiz hərəkətinin təmin olunması üçün müvafiq şərait yaradılacaq.
Qeyd edək ki, Azərbaycan hökuməti cəmiyyətin hər bir üzvünün İKT vərdişlərinin inkişafına xüsusi önəm verir. O cümlədən məhdud qabiliyyətli insanlar üçün İKT-dən yararlanmaq şəraiti və elektron informasiya resurslarından istifadə imkanları yaradılır. Heydər Əliyev Fondunun prezidenti Mehriban Əliyevanın təşəbbüsü ilə “Görmə qabiliyyətini itirmiş və görmə qabiliyyəti zəif olan insanlar üçün informasiya kommunikasiya texnologiyalarına çıxışın təmin edilməsinə dair” layihəsi çərçivəsində bu günə kimi kor və zəif görən uşaqlar üçün Respublika İnternet Məktəbində model İKT sinifləri yaradılıb.
Gəncə şəhərində də yaradılmış Regional İnformasiya Mərkəzinin xidmətindən Gəncə və Naftalan şəhərlərində, eləcə də Ağstafa, Daşkəsən, Qazax, Gədəbəy, Goranboy, Samux, Tovuz, Göygöl, Şəmkir rayonlarında yaşayan və fiziki qüsuru olan 60 mindən çox insan istifadə edə bilər.

Paylaş:

Baxılıb: 1242 dəfə