İƏT-ə üzv ölkələrin Milli Xəbər Agentlikləri Birliyi ilə AZƏRTAC-ın birgə vebinarı keçirilib

Bakı:

25 °C

56 %

1 m/s

Əlaqə

AZ RU EN

Ana səhifə / Siyasət / İƏT-ə üzv ölkələrin Milli Xəbər Agentlikləri Birliyi ilə AZƏRTAC-ın birgə vebinarı keçirilib

İƏT-ə üzv ölkələrin Milli Xəbər Agentlikləri Birliyi ilə AZƏRTAC-ın birgə vebinarı keçirilib

17.12.2020 [09:14]

Dekabrın 16-da İslam Əməkdaşlıq Təşkilatına (İƏT) üzv ölkələrin Milli Xəbər Agentlikləri Birliyinin (UNA) və bu qurumun büro üzvü olan AZƏRTAC-ın birgə təşkilatçılığı ilə “Rəqəmsal xəbər istehsalı bacarıqları” mövzusunda vebinar keçirilib.
Tədbirdə Birləşmiş Ərəb Əmirlikləri, Qazaxıstan, Səudiyyə Ərəbistanı, Malayziya, Bəhreyn, İraq, Sudan, İtaliya və digər ölkələrdən 30-a yaxın KİV nümayəndəsi iştirak edib.
UNA-nın direktor müavini Zayid Sultan vebinarın jurnalistlər arasında təcrübə mübadiləsini genişləndirmək, yeniliklərin tətbiqini sürətləndirmək, müasir tendensiyalarla tanış olmaq məqsədilə keçirildiyini qeyd edib. “Şadam ki, AZƏRTAC informasiya agentliyi ilə birgə bu tədbiri təşkil edirik. Agentliyin əməkdaşı kontent yaradıcılığı sahəsində təcrübələrini bölüşərək pandemiya şəraitində və ümumiyyətlə, kontent yaradıcılığındakı yanaşmaları təqdim edəcək. Buna görə AZƏRTAC-ın rəhbərliyinə təşəkkürümüzü bildiririk”, - deyə o vurğulayıb.
AZƏRTAC-ın Xarici dillərdə informasiya və beynəlxalq əlaqələr idarəsinin müdiri Süleyman İbrahimov agentliyin pandemiya şəraitində fəaliyyətindən danışıb. Qeyd olunub ki, karantin rejimində agentliyin xəbərlərinə olan tələb yüksəlib ki, bu da cəmiyyətin doğru və operativ xəbərlərə artan ehtiyacından irəli gəlir. Bununla əlaqədar AZƏRTAC-ın informasiyalarına müraciətlər 40 faiz artıb. Eyni zamanda, veb-resurslarına birbaşa girişlər 90 faizə qədər yüksəlib.
Pandemiya insanların xəbər istehlakı üçün mobil cihazlara daha çox müraciət etməsinə də təkan verib. Statistikaya əsasən, karantin rejimində bu göstərici 56 faiz yüksəlib. Bundan başqa, pandemiya şəraiti kontent yaradıcılığında əvvəllər az diqqət yetirilən üsul və vasitələrin daha intensiv istifadəsini önə çəkib. Kütləvi tədbirlərin ləğv olunmasına və digər fəaliyyət məhdudiyyətlərinə baxmayaraq, buraxılan informasiyaların həcmi artıb. Əsasən vizual kontentə maraq daha da çoxalıb.
Bildirilib ki, son bir il ərzində informasiya agentliklərinin xəbərlərinə tələbat dəfələrlə artıb. Bu da insanların geniş yayılan feyk xəbərlər fonunda doğru informasiyalara meyillənməsindən irəli gəlir. Nəticə etibarilə demək olar ki, mürəkkəb informasiya axını şəraitində bu tendensiya qarşıdakı illərdə də yüksək olaraq qalacaq.
Vebinarda Russia Today televiziyasının nümayəndəsi Artur Sokolov da çıxış edərək televiziya və internet kontentləri arasındakı fərqlərdən, sosial şəbəkələrin yaratdığı trendlərdən, müxtəlif platformalarda işin qurulmasından, video hazırlamaq üçün vasitələrdən danışıb.

Paylaş:

Baxılıb: 534 dəfə