Raket və Artilleriya Qoşunlarının hərbi hissələrinə media-tur təşkil edilib

Bakı:

22 °C

57 %

9 m/s

Əlaqə

AZ RU EN

Ana səhifə / Siyasət / Raket və Artilleriya Qoşunlarının hərbi hissələrinə media-tur təşkil edilib

Raket və Artilleriya Qoşunlarının hərbi hissələrinə media-tur təşkil edilib

11.02.2021 [09:13]

Fevralın 9-da kütləvi informasiya vasitələri nümayəndələrinin Azərbaycan Ordusunun Raket və Artilleriya Qoşunlarının hərbi hissələrinə səfəri təşkil olunub.
AZƏRTAC xəbər verir ki, səfər çərçivəsində şəxsi heyət və müasir artilleriya qurğuları ilə tanış olan media nümayəndələri praktiki tapşırıqların icrasını canlı izləyiblər.
Əvvəlcə, hərbi hissənin şəxsi heyətinə şərti həyəcan siqnalı verilib. Həyəcan siqnalı ilə qaldırılan bölmələrin hərtərəfli döyüş hazırlığı, qarşıya qoyulan vəzifələri qısa müddətdə yerinə yetirmək bacarıqları və manevr imkanları praktiki nümayiş etdirilib.
Azərbaycan Ordusunun Raket və Artilleriya Qoşunlarının komandanı, general-mayor Ağamir Sultanov jurnalistlərə müsahibəsində deyib ki, düşmənin təxribatlarının qarşısını almaq məqsədilə ötən il sentyabrın 27-də Silahlı Qüvvələrin Ali Baş Komandanı İlham Əliyevin rəhbərliyi ilə həyata keçirilən “Dəmir yumruq” adlı uğurlu əks-hücum əməliyyatı ilə başlayan 44 günlük Vətən müharibəsi Azərbaycanın tam qələbəsi ilə başa çatıb. Vətən müharibəsi Azərbaycan Ordusunun Raket və Artilleriya Qoşunlarının kütləvi atəş zərbəsi ilə başlayıb.
General-mayor bildirib ki, kütləvi atəş zərbəsi zamanı düşmənin müdafiə dərinliyində olan bütün hərbi obyektləri, o cümlədən hava hücumundan müdafiə, radioelektron mübarizə vasitələri, idarəetmə məntəqələri, reaktiv artilleriya və minaatan batareyaları, ehtiyatları məhv edilib.
Müdafiə Nazirliyinin mətbuat xidmətinin mətbuat katibi polkovnik-leytenant Anar Eyvazov jurnalistlərə müsahibəsində qeyd edib ki, Vətən müharibəsində Raket və Artilleriya Qoşunları digər qoşun növləri ilə birlikdə düşmənin dərinlikdə yerləşən hədəflərini dəqiq atəş zərbələri ilə sıradan çıxarıb. Müharibədə şücaət göstərmiş Raket və Artilleriya Qoşunlarının dörd minədək hərbi qulluqçusu “Vətən müharibəsi qəhrəmanı” fəxri adı, müxtəlif orden və medallarla təltif edilib.
Anar Eyvazov diqqətə çatdırıb ki, Vətən müharibəsində Raket və Artilleriya Qoşunlarının 184 hərbi qulluqçusu şəhid olub və bir neçə hərbçisi xəsarət alıb. Müharibə başa çatdıqdan sonra da Müdafiə Nazirliyi tərəfindən təsdiqlənmiş plana uyğun olaraq hazırda daimi dislokasiya məntəqələrində və işğaldan azad edilmiş ərazilərdə yerləşdirilən bölmələrimiz döyüş hazırlığı ilə məşğul olur, yüksək texnoloji silahların imkanlarını və istifadə qaydalarını mənimsəyirlər. Şəxsi heyətə həmin silahlar praktiki şəkildə öyrədilir. Beləliklə, Raket və Artilleriya Qoşunlarının şəxsi heyətinin peşəkarlığı təmin edilir.
Raket və Artilleriya Qoşunlarının zabiti, polkovnik Pərviz İbrahimov jurnalistlərə müsahibəsində deyib ki, Vətən müharibəsinin nəticələri Azərbaycan Ordusunun qarşıya qoyulmuş döyüş tapşırıqlarını müvəffəqiyyətlə icra etdiyini göstərir. Hərbi hissəmiz hazırda döyüş hazırlığı proqramına uyğun olaraq bölmələrin səhra vərdişlərinin daha da artırılması istiqamətində fəaliyyətini davam etdirir.
Polkovnik vurğulayıb ki, indi qarşımızda gecə məhdud görmə şəraitində dağlıq ərazilərdə atəş tapşırıqlarını yerinə yetirmək, həmçinin pilotsuz uçuş aparatları ilə qarşılıqlı fəaliyyəti genişləndirmək, onlardan alınan kəşfiyyat məlumatlarını təhlil etmək vəzifələri dayanır. Hazırda çöl dərsləri ilə məşğul olan şəxsi heyətin mənəvi-psixoloji vəziyyəti yüksək səviyyədədir.

Paylaş:

Baxılıb: 638 dəfə